英國新聞 前BBC名主播愛華士 承認三項制作兒童色情圖片罪名 31-7-2024 (Patreon)

前 BBC 最高級嘅新聞主播嘅胡．愛華士承認咗三項制作兒童不雅色情圖片罪名，包括擁有41張兒童色情圖片，呢啲圖片係由另一名男子透過 WhatsApp 發送比佢嘅。呢啲圖片入面仲包括七張最嚴重嘅A 類兒童色情圖片。

直到舊年，愛華士仲係 BBC One 《十點新聞》嘅主要主持人之一，並經常主持重大國家事件嘅報導。佢喺舊年十一月被捕，上個月被起訴，將於9月16日被判刑，到時會呈上一份緩刑報告。

喺星期三去法院出席聆訊同離開嘅時候，愛華士都係由警察護送，但係依然係被記者包圍。佢喺法庭外面冇乜表情，而聆訊唔夠半個鐘就結束。根據法庭上嘅資料，由二零二零年12月開始，愛華士就同一名成年男子喺 WhatsApp 上進行網上聊天，該名男子向佢發送咗三百七十七張色情圖片，當中41張係兒童淫穢圖片。而愛華士除咗擁有七張 A 類圖片之外，佢仲擁有12張 B 類圖片同22張 C 類圖片。證供又提到，二零二一年二月二號，另一名男子曾經詢問佢所發送嘅圖片係咪過於年幼，愛華士就要求佢唔好發送未成年人嘅色情圖片。而最後一張兒童不雅圖片係喺二零二一年八月發送嘅，係 一段涉及一名男仔嘅 A 類影片。發送影片嘅男子話比愛華士聽，佢心頭上仲有更多呢類圖片可以比佢，愛華士就拒絕，並要求呢名男子唔好發送任何唔合法嘅圖片。之後愛華士就再冇收到非法圖片，但兩人就繼續交換合法嘅色情圖片，一直到二零二二年四月。

根據英家皇家檢察署，製作淫穢圖片喺法律入面可以有廣泛嘅定義，包括透過社交媒體接收佢哋。愛華士嘅辯護律師向法庭表示：「喺本案中冇跡象表明愛華士先生以傳統意義上嘅任何方式製作任何圖片。」佢補充話，愛華士冇保留任何圖片，亦冇發送比其他人，亦冇從其他地方尋求類似嘅圖片。佢嘅當事人經歷咗「精神同身體」健康問題，而且「唔單止品行端正，直頭係品行卓越」。

自從舊年7月之後，愛華士就冇上過電視。今年4月，佢因為健康原因喺 BBC 辭職。倫敦警察表示，今次官司嘅指控同舊年被廣泛報導同調查嘅其他醜聞無關。