8號仔大龍鳳，長實減派息，長江基建可靠，TVB盈警 (Patreon)

  8號仔大龍鳳：賣走Now，李澤楷增持，必有後著

長實1113減派息，擺明係留子彈收購，股價跌得冇道理

長江基建1038，23年冇減過派息，唔會想打爛齋砵吧

TVB 511又出盈警，未咁快死得，但真係諗下計

版務：介紹返，今次我會寫得比較長，同埋你見多external link 或者我回帶舊文。你見到我儲住堆舊文，係對讀者好有幫助的。亦唔使所有嘢由頭解一次。因為考慮到唔少人之前冇睇過舊嘅收費專欄，將來就會寫短啲。都係預千幾兩千字一篇

呢篇係第一篇sample，之後仲會有一篇係美股。啱睇嘅咪幫襯下，打後就冇免費文了。

先講我地最關心嘅，in KS We Trust，三為一體嘅李嘉誠李澤鉅李澤楷。呀，如果睇字睇得悶，可以睇我在homeblogger嘅片，呢段免費的。

8號仔大龍鳳：賣走Now，李澤楷增持，必有後著

一匹布咁長，不如先講最吸引，細仔先，講8號仔電訊盈科，同埋6823香港電訊。業績其實我未細睇，亦未得閒，但最重要都唔係呢樣。

8號仔，升乜鬼？斷估唔係因為業績好。雖則股價係幾平，我以前推介過下，但四十幾五十嘅人一聽8號仔就講粗口，年紀輕嘅讀者，可以考古。但我覺得極無謂，正如我在「匯控如辰衝」一文中講，你仲當匯控係你三十年前嗰間公司咩。正如8號仔都唔係幾十年前嗰間嘢

不過，冇變嘅一樣嘢係，李家三父子，其實一直只有一個業務：就係做刁。真的，我初做金融時，有位朋友同我飲茶，講起佢地三父子，佢嘅評價就係：佢三仔爺係一X樣的（當然佢唔係講個X字，又，佢係呢度讀者）。你睇佢地每幾年就搞一壇咁嘅大龍鳳，對上當然係2015年長和系重組。

今次玩嘅嘢，兩樣重點。第一，8號仔將NOW台賣畀6823，同時可能分拆OTT（over the top）業務上市。咁你話對邊個有so？睇股價咪知，況且now 台蝕錢嘛，感覺6823股東好似食死貓了，但當然關聯交易仲要舉手（好似要）

第二，仲緊要，李澤楷想增持8號仔，高溢價添。因為佢而家渣28.9%，想渣到上30.9%，超過咗30%呢個水平，就要做一個咁嘅要約。實務上大約係你會收到信，肯畀佢嘅佢咪畀返錢你，溢價。收足咪掂，收唔足咪唔掂。但如果收得捉，佢就應該唔使做全購。

總結一下，首先幫8號仔淨身，踢走蝕錢嘅NOW。之後增持。咁，想點呢？有人估話之後注資產入嚟，話將FWD富衞（保險）放入嚟，我覺得唔似，富衞根本自己上市都得。

無論如何，記住，佢三仔爺是一樣的。冇錯，股價升咗9%，但李澤楷搞咁多嘢，會唔會只係為執9%？應該大把後著。但唔好要我估，我地凡人好難去估。細心欣賞就得。當然可以買埋入場券睇。

長實1113減派息，擺明係留子彈收購，股價跌得冇道理

首先，唔識分長和（1）長實（1113）嘅，冇問題，睇舊文。

講完細仔，講老豆（其實係大哥）。其實威喎，細仔搶晒風頭。但，講返長實（1113），就絶對唔靚仔了。股價跌7%，原因？因為減咗派息，少咗三成。

首先，學院派話你知，其實派唔派息，唔應該點影響股價。甚至可以違反你常識地講：應該唔派息仲好。請循其本，買股票是甚麼？係你將舊錢買人地公司，咁你當然覺得100萬去參加人地公司，好過自己搞，因為人地用得叻過你　—咁點解你想要派息？

