誠哥增持長實。抖音攬炒微軟？買車位不如買舖位。一仔狂升，但，東方都升？ (Patreon)

In KS We Trust

抖音攬炒微軟？應該都係會傾掂數嘅

買車位不如買舖位

一仔狂升，但，東方都升？

今日係正式收費後第一天，多謝呢270個讀者對我嘅支持。坦白講，第一篇肯定唔係最好嘅一篇。首先忙拉客（你地呀），二來只會一篇比一篇好。人要進步。暫時會係咁形式，一日幾個故事。閒話休提，去片。

In KS We Trust

以前收費專欄都常用呢個題，KS你都唔識？你係咪香港人？樓上呢位。

故事係李嘉誠李澤鉅，再增持長實。咁原本好似冇乜特別，但留意幾點：首先，佢地七月頭後冇增持過，今次八月第一次（呢個網幾好用）。點解？因為出業績，出之前一個月（應係）唔可以增持。咁八月七日，正係出完業績嗰日—一到可以增持就即增，你話有冇信心？

第二，呢度第一篇文寫過，嗰日長實股價大跌。點解？因為出完業績減派息。當時我已經話唔使諗，買落去。「李嘉誠明顯都有睇我嘅文」

第三，技術少少，睇返蘋果講

所以，短期內佢地增持空間，唔多。但，有冇話你知，呢排有人不地咁推放寬呢條例。估下邊個發功？所以你睇，呢個專欄幾咁有意義。多謝大家。星期四同大家講金。

至於李嘉誠增持之後嘅股價變動，未有時間慢慢整，下次整，反正成日都會有In KS We Trust呢個環節。但一句：KS對股東真係算係咁，你跟佢買冇乜死錯人。

你諗下香港千幾兩千間上市公司，KS以外，真係有幾多間做得到，同股東一齊成長一齊發達？港交所勉強係，但專業管理（我唔係指個管理水平，係指佢唔係玩家族生意），加埋騰訊（但歷史唔算太長，雖然夠你發達），長江基建（咪又係KS），或者煤氣。真係冇幾多隻。搵小股東笨嘅？大把。

抖音攬炒微軟？應該都係會傾掂數嘅

舊文都寫過下，在FAAMG當中，微軟Microsoft係一間幾特別嘅公司。舊文主要講佢同政府似乎幾好關係（美國，但其實佢地同中國政府都幾好關係！呢啲咪功力）。

上星期都有朋友買咗Microsoft，主要因為應該會買起抖音母公司Tik Tok某啲業務。Microsoft當日都只係高開5%，我覺得呢個bet冇乜得點輸，就算單嘢買唔掂，都只係打回原型，而冇抖音嘅Microsoft依然係間好好嘅公司。

之後Microsoft股價近日都幾差，固然近日科技股股價都差，但亦有傳呢單刁可能傾唔成。話成事機會少過20%之類。原因？都係價錢。抖音嗰邊覺得太過平。

呢個就真係典型嘅Ultimatum Game（有機會細解）：理論上，抖音美國唔賣就等人封，乜都冇得剩。所以賤價都好過冇，拎少少離場就算。但實際上，除咗面子問題（Ultimatum Game實驗啲友都係寧願一拍兩散），仲有其他考慮。可能侵侵改變主意呢（佢大把前科），可能佢選唔到就解禁呢？或者我賣畀第個都得。

但我傾向覺得，成事機會大。首先，賣到一舊畀微軟，可以令抖音剩低嘅嘢叫到高價。微軟都買，仲唔係好嘢？第二，其實仲有咩其他買家？Facebook買都幾難過反壟斷，已經有Instagram，抄上抄咩。而Twitter？咪玩啦，邊有錢。第三，其實都係價錢問題，但只要傾得掂數，點都係微軟有著數。冇仙甩治？咪玩啦，邊使仙甩治。就算冇，遲下再賣畀人又得，到中美關係好返（你又知唔會？），賣返畀大陸佬亦得。

所以我都叫朋友照樣渣住。

買車位不如買舖位

是日新聞，我是認真的。常識諗下，銅鑼灣怡和街嘅舖，點都值錢過車位掛？100萬真係車位都未必買到，電單車位可以諗下。

但有100萬你可以買間舖。唔係劏場（唔算掛）喎，銅鑼灣地帶喎。如果有讀者有錢，即係幾千萬身家嘅，真係可以諗下。

「疫情唔知幾時先過喎」—就梗係因為咁先有得平啦。到你知幾時過仲有咁嘅價？永遠投資都係咁矛盾，冇事冇幹點會有人太平賣畀你？梗係風聲鶴淚先有機會，亦係你最驚嗰時。例如3月嘅股市，真係嚇到你傻，之後亦升到你傻。所以應該真係要精神分裂先做到投資大師。

「車位至少可以租出去喎，你而家買個舖真係零收入」—可能係，但，upside呢？如果疫情過去呢？你個車位可以收多幾多租？呢個舖原本700萬。你諗下，未年N年，舖位升返去700萬機會大，定個同等價錢嘅車位升到700萬機會大？

一仔狂升，但，東方都升？

我就真係醉了。

唔講政治，即係一仔狂升搞邊科，我都唔知。但至少我可以想像或理解。但其他咩媒體股都炒埋一份，我就真係黑人問號了。

固然事後好多人都可以搵啲嘢解釋—傳媒最鍾意打畀分析員問。但亦不怪佢地，因為讀者想知。人就係要問「點解」嘅動物。

一仔升，我理解。其他升乜春？有人話更多人出錢出力支持黃色傳媒，可能。我當你解得通毛記葵涌升，我畀你當埋有線係（明明話染紅咗）。但，東方呢？

你問我啦喎，咪玩啦。最多可能你訂閱制養住一仔，但其他呢？我嚟緊會講（永遠係題目好多時間好少），Facebook Page Patreon之類，搶走晒啲Content Creator，媒體仲點做？你可以睇下沈旭暉游清源之類（唔好講蕭生咁屈機），Patreon一個月拎緊幾錢，你邊間媒體出到咁嘅錢？

又，讀者專享，唔好貼出街。我在公司寫嘅內部報告，真係年頭（天地良心，有原稿為證）叫買一仔—問題係，哈哈，出完後跌咗六成—然後上個月我地中期檢討時就抽走咗了（所以冇得認叻）。然後嘅事大家都知。事實我當然估唔到今年咁多嘢，但我冇估錯嘅係，一仔訂閱制算成功，業績虧損亦都收返窄，可惜都係跌六成—然後呢兩日先咁升法。點估到丫。