英國新聞 紹斯波特刀刺襲擊事件再有一名女童死亡 當地爆發反伊斯蘭示威 警方︰右翼份子刻意誤傳凶手訊息煽動 30-7-2024 (Patreon)

我哋跟進一下紹斯波特（Southport）刀刺襲擊事件嘅最新消息。今日朝早，再有一名九歲嘅小朋友喺醫傷重不治，令到呢件襲擊事件嘅死亡人數增加至三個人。另外，由於網上流傳話凶手係一名嚟咗英國只係一年嘅伊斯蘭難民，令到有右翼份子騎劫呢次慘案，響紹斯波特發動示威，最後演變成騷亂，有警車喺騷亂中被燃燒著火。

馬西塞特郡警方已經公佈咗三名遇害女童嘅資料，佢哋分別係6歲嘅貝貝 · 金 (Bebe King)、7歲嘅艾茜 · 多特 · 史丹高姆 (Elsie Dot Stancombe) 以及9歲嘅愛麗絲 · 達施華 · 阿吉亞爾 (Alice Dasilva Aguiar)。喺警方分享嘅聲明中，貝貝 · 金嘅家人表示：「冇言語可以形容我哋成家喺失去我哋嘅寶貝女貝貝時所遭受嘅打擊。」愛麗絲 · 達施華 · 阿吉亞爾嘅家人就話希望愛麗絲可以喺天國繼續笑同跳舞啦，就好似佢生前一直鍾意做嘅事咁，佢永遠係家人嘅小公主。

而家仲有五名兒童以及兩名成年人處於危殆狀態，佢哋仍然喺醫院留醫接受治療。

喺今晚紹斯波特舉行咗一場悼念活動，有超過一千人參加，去哀悼呢三位不幸嘅小朋友，但係響悼念活動結束後只係幾個鐘，距離悼念活動地點只有幾條街，靠近聖路加路上嘅一座清真寺爆發咗一場示威抗議，其後演變成騷亂，有一名警員喺大約騷亂中疑似被襲擊鼻骨骨折，又有好多架警車被縱火破壞。警方表示，今次抗議活動被認為涉及右翼份子英國防衛聯盟 (English Defence League) 嘅支持者，抗議地點距離悼念活動地點只有幾條街，靠近南港聖路加路上嘅一座清真寺。當時幾百名示威者聚集喺當地一座清真寺附近，並攻擊呢座清真寺嘅正面。佢哋投擲磚塊、玻璃樽、煙花同石頭，好多人戴住兜帽同圍巾去遮住自己塊臉。

馬西塞特郡警方表示：暴力事件背後是極右翼英國防衛聯盟，佢哋喺社交媒體上錯誤地暗示星期一嘅刺殺事件同伊斯蘭主義有關。警方發言人又話佢哋見到呢種情況發生喺一個啱啱喪失咗三名無辜兒童生命而受到悲劇打擊嘅社區內，真係令人覺得非常唔舒服。尋日，警員同其他緊急服務部門成員先至面對完佢哋所遇到過嘅最困難嘅情況之一。今晚，佢哋喺努力防止混亂嘅時候，就遭受到襲擊，而且今次示威之中涉及好多既唔住喺馬西塞特郡亦唔關心馬西塞特郡市民嘅人。警方又表示，有好多關於目前被拘留嘅17歲男性嘅身份猜測同假設，有啲人利用呢一點嚟喺街道上製造暴力同混亂，警方已經澄清過，被捕嘅人出世喺英國，而家嘅猜測對任何人都冇幫助。」