體育新聞 英奧運速報！英國第三日奧運收獲六面獎牌！ 29-7-2024 (Patreon)

法國巴黎奧運第三日，英國隊總共拎多六面獎牌，令佢哋進佔獎牌榜第七名。

首先係英國隊喺馬術三項賽中贏得團體金牌，係佢哋今屆奧運嘅第一面金牌，亦都係自從馬術三項賽成為奧運項目以來，英國隊獲得嘅第六面金牌。呢個都係繼2021年東京奧運會之後英國隊連續兩屆奧運會喺呢個項目上面獲得金牌，佢哋嘅成員包括湯 · 麥伊雲 (Tom McEwen) 、蘿拉 · 高萊特 (Laura Collett) 同羅斯 · 甘特 (Ros Canter)。另外，蘿拉 · 高萊特響個人賽之中就奪得第三名，為英國增添一面銅牌。

男子越野單車項目，英國選手湯姆．比德曲（ Tom Pidcock）和東道主法國嘅維克托·科雷斯（Victor Koretzky）喺比賽後期於山林路段幾乎相撞，兩人車輪並行，但最終湯姆．比德曲領先衝過終點，繼2021年東京奧運會後再度奪得呢個項目嘅金牌。

湯．戴利（ Tom Daley ）同拍檔諾亞 · 威廉斯（ Noah Williams ）就喺男子10米雙人跳水決賽中表現出色，只係比屈機嘅中國雙人跳水組合練俊杰同楊昊擊敗，奪得銀牌。

另外，亞當 · 伯吉斯 (Adam Burgess) 喺男子單人獨木舟決賽之中獲得銀牌。呢面獎牌對亞當 . 伯吉斯嚟講係一次自我救贖，佢喺三年前嘅東京奧運會首次進入決賽，當時以僅僅零點一六秒之差排名第四，錯失獎牌。

游泳方面，馬修 · 理查士（ Matt Richards ）喺男子200米自由泳比賽中奪得奧運銀牌，只係以極微嘅零點零二秒之差錯失金牌，輸咗比羅馬尼亞天才大衛 · 波波維奇（David Popovici）。