畢菲特巴郡最大收購係-自己。UBER外賣收入多過打車，但收入倒退，十年首次 (Patreon)

［要贏人先要贏自己］股神畢菲特第二季最大收購係：自己公司

UBER外賣收入多過叫車，但收入十年嚟第一次跌

版務：介紹返，今次我會寫得比較長，同埋你見多external link 或者我回帶舊文。你見到我儲住堆舊文，係對讀者好有幫助的。亦唔使所有嘢由頭解一次。因為考慮到唔少人之前冇睇過舊嘅收費專欄，將來就會寫短啲。都係預千幾兩千字一篇

呢篇係第二篇sample，之前仲有一篇係港股。啱睇嘅咪幫襯下，打後就冇免費文了。

［要贏人先要贏自己］股神畢菲特第二季最大收購係：自己公司

好，首先係萬眾期待嘅，股神畢菲特嘅巴郡業績。中文嘅睇呢度，英文嘅睇呢度。簡單嚟講，麻麻地咯。

有興趣嘅，可以睇返我寫，上次業績巴郡輸咗50億美金。但今年頭3個月咁嘅市，人人都輸錢輸到喊。正如畢菲特自己講，呢個唔係太好嘅量度。咁所以，記住今次都唔好用呢個量度，唔好輸打贏嘛。

另外可以睇返，上次股東會佢講過乜。其實都係例牌嘢，冇特別，但亦乜大錯，「最錯就係股價跑輸大市」。買完航空股冇耐又沽，畀人質疑，但亦未必係大錯，你睇而家啲航空股有冇前途？上次佢叫你唔好睇淡美國（中！），唔好借錢買股票（埃汾幾時都咁講）。但最重要大家都係關心，坐住咁多錢做乜，做乜唔回購，又唔派息（呢個易理解，因為稅務），同會唔會重組，拆骨之類。

簡單嚟講，呢種綜合式企業，Holding Company嘅旗艦玩法，仲係咪合時宜？我諗起孫正義嘅軟庫（Softbank）

睇返，市場唔呃人，以上係巴郡股價表現（＊）。年初至今要跌7%，而標普指數係升嘅。跑輸大市近10%，但其實唔算好離譜，近期表現不錯。

點解？就係因為回購啦！

對，你見啲媒體報導，都以回購為重點。至於佢咩盈利反彈嗰啲，鬼唔知咩，個市彈返佢啲嘢咪彈。況且上次（其實次次都係）股神話唔好留意呢啲嘛。

其實個玩法，就係好似軟庫咁。你見真係爛船有三斤釘，都有人提過，巴郡渣咗好多蘋果，咁今年蘋果股價相當勁。巴郡嘅蘋果成本價差不多係140蚊（早幾年買落），而家蘋果440蚊，幾年執三倍，又唔好話股神一無是處。況且，仲要係買好多的，應該佔佢投資組合近4成。

咁所以，同軟庫一樣，你見股價對資產折讓都幾大。但呢啲投資旗艦實係咁。最好做法係乜？都係回購。畢菲特其實5月股東會先講做大刁，所以唔回購住，但唔見有吸引嘅嘢（最後做咗單細刁，下面講）。結果第二季其實做過乜？就係回購！仲要係股東會係冇耐就做，總共回購咗51億美金股份，近年單季最高，之前最高係22億。雖然同分析員預期（53億）比都仲爭少少，人人都估到佢回購，其實應該係有紀錄睇到的。正路，會繼續令個股價跑返出嚟，睇下會唔會追得返指數。

股神打倒昨日之我？我覺得係好的。好過死牛一面頸，CEO係為股東謀最大福利，唔係為自己嘅ego。我覺得股神見到根本冇平貨執，「至平就自己」，咪回購。最好笑係，做完呢個史上最大回購，巴郡手頭嘅現金又再創歷史新高。好有Bill Gates 不停捐錢但都仲係越嚟越多錢嘅黑色幽默。

呢個玩法同軟庫係一樣，有機會過兩日我寫軟庫，因為出業績。雖則有啲投資損手，但軟庫股價今年極好—原因？咪又係因為博命回購。事實上，利息咁低，有錢嘅固然回購（唔通放銀行？），冇錢嘅借都借返嚟啦，咁平息。呢點講過幾次，仲會再講。你可以睇下蘋果，亞馬遜同Google 早排都發債的。冇錢咩？大把錢。

