英國新聞 紹斯波特刀刺襲擊事件詳情：兩名兒童死亡，六人情況危殆 30-7-2024 (Patreon)

馬西塞特郡 (Merseyside) 警方表示，今朝喺利物浦市北部嘅紹斯波特（Southport）發生嘅刀刺襲擊事件中，有兩名兒童遇害，另外仲有九人受傷，另外仲有兩名勇敢地保護小朋友嘅成年人亦遭到刺傷，情況危殆。目前，確認疑犯已經被拘捕，一名17歲男性青年因為涉嫌謀殺同企圖謀殺被拘留，佢出生於威爾斯卡迪夫城，並且來自蘭開夏郡班克斯（ Banks )，佢遺留咗喺案發現場用黎行兇嘅刀亦已經被檢獲。

馬西塞特郡首席警官塞麗娜 · 肯尼迪（ Serena Kennedy ）表示九名受傷嘅兒童全部都係被刀刺傷，其中六人情況危殆，另外仲有兩名成年人亦情況危殆。佢哋相信，受傷嘅成年人喺襲擊發生時勇敢地保護呢啲小朋友。

警方喺今日朝早11點47分接到報告，稱紹斯波特嘅一個地址發生持刀襲擊事件。首席警官肯尼迪表示，當警員抵達現場時已經發現」有幾名兒童遭受到極殘忍嘅襲擊，身受重傷。佢補充話，呢啲小朋友當時正喺一間舞蹈學校參加Taylor Swift 嘅活動，當時持刀嘅襲擊者闖入校舍入面，開始攻擊小朋友。目前仲未清楚疑犯嘅動機，但呢件案同恐怖主義無關。

據天空新聞了解，刺傷事件發生喺默馬西塞特郡哈特街（ Hart Street ）一個名為 Hart Space 嘅社區中心，呢度經常用於母嬰課程。記者搵到嘅一張宣傳海報顯示，喺襲擊發生嘅時間，一個為小學二至六年級小朋友而設嘅「Taylor Swift 瑜伽與舞蹈工作坊」正喺社區中心舉行。首席警官肯尼迪表示，警員正為遇害同受傷兒童嘅家庭提供支持。

英格蘭西北救護服務（ North West Ambulance Service ）喺柴郡同馬西塞特郡嘅負責人大衛 · 基欽（ Dave Kitchin ）話，當醫護人員抵達時，佢哋見到嘅，係一個令人心碎嘅畫面。佢補充話，救護車同空中救護車將13名受害者送往奧爾德黑兒童醫院（ Alder Hey Children ' s Hospital ）、曼徹斯特兒童醫院（ Manchester Children ' s Hospital ）、安特里醫院（ Aintree Hospital ）、紹斯波特福姆比醫院（ Southport & Formby Hospital ）同奧姆斯柯克醫院（ Ormskirk Hospital ）。其中奧爾德黑兒童醫院當時已經宣布發生「重大事故」，表示其急症室非常繁忙，敦促家長應該只喺緊急情況下先將小朋友帶去急症室。同時，消防員亦趕到襲擊事件現場提供創傷護理，進行急救並搜索可能被捲入襲擊嘅其他人。

當地車房老闆詗林 · 帕里（ Colin Parry ）形容現場如同「恐怖電影」，仲話畀天空新聞知，佢嘅同事曾經抱住一個全身係血嘅小女孩，試圖救返佢嘅性命，佢補充話，其他鄰居、途人都幫手帶啲小朋友出嚟，其中一個小朋友被多次刺傷。果位小朋友情況非常危急，另一位鄰居喺地板上面照顧佢。佢又話呢個絕對係特登造成嘅傷害，凶手唔止一次，而係多次刺傷呢啲小朋友。嗰個人痴咗線。帕里先生又話事件發生之後，好多媽媽喺度尖叫，場面令人心酸。

另一位居民，賴恩 · 卡尼（ Ryan Carney ）話畀天空新聞知，佢嘅媽媽當時就喺附近，見到好多人全身都係血。佢媽媽聽到好多尖叫同哭泣聲，又見到警察或者救護人員抬緊幾個女仔嘅屍體出黎，救護人員本身哋着住白色衫，但係都血染紅晒。佢媽媽仲見到一個女人喺度尖叫，話佢個仔唔見咗，佢搵唔到佢個仔。最後警察畀果位媽媽進入警戒線，佢跑咗過去，然後只係聽到佢嘅尖叫同哭泣聲，話『嗰個係我嘅小朋友，嗰個係我嘅小朋友』，而佢個小朋友，就係喺嗰啲屍體入面。」

事後英皇同皇后發表聲明，表達佢哋嘅「深切哀悼」。威爾斯親王威廉王子同王妃都同樣發出聲明，話佢哋作為父母，根本無法想像今天在遇害和受傷者的家庭、朋友和親人經歷緊嘅痛苦。同時，首相施紀賢都表示，呢次襲擊「可怕而深具震撼性」，又感謝警方和急救服務人員，並向受影響的人致以問候。