24歲墮胎3次/出櫃我自己的經歷 (Patreon)

（此圖無碼版放另一tier）

唔知大家有冇留意，呢個星期係香港嘅women’s festival，主辦方都搞咗好多活動，而我都有被邀請去參加🤍 尋日我就去咗一個關於子宮嘅分享，有唔同嘅女生上去講自己嘅故事。

其中一個女生，一企上台就話要懺悔，因為佢先24歲已經三次墮胎。我第一個反應係，其實真係冇乜嘢好懺悔的，而且就算係，都唔太需要向唔識嘅人懺悔。再聽落去，了解咗佢三次藥物流產嘅經歷：

第一次係同男朋友發生不安全性行為

第二次係食咗事後避孕丸 但冇用

第三次係已經做咗避孕措施 但都懷孕

就咁睇我就真係覺得好無辜，其實上述三個情況都好普遍，佢三次都中獎，好可能只係因為唔好彩😫 當然，第二三次好可能係因為處理得唔啱，但都無從稽考了。

喺呢度我想同大家出櫃一下自己嘅經歷。咁雖然我唔係有過好多個伴侶，而且絕大部份都係以年計嘅單一關係。但其實有一段好長嘅時間，講緊係差不多10年，我係完全沒有任何避孕措施下去頻繁地同男朋友happy（一星期起碼幾次）😅 冇食藥、冇任何外在或內在嘅阻擋😅 即係話我係有10年嘅時間，係不斷無止境地進行不安全性行為😅

雖然我都知咁樣係唔啱嘅，唔啱嘅位係我根本唔想懷孕，但我又咁放肆，淨係心存僥倖諗住萬一大肚就去落仔。另一方面我又會體諒自己，因為我真係接觸唔到任何liberal嘅性教育，都係靠自己摸索😅 其實我呢個情況最好係食避孕藥，但係以前嘅我總係覺得「食藥傷身」，對於食藥有一種根本上嘅抗拒、污名，諗返起都覺得好傻😮‍💨

然後由於我10年來一直沒有懷孕，係，係一次都冇試過，我甚至有懷疑過自己或者伴侶根本就係不孕，潛意識已經係咁樣說服左自己。直到我一兩年前去做婦科檢查，做晒超聲波抽血等等，發現我一切嘅器官、功能都係非常之靚同埋正常😅😂 咁我先知呢10年來我只不過真係真係好好彩😅

所以分享嘅嗰位24歲女生，佢三次墮胎起碼有兩次，係有做某程度上嘅保護措施，但都中。相比起我，10年來可能都做咗1200次不安全性行為，但一次都冇中過，應該只係好彩，雖然我冇墮胎過，但如果好似係我咁樣嘅人，又憑乜嘢去論斷佢呢？

呢個出櫃我真係第一次，因為我成日都覺得自己咁樣進行不安全性行為係有少少羞家嘅😂 尤其是我都會鼓勵其他人注意sexual health😅 不過呢啲嘢都已成過去，我而家絕對唔會咁做㗎啦🤍