英國新聞 紹斯波特刀刺襲擊事件引發騷亂 倫敦、曼徹斯特、哈特爾浦均有人被捕 1-8-2024 (Patreon)

紹斯波特（Southport）持刀襲擊事件，造成三名女童死亡後，相關嘅示威活動蔓延到全國各地，目前已經有幾十人被捕。喺星期三晚，響倫敦市中心，警察同示威者喺接近唐寧街 (Downing Street) 嘅Whitehall發生衝突，目前警方已經逮捕咗超過100人。英格蘭東北部地區哈特爾浦 (Hartlepool ) 亦爆發咗騷亂，有八人被捕，另外有多名警官受傷，仲有一架警車被縱火焚燒。

首相施紀賢將會喺星期四會見警方高層，向佢哋表達面對持續動盪不安時嘅「全力支持」。喺倫敦，示威者向唐寧街大門同丘吉爾嘅雕像投擲照明彈。人哋高喊「停止(偷渡入英國嘅)船隻」同「救救我哋嘅小朋友」等口號，並向警方投擲玻璃樽同鐵罐。

倫敦警察表示，星期三晚佢哋逮捕咗涉嫌暴力騷亂、襲擊傷人同違反示威條件等非法行為嘅人。喺一份聲明中，佢哋表示警察嘅部署確保騷亂得到控制，但補充話有啲警員都受咗輕傷。

英國克利夫蘭 (Cleveland) 警方表示，哈特爾浦嘅暴力事件亦都導致有幾名警員受傷。喺示威者向警察投擲玻樽同雞蛋，仲有一架警車被縱火焚燒之後，有八個人因為擾亂公眾秩序罪被捕。克利夫蘭警察局長大衛 · 蘇特蘭表示：「目前我哋認為呢次抗議係同本週早啲喺紹斯波特嘅事件有關。預計喺接下來嘅幾日會有更多逮捕行動。」

奧爾德肖特同曼徹斯特亦發生咗騷亂同恐嚇，兩名男子因為暴力騷亂同襲擊應急工作人員而喺曼徹斯特被捕。大曼徹斯特警方表示，牛頓希思地區 (Newton Health) 嘅示威者喺向警察同公眾投擲物品之後被警方驅散。而喺奧爾德肖特，當地國會議員亞歷克斯 · 貝克表示，一場和平抗議演變成暴力行為。佢話︰「呢一件事因為外來人士決心製造不安而加劇，我哋都支持和平抗議嘅共同權利，但我哋唔會容忍嚟我哋城鎮嘅人存心挑起事端同分裂我哋嘅社區。」

星期三嘅騷亂都係緊接住星期二晚上喺紹斯波特一座清真寺附近嘅動亂，清真寺受到破壞，馬西塞特郡警方嘅警員亦遭到磚塊投擲，仲有警車被縱火焚燒。

首相施紀賢將會喺星期四喺唐寧街接見警察高層。唐寧街十號表發聲明，今次會議旨在喺暴力同公眾騷亂事件之後，向警方提供政府嘅全力支持。首相將會提及，本週紹斯波特發生嘅令人震驚嘅事件提醒我哋，緊急工作人員嘅勇氣以及佢哋為咗保護公眾安全所做嘅重要工作。雖然和平抗議嘅權利必須不惜一切代價予以保護，但佢會明確表示，嗰啲利用呢一個權利嚟播種仇恨同進行暴力行為嘅犯罪分子將會面臨法律嘅嚴懲。」

呢次騷亂發生喺星期一朝早嘅紹斯波特持刀殺人事件之後，事件中貝貝 · 金 (Bebe King)、7歲嘅艾茜 · 多特 · 史丹高姆 (Elsie Dot Stancombe) 以及9歲嘅愛麗絲 · 達施華 · 阿吉亞爾 (Alice Dasilva Aguiar) 三名女童不幸離世，另外八名兒童受到刀傷，其中五人情況仍然危急，同時兩名成年人亦受到重傷。

星期四清晨，馬西賽特警方指控一名17歲少年三項謀殺罪同十項企圖謀殺罪。由於法律原因，呢名少年無法透露姓名，佢將於星期四喺利物浦市地方法院出庭。