不過現實啲講，長實係咪派唔到息？當然唔係。李澤鉅講到開口：留彈藥等收購。咁你都仲唔明？根本係利好消息！

又係睇歷史時間。無數咁多次危機都話你知，每次危機都係財富再分配，富者越富。潮退咪知邊個冇著泳褲（例如信和同新世界，不過上次潮退後著返好大條褲了）。而李氏出名係著褲時間好準。唔止，仲趁你冇褲著時迫你買添。

講白啲，可能有啲無良，但李氏父子，最叻係趁人病攞人命，無數咁多例子，你可以慢慢Google．比較出名嘅有世紀供股，一供完就87股災，佢有錢買平嘢。另外，高價賣橙畀德國人。仲有，中環中心，你睇下而家幾錢尺？當然仲有，胡仙，新一代知唔知咩係虎豹別墅？而家變咗長實樓盤。多不勝數。

長江基建1038，23年冇減過派息，唔會想打爛齋砵吧

最最最後，長江基建（1038），呢隻嘢業務當然麻麻，留意賺少一半（又，做乜唔使出盈警？），但重點係，派息不變。

美股有個term，叫做股息貴族，Dividend Aristocrat，甚至有ETF買。貴族係乜？落難都冇事先係貴族。美股就指嗰啲25年冇減過派息嘅公司。點解咁長？因為順境個個都係天才，過去十年其實都係順境，你十年要keep到唔減派息，唔難。所以要睇至少一個下行週期，甚至兩個。2008已打沉好多公司，死唔去就算啦，仲講派息仲要唔減？九成以上都保唔住派息。

真的，再回帶，你個個望住個股票機，睇幾多厘息就買股票，未免太容易。匯控8厘息下話？你拎到先係。派息永遠係不明朗。

但始終，有啲公司個往績係好啲，佢地可能順境時都唔派咁盡，就係積穀防饑，想逆境時都派得到。過去表現未必等於將來，但都係一個參考，邊啲公司有好嘅track record？

長江基建就係一間咁嘅公司。佢地嘅年報，呀澤鉅大大個頭寫呢句嘢，23年冇減過派息，其實係年年加。當然冇人保證下年都會，但至少你睇到公司係重視呢樣嘢。我估，真係借錢都借到派畀你，反正借錢平。

真的，由1996年開始，公司年年加派息，可能有讀者都未出世。又，我好鍾意呢個圖，十足十我用Excel整嘅咁。

呀最後，賣少少廣告。其實我在Homeblogger段收費短片，有講仲有邊啲香港公司keep到咁多年唔減派息，我用咗20年去睇。真係千幾二千間，揀剩幾間。片中仲有講近期金價呀，點買金呀之類。有興趣可以去買，搞唔掂搵我。冇興趣亦唔使勉強，反正大家呢度都畀咗訂閱費，對得我住有突。

TVB 511又出盈警，未咁快死得，但真係諗下計

人人得以誅之嘅TVB（511），又出盈警。中期蝕2億9，舊年中期賺2億1。主要當然係廣告弱，話跌咗7成，咁固然同疫情有關，但當然亦唔多唔少因為有啲公司唔肯落廣告。

本人一般少講政治，只講事實。不過事實就真係幾大鑊。其實上次業績（3月尾之嘛）已寫過篇文，有啲長。但最重要係，TVB舊年下半年，已經蝕5億啦！嗰次都未死，今次都唔會死。不過上次下半年原本以為kitchen sinking （所有大鑊嘢一次爆），佢連啲咩星美債券減值都放晒入去。點知今次仲係差，因為今次連本業都唔掂。上次下半年唔計星美堆嘢，即係只計核心業務，TVB只係蝕1億8，但今次蝕2億9，大唔大鑊？都大大地。固然，公司應該仲有50億Book，負債又唔多，玩多幾年應冇問題。但時間過得好快架，要諗下點搞。點搞？我都唔知點搞。

呀同時，其實行業係咪真係咁差？未必。可能主要都係TVB問題，因為你可以睇返電訊盈科8號仔嘅業績。你睇EBITDA，NOW台係跌，但半年計好似都冇咁誇。計免費電視，直頭虧損收窄添　—　當然8號仔成堆嘢綁埋一齊，最盡只係去到EBITDA，而我基本上肯定，NOW台獨立計，當然都係蝕錢。之前都講咗，李澤楷會將NOW台左手交右手了.