我買緊金，十萬八萬港紙，你都最好買啲，輸就一齊 (Patreon)

 版務

第二篇專欄，上次預告咗，今篇只講金。但呢個係特例，一般我一篇文寫幾個課題，咩都會講下，唔一定每次都係你有興趣嘅嘢，畢竟眾口難調，話晒已經突破300人 – 實在相當感激，比我預期好。

舊讀者嘅，無論係HomeBlogger或者更早睇我文嘅，原諒我有時在呢度會長氣，可能有啲嘢你早已聽過。但我會重新講一次，畢竟要照顧新讀者。

另外，金融薯片。有朋友話我知，喂，你有時FB Page啲文仲好睇過呢度喎。例如講一仔轉倉嗰篇。此言差矣。講心機一定係呢度放得最多，不過FB Page因為要吸人，所以多數放啲較嘩眾取寵多人關心嘅文，偏偏係冇益嘅。況且，就算你鍾意薯片，你都可以諗，都係有你地呢度支持，先有FB Page嗰啲薯片文。

好，正題，買金。

愛兄弟？梗係愛黃金！

一句：我又再買咗金，十萬八萬咁啦（港紙），仲會再買

1. 點解買金？當然係睇升。以上呢個圖，係由黃金期權計返出嚟，街估緊金價之後點走嘅機率分佈（＊）。估會創新高嘅，39%，估會創52周新低嘅，2%都冇。

2. 埃汾買幾多？　唔少人問埃汾（＊＊）自己渣住乜，亦都係應該問。講到買乜乜乜點好，但自己唔去買，你估真係瑞士山區肺自己賺夠咩。但埃汾近乎唔公開自己嘅投資組合，原因好多。一來費事畀人抽水，二來怕畀人發現好窮，三來同工作亦有關。工作關係我差不多只能月供買指數基金。不過資產種類配置遲下可以同大家講（應該眾所周知我有600萬台幣在台灣）。

3. 但，有樣可以公開講嘅：就係買金。我已經買咗唔少（何謂少陣間再講），仲會再買。講得白啲，呢啲位唔包你跟住我贏，但輸就兩份。當然我唔係買身家，你都唔好。

4. 現貨金急跌，失守埋2000美金，應該點？梗係應該買啦。其實連1900都穿過，但我係唔睇價嘅。因為金好難短炒，冇業績冇產品，點都要玩返幾年，所以真係唔使睇一日半日價。

5. 雖然，見到真係跌得好急下。個單日跌幅係7年以嚟最勁。

6. 點解金價呢排跌？其實都好簡單，因為美國10年債券債息忽然抽咗上去。但相信唔會點持久，況且，買黃金最主要都唔係睇美國10年債息（但都會睇）。

 7. 信報嘅圖很好，其實之前大牛市都唔少調整，今次金價跌百幾蚊，10%未到已經嚇走晒的話，咁冇定力好難搵大錢。

8. 控制注碼：很重要，講明先。注碼定輸贏（黃國英本書嘅書名，亦係事實）。Idea係唔多值錢的，故事人人識講，但除咗時機，就係注碼。冇金嘅，記住去買。唔使問我乜價，聽日好去買，我同你一齊。買幾多？買到去你身家嘅5-10%左右（＊＊＊）。呢個數字點嚟？冇架，我建議。

9. 黃金有乜價值？以上係一個讀者早兩日嘅PM，我覺得好似我諗法—不過係我廿年前嘅諗法。廿年前問我，我唔會叫你買金。十五年前問我都唔會。但十年前問我就會，我都係差不多嗰個年代開始買金（但，未到5%）。

10. 傳統智慧，其實都唔係建議你好多買金，只係作為分散，當「另類投資」（舊文寫過），5%已經幾盡。畢菲特都講，因為黃金唔派息，亦唔會好似公司咁成長（但係咪真？陣間討論）。我同意嘅係，黃金好難短炒。佢又唔會有業績，又唔會有人收購，又唔會有盈利。個走勢就真係睇下買家定賣家進取，係受一大堆其他宏觀因素影響。

