入院了 (Patreon)

最近的身體狀況，老實說不太好

上星期第一次恐慌症發作，不知就裡的入了醫院，一切指數正常，但身體就是感到極度不適：窒息感、心跳感覺很重而且快得要爆炸、胸口刺痛、頭暈、感覺隨時會暈倒甚至死亡、無底的恐懼與絕望感…哈哈，當日仲因為報警嘅時候我亂講嘢，搞到警察上門，好在只係查一查發現冇問題就當冇事發生。 檢查完一大輪冇事，就出返院…

原來人是能夠感受到這種感覺的。接下來的一星期，我以為自己慢慢沒事了，只是胃口差了點，直至幾日前星期六，發生了一件我以為自己handle到的、跳出我comfort zone 的事，可能加上近月每天喝咖啡和緊湊的時間表，到了晚上panic attack突然又來襲，呼吸好困難、胸口好痛、全新顫抖、發冷又發熱、情緒崩潰了，我打畀朋友大叫大哭，問佢哋點算，我會唔會永遠都係咁，好唔返了。最後我係要三批朋友接力，包括在外地嘅朋友，一直同我FaceTime到朝早，然後都冇乜瞓過就去探監，探監嘅時候我用咗寶貴嘅15分鐘崩潰大喊。

我知道我而家個腦某部份，可能有啲搭錯線了。原因係一直以來，講緊係咁多年來，所承受嘅壓力可能終於爆煲了，再加上各種不安全感、孤獨感，又受咖啡因等物質嘅影響，我身體終於頂唔順，認為我地處於非常不安全嘅環境，只係好少嘅事，就能夠誘發好大嘅焦慮，甚至會去到驚恐發作咁嚴重。

我要比自己慢慢休息，好好養好身體同埋精神。之前實踐健康生活去到咗瓶頸，感覺上已經有兩個月左右，體重沒有再點樣下降，我亦唔強求乜嘢減肥成果，所以都冇乜大所謂。

結果呢，只係呢個星期，我因為精神狀態不佳，加上身體真係感到不適，經常有唞唔到氣嘅感覺，食飯嘅時候就感到更加呼吸困難，不足一星期已經令我輕咗1kg，所以真係搞笑㗎，唔健康地瘦真係快過健康地瘦好多😅😅 當我焦慮嚴重嘅時候，我甚至會害怕自己係咪患上左厭食症，當然其實只係杞人憂天，但呢個就係焦慮嘅特質，當精神處於嗰個狀態，就會將所有微小嘅事都放到好大去嚇自己。

尋日我心血來潮想食一碗買咗好耐嘅韓國杯麵，點知我只係食咗一啖，因為受到辣味嘅刺激，我竟然即刻感到心口同背部刺痛、心跳加速、呼吸困難，由於已經有過驚恐發作嘅經驗，我即刻同自己講冷靜，然後佢飲咗一啲凍嘅甜野，作為因為想健康同埋本身都唔喜歡甜，而已經好耐冇飲甜嘢嘅人，我踏出左好大嘅一步去比自己有走盞位，呢幾日我都特登多咗飲含糖飲品，雖然飲完仲瘦咗，原因係因為真係食唔到嘢🥹

如果你睇到嚟呢度嘅，多謝你聽我嘅分享，如果你係支持左我好耐嘅朋友，應該都冇見過我咁差嘅狀態。我都前所未有地變得好依賴我嘅朋友，都好慶幸我仲有佢哋😭🤍 亦都好開心有大家🤍✨

放心，呢句我同自己同埋大家講嘅，我一定會好起來✨

ps 附上近日身體數據