所以，其實亦可以明白點解股神一路唔做嘢。大家諗真啲，佢係生長在一個十幾廿厘息嘅年代，好可能對而家聯儲局扭曲晒資產價格嘅情況，都覺得十分困惑。

另外，上次股東會後，7月頭巴郡做過單收購，但畀人感覺就係：吓？咁咋？搞咁耐你就係咁？本人亦有寫過。另外就係增持美國銀行，都畀人質疑，但至少近期股價表現係OK的。

（＊）留意巴郡有A股B股，就同太古A太古B或者Google Class A Class C唔同。巴郡A股B股，投票權一樣（當然係計同等錢，唔係一股A同於一股B），分別主要係價錢。A股30萬美金一股，好多人成副身家。B股兩舊水，經濟實惠。留意，你渣A股嘅可以轉B股，即係拎住30萬美金一股想沽少少嘅，可以。但掉轉拎B股拎幾多都唔可以轉B股。咁應該買邊隻？有錢就梗係買A股，型啲，反正可以轉。冇咪B股。實務上你見股價基本上一樣咁行。

UBER外賣收入多過叫車，但收入十年嚟第一次跌

一向唔係好鍾意UBER呢間公司，有段好長嘅時間我甚至好懷疑成套business model唔會work，亦都唔鍾意呢間公司嘅公關手法。不過佢地唔少嘢做得好好，例如，揀上市時機，真係一流。佢遲一兩年上，可能都唔使上。真係捉到大家都仲信燒錢搶市場份額嘅年代，快手上市，仲要拎咗舊大錢，而家慢慢玩。

UBER叫車業務無數咁多人講過亦用過，我都用過。幾時我都話個問題係：技術門檻冇你想像中咁高（Lyft，滴滴，GRAB係咁玩），而客戶同司機忠誠度等於零。邊間平10蚊我咪坐邊間，只係燒錢遊戲。

不過，UBER叫車業務在個別市場失利（有時因為政府，例如香港，有時唔夠人地鬥，例如東南亞同大陸），但好成功咁搞咗個UBEREAT。雖則一樣技術門檻唔係好高，但都算係快手同執行得好（但利申：我從來唔用外賣app）

今次UBER嘅業績，兩樣嘢好特別。第一就係送外賣嘅收入，超過打車嘅收入。第二？就係10年以嚟第一次收入倒退。結果？你睇個股價咪知市場覺得點

然後你諗真啲，外賣收入多過打車，其實唔係外賣好好景（但收入係升嘅，只係蝕錢），只係打車更大鑊。舊文寫過，疫情下啲友工又唔返，有啲餐廳都冇開或執埋，出錢請步兵又貴，其實唔好以為送外賣生意好著數。

結果就係，公司嘅收入倒退三成，十年以嚟第一次倒退，令人擔心公司嘅增長故事係咪玩完。不過你見股價雖則跌，但唔係瀉，大家都仲疑中留情。畢竟咁嘅環境下，收入倒退好正常。賺錢？邊有賺過錢，梗係蝕得多咗。不過公司依然認為下年可以做到「調整後盈利」正數。咩調整呢？就好大空間出術了。以前就EBITDA，而家有EBITDAC – Earnings before interest, tax, depreciation, amortization and corona virus

科技人好多都好憎我，固然係因為我唔識科技，但更主要係因為我最鍾意掃興：點賺錢？講講下往往佢地就講出真心話：佢地改變世界，不屑賺錢呢啲咁庸俗嘅嘢。哦，咁好丫，唔好上市。上市公司是甚麼東西呢，可？邊個係老細？

Economist 就有文質疑過，Can Uber ever make money?　（好似一個月有幾篇免費的）。睇免費嘅，Guardian 都有。永世唔賺錢嘅公司，價值係幾多？CFA Level II 一定識答（其實level I都識）（其實正常人都知）

不過，亦可能太早write off UBER．記住埃汾成日講嘅故事：你唔使跑得快過隻熊，你跑得快過你側邊嗰個就得。UBER其中一間最大對手，LYFT，今年股價更加跌到七彩。原因？因為LYFT只做美國，同埋冇做外賣。LYFT死先嘅，對UBER實好大幫助。

無論如何，以前UBER仲有啲咩無人車呀，直升機呀乜鬼嘅無聊嘢，今次絶口不提。但外賣業務就真係命根，又睇下點。會唔會疫情下人人習慣咗叫外賣，返唔到轉頭？不過，我都仲係一次外賣app都冇用過。全日困在屋企或Office，人都癲。