11. 我唔多認為黃金係避險資產。傳統智慧話，讀者都有講，黃金係避險資產。咁有人估，埃汾估打仗？唔係。我係個悲觀嘅樂觀者。況且，黃金真係避險資產？你望下三月，佢同股票一齊跌。到之後，又係同股票一齊升的。所以我唔多認為佢有避險作用，美債先有。

12. 咁點解買金？兩個原因，其實可能係同一個：美元係咁跌，仲有美國（其他國家都係）不停印銀紙。下面個圖，你睇到有幾誇張

13. 就係咁簡單，黃金係所有貨幣嘅照妖鏡：在黃金面前，所有呢啲Fiat currency （法幣，篤手指講個信字，冇黃金支持），全部黯然失色，你睇下過去100年各國法幣對黃金貶咗幾多。亦因為咁，我咪話十五年前問我我唔會買，十年前問我我會。當中發生乜事？就係雷曼2008爆煲，全球量寬。畢菲特大半生人係高息嘅年代，冇見過呢啲嘢。

14. 黃金的價值。讀者話，「黃金冇乜價值，冇實際用途」。後者都唔完全係，固然黃金唔同白銀，冇乜（但唔係完全冇）工業用途，但做珠寶首飾已經係用途，炫富亦係用途。況且，乜嘢係「價值」？我嘅作風係鍾意諗啲嘢諗到好哲學。有冇留意，你講黃金嗰時，一定講幾多美金一安士？有炒開外匯嘅，都知道XAU當係一種外匯咁報價—黃金就係所有貨幣嘅反面，主要係美金。銀紙貶值，但黃金唔貶，所以就會升。

15. 美國不停派錢。美國之前停擺晒，點解失業率先10%？或者，咁多人失業，點解仲未大規模社會不穩？因為有錢拎。有啲仲要多過原本份工（所以有唔肯炒人嘅老細畀員工鬧，真的）。但，錢從何來？個赤字係咁擴大。固然有所謂美元特權，而MMT（Modern Monetary Theory）之類嘅邪教（有機會講），認為點印都得？真係？咁點解美國政府仲要收稅？印出嚟咪得。

16. 就當美國例外，咁歐洲印埋咁多呢？去晒邊？總會搵啲位走。以前唔少入咗樓市，早排好多入咗啲科技股，點都會有啲走入金市。

17. 金價升咗咁多，仲買？當然買。升得多唔多唔係你買唔買嘅理由，你睇蘋果（唔係282，雖然282都升好多）升幾多？你睇返樓上，經通脹調整後，金價根本有排未破頂—新讀者未必知道，埃汾一般唔係信陰謀論嘅人，但我認為官方啲CPI係搵人笨的。你睇漢堡包貴咗幾多？太古城貴咗幾多？況且，官方都冇話CPI係通脹，你地以為之嘛。CPI三隻字 ，邊隻字係通脹？冇噃。

18. 但正如我講，金係好難短炒嘅。你問我，就預渣三五七年。我2010嗰堆，一路冇沽（但真係唔多，都話5%身家唔夠）。

19. 咁點買法？仲會有人問，喂，咁點買？係喎，買金有好多方法。有實金，金幣，ETF，紙黃金，金礦股，至少五種方法。篇幅關係，星期六或者星期二（唔想連續兩日講金）先講。或者好急嘅（但，爭在嗰兩日？！），睇Homeblogger 收費片。

20. 如果有人有興趣嘅，我應該仲會講埋白銀（Homeblogger片入面冇，唔好買咗見冇話我昆你）。但畀定結論你，我只買金，唔買銀。

（＊）有學過normal distribution 呀可？但記住，黃金同股票，都係升多過跌的，基本常識。其中一個原因就係印錢

（＊＊）新讀者可能唔慣，本人慣咁自稱。其中一個好處係：唔使打英文字。唔係埃汾唔識英文，而係打字上中英全型半型轉嚟轉去好煩。所以你見我有時會明明英文都用中文打，例如「阿丕嫂」。

（＊＊＊）請小心，你嘅身家係net worth。你層樓值1000萬但你供剩900萬，你嘅身家係100萬，唔係1000萬。有人話應該唔計自住樓，我覺得計。因為你可以移民。