英國新聞 原本開心上舞蹈班瞬間成煉獄 Taylor Swift發文悼念 內政大臣顧綺慧現場獻花 30-7-2024 (Patreon)

我哋先為大家跟進一下紹斯波特（Southport）刀刺襲擊事件造成兩名兒童死亡嘅最新消息。尋日朝早喺紹斯波特舉辦嘅一場以Taylor Swift為主題嘅舞蹈同瑜伽活動中，一名凶徒持刀闖入，兩名小朋友死亡，另外九名兒童受傷，當中六人情況危急。亦有兩名成年人相信因為保護小朋友而身受重傷。警察拘捕咗一名17歲男子並繳獲咗一把刀，佢哋表示今次嘅事件同恐怖襲擊無關。警方相信，當時一班小朋友正喺度參加緊一間舞蹈學校嘅活動，呢個時候一名持刀者走入建築物並襲擊咗入面嘅人。警方認為，有兩名成年人喺「英勇」地保護兒童時身受重傷。西北救護服務（ NWAS ）表示，佢哋已經治療咗11名刀傷患者。

呢個活動喺哈特街嘅 Hart Space 社區中心舉行，咁啱因為暑假而舉行一連串暑期活動，包括舞蹈同瑜伽教學以及手鏈製作，目標對象係小學二至六年級嘅兒童，活動係全部爆滿，有二十五名小朋友參加咗今次嘅舞蹈同瑜伽工作坊。據 BBC 得嚟嘅消息，35歲嘅 Leanne Lucas 喺度運營呢個暑期活動班，亦即係英國人稱為嘅Holiday Club，但目前呢面負責人嘅情況仲未清楚，佢嘅社交媒體上湧入咗大量向佢致敬同讚揚佢嘅勇氣嘅留言。喺現場，警戒線旁邊擺放住鮮花同玩具熊仲有悼念嘅紙條。

紹斯波特嘅工黨議員 Patrick Hurley 話表示當地社區非常震驚同悲痛，喺星期二夜晚當地舉行悼念活動。一個名為「 Swifties for Southport 」嘅 Just Giving 頁面已經籌集咗近三萬英鎊嘅捐款。

馬西塞特郡警方確認，武裝警察喺事件後「拘留咗一名十七歲男子並繳獲咗一把刀」，暫時未有證據顯示當地仲有其他威脅，警方隨後表示，一名蘭開夏郡村莊班克士 Banks 嘅17歲青年因涉嫌謀殺被捕，疑犯原籍係卡迪夫。警方將會向佢詢問事件細節，同埋確定佢襲擊嘅動機。

一名目擊者話，佢哋認為襲擊者係戴住口罩乘坐的士抵達現場，連的士錢都冇比到。另一名目擊者呢個係佢「一生中見過最唔好嘅事」。多名目擊者話，見到幾個年幼嘅小朋友喺路因為被刀刺傷咗而流血，而警方接到報警後大約20分鐘抵達現場。佢見到一名嚴重受傷嘅女仔被抬上擔架，並話「呢個太可怕喇，佢從來都冇見過咁嘅場面」。一名女子沿住街道狂跑，一邊尖叫「我個女被刺傷咗」。另外有途人將大約10個女仔帶到附近嘅一間屋入面避難。一位當地嘅治療護士話，佢同一名受害者嘅母親交談時，對方表示佢自己嘅女喺襲擊發生時聽到咗一聲「陰森嘅尖叫」。

Taylor Swift星期二喺佢嘅 Instagram story上發文，話呢次襲擊嘅恐怖「連續不斷衝擊住佢」，佢非常震驚，呢啲只係參加舞蹈班嘅小朋友，佢完全唔知應該點樣向呢啲家庭表達同情。英皇查理斯三世喺星期一晚喺X上面表示，佢同王后「深感震驚」，佢哋向所有受「可怕襲擊」影響嘅人表示「誠摯嘅哀悼、祈禱同最深切嘅同情」。威爾斯親王同王妃亦向受害者表示：「作為父母，我哋想像唔到今日遇害同受傷者嘅家人、朋友同親人正經歷緊啲咩。」

內政大臣顧綺慧亦於星期二訪問紹斯波特，並響現場獻上鮮花悼念，而首相施紀賢就話呢件事「真係太可怕」。