Mr Gu 我的孤寒前男友 - 第二話：微軟還是極硬？ (Patreon)

第一話都有提及過，我哋雖然讀嘅學校水平相若，但原生家庭家境相差甚遠。👉🏻【按此】重溫第一話

不過佢讀書就冇我咁好，DSE考低過我幾分，最後亦入唔到佢當年嘅理想選科，去咗所謂冇咁好嘅大學讀書。Mr Gu同我唔同嘅係，佢從來唔需要自己交學費、賺取生活費，阿爸阿媽全部幫佢搞掂。而我整個大學嘅學費、宿費、生活費，基本上都係靠自己補習工作，以及攞咗幾個獎學金去賺取。全個大學生涯我為咗自給自足，我基本上冇任何假期，放學或者放假就會去幫人補習，賺得幾多得幾多。

喺咁嘅環境下，我對自己都非常慳家，應使則使，但有得慳嘅都會盡量慳。

讀書都要用到不同嘅工具，其中Microsoft Office當然就必不可少。咁唔怕同大家講，我由細到大因為冇乜錢，都係用翻版嘅😂🙏🏻 我阿媽有個好close好錫我嘅同事，成日都會幫手燒隻翻版碟俾我用，每次有乜嘢更新都會即刻再燒過一隻俾我🙏🏻

咁話說有一日，我發現我電腦入面嘅office又過咗期，如果購買就要幾百蚊，而我仲有一星期就要交功課。正常嚟講，如果我叫阿媽嘅同事幫手燒隻碟，應該都係等兩日，甚至一日。但係我突然醒起，較早前有一日喺Mr Gu屋企見到佢有阿爸阿媽買俾佢嘅正版office 軟件碟，而一隻碟係可以裝4部電腦，咁佢只有一部電腦，已經安裝好，隻碟基本上都係放喺度冇用。咁我就諗，不如問吓佢，可唔可以share 個software啲資料畀我裝？

當時我大概係咁問嘅：B你係咪有microsoft office嘅位多咗呀？如果你都裝唔晒四部電腦，可唔可以畀一個位我？如果你有用都唔緊要，我叫媽咪個同事燒隻碟俾我都得😘

咁佢就話可以，反正佢都冇用，然後好快就俾咗啲安裝嘅資訊我。如是者，平平安安咁樣過咗幾日。

點知幾日之後，Mr Gu突然同我講……冇錯，我相信大家都估到，就係話要我夾返 $200俾佢，因為我用咗佢嗰隻碟….

當時我真係覺得好意外，如果你係要收我錢嘅，我根本就唔會問佢要。而且我同佢一齊幾年，基本上冇叫佢幫過我啲乜嘢，連出街拎下野都冇，連一餐飯都冇請過我食…點解咁樣都要收我錢？🥹 $200我都要補習一個鐘先有，而佢嗰隻碟係父母買嘅，本身已經喺度一段日子，我用唔用都完全唔會損害到佢嘅利益，點解佢事後先至話要收我錢？如果係咁嘅，其實我叫阿媽嘅同事燒隻碟俾我就得啦🥹

我真係覺得非常之委屈同埋傷心，於是我非常好聲好氣咁樣，同佢講返上述嘅說話。然後得到嘅回應竟然係咁：

有問題嘅係我，用咗人哋嘅嘢竟然可以覺得唔洗夾返錢，好自私、好拜金。用人哋嘅嘢俾返錢只係應份，估唔到我係咁嘅人。

我真係：😨😨😨？

跟住我同Mr Gu講，點解你要咁樣同我計？😞 如果真係要計嘅，其實我平時成日幫你改、做大學嘅功課，仲幫你喺大學某啲course攞到A range （因為我英文同埋寫文章能力都好過佢好多），我一蚊都冇收過你😞 如果我真係同你計嘅，用我幫成年人補習嘅價錢去幫你做功課，我都可以收返你唔少錢😞 而家你因為 $200就咁樣同我計，仲要本來你係沒有額外cost，你用我嚟無本生利，我好傷心😞

Mr Gu竟然咁樣講：$200你都唔肯比返我，更加睇得出你係物質、貪錢，唔識做人。仲有，如果我要同你計，你平時嚟我屋企都食唔少嘢啦，嗰啲我都請咗你食，冇同你計。

佢所謂嘅去佢屋企食嘢，講緊係佢叫我去佢屋企，做愛做的事，一個禮拜大概一日左右😅 之後因為晚飯時間到，所以會叫工人姐姐煮一個公仔麵、煎一隻蛋同午餐肉俾我食……同埋有時，佢阿爸阿媽一個月會叫我去佢哋屋企一齊食晚飯一兩次…….然後其實佢間唔中去我屋企/同我屋企人食，我哋都係會請佢食架囉😅 唔知以為我日日單方面去黐餐😅 我真係冇諗過，原來佢係會記住我食過佢屋企嘅嘢….

想問吓，如果去佢屋企XX（因為地點方便佢），之後食咗個公仔麵，仲要係佢阿爸阿媽出錢，而唔係佢本人買嘅，佢咁都要同我計住條幾蚊嘅數，咁我係唔係要用「未成年名校E cup援交少女上門私鐘」嘅價錢，去同佢好好計返條數？😅 我啱啱識佢嘅時候只係中學生…😅 以我當時嘅行頭如果咁都要計，我肯定每次$10000都大把人肯俾😅

其實到而家我諗返起呢件事，都覺得非常之委屈，眼濕濕🥹 Microsoft事件根本連孤寒都不足以形容，佢直頭好似裝咗個局俾我踩咁，目的就係要喺我身上無本生利🙂 之後我有hard feelings，就調返轉話我拜金、物質、貪錢，然後數返佢平時幾咁「益」我，請咗我食好多公仔麵😅 老實講我做補習賺錢養自己交學費雖然辛苦，唔似得佢，唔使做18歲生日阿爸即刻送6位數現金俾佢，叫佢試吓去學投資😅 但當時我雖然唔係有錢，但都唔係話連$200都攞唔出，所以個問題根本唔係喺$200度🥲 最傷心嘅係佢連咁樣都要同我計，仲顛倒是非黑白🥹

之後我同佢分咗手，佢仲有同人講話我係拜金先同佢分手….成件事真係？？？仲有好多奇葩事情，下回待續….

（附上當年「未成年名校E cup援交少女上門私鐘」的照片😂）

👉🏻 【按此】第三話現已更新