英國新聞 英國全科家庭醫生(GP)投票 決定採取60年來以來首次集體工業行動 1-8-2024 (Patreon)

英國全科家庭醫生（ 即係一般我哋簡稱嘅GP ）投票決定採取60年來嘅首次工業行動。呢個係喺醫生佢哋長期以來嘅不滿情緒達到最高點之後做出嚟嘅決定，佢哋對工作量增加、資源不足同薪酬待遇感到不滿。今次投票由英國醫學會（ BMA ）主導，結果顯示，絕大多數成員支持進一步工業行動，呢個可能包括罷工、按章工作或者其他形式嘅行動。喺參與投票嘅超過八千五百醫生當中，有超過百份之九十八嘅醫生投票贊成呢個行動。

BMA 表示，今次投票結果反映咗英國全科家庭醫生對目前工作條件嘅不滿同對改善醫療服務嘅強烈願望。佢哋強調，呢一個行動並唔係針對病人，而係為咗引起政府同社會對當前醫療系統問題嘅重視，令佢哋作出必要嘅改變。

全科家庭醫生嘅訴求包括減少工作量、提高薪酬、增加資源投入以及改善工作環境。佢哋希望透過呢次集體行動，引起各界對醫療行業挑戰嘅關注，並促進政府採取措施解決呢啲問題。

呢個係自1960年代以來，全科家庭醫生首次集體投票決定採取行動，顯示出醫生哋對目前情況嘅強烈不滿同迫切希望改善嘅決心。隨住醫療服務需求嘅不斷增加，全科家庭醫生呼籲各方共同努力，確保醫療系統嘅可持續發展同患者嘅健康福祉。上次全科家庭醫生有工業行動係喺1964年，當時家庭醫生向威爾遜政府提交咗未注明日期嘅辭職信。呢個導致咗包括1965年《家庭醫生憲章》喺內嘅改革。

衛生部長曾經敦促全科醫生唔好用工業行動懲罰病人。不過， BMA 表示，好多行動將會令全科醫生能夠花更多時間同病人相處，同時展示出問題係點樣由「 NHS 更廣泛嘅系統、國家管理不善同官僚主義」所產生嘅。BMA 嘅全科家庭醫生委員會主席姬蒂醫生 (Doctor Katie Bramall-Stainer))表示：「我哋認為呢次投票嘅反應，結果好明顯 —— 全科家庭醫生已經到咗忍無可忍嘅地步。呢個係一種絕望嘅行為。 長期以來，我哋提供唔到我哋想要嘅護理比病人，我哋都目睹咗普通科醫療係點樣崩潰，我哋嘅病人因此而受苦。」