男友怎樣看待我發性感照 (2) (Patreon)

呢兩張相都被IG下架，都唔知中咗邊項😅😅 等我圖連文post返喺度吧🥲🥲💜💜

———————————————

當有人話，你影性感相，搞到你男朋友好冇面，我一句回應返：「係佢要求我影嘅。」咁嗰啲人就已經收晒皮😂 唔會再出聲。

事實上，我2014年已經同黃太一齊，當時已經開始寫性別小文 #wyk9up 而開始影相係2016年左右嘅事，patreon 就2017年中開嘅。除咗自拍，其餘所有嘅相都係佢幫我影嘅，沒有一張例外。

我哋仲會一齊執相、揀相，一齊睇人哋啲comment。讚嘅就開心，發神經跳制嘅就更開心，一齊笑啲人大驚小怪😂

一直以來，不知就裏嘅人好鍾意用「對唔對得住（未來）伴侶」「一定係好濫交」「實唔會搵到人埋單」等等嘅角度（亦都即係父權框架），走來攻擊我。由於我唔鍾意交代私事，我都係睇住佢哋黎笑，笑佢哋對我無知，但又自以為是😂

呢個月，自從我同黃太嘅關係曝光，啲人就開始轉為講「劉xx好慘」「劉xx要容忍條女做雞」「劉xx條女唔尊重佢」，笑L死。但當我一句話其實係佢鼓勵我影嘅，影相係我哋嘅情趣嚟，啲人又會即刻收皮。

收皮，唔係因為尊重我，而係因為尊重佢。呢種人，仍然覺得女人嘅身體係男人嘅擁有物，我嘅男朋友既然話可以，其他人就冇資格出聲之類。

但黃太支持我，正正就係因為佢尊重我作為一個獨立嘅個體。佢尊重我嘅身體自主，知道我嘅身體、我嘅sexuality唔係屬於佢，而我哋嘅關係，都唔係建基於擁有大家嘅身體，而係思想上嘅契合、價值觀上嘅接通。

大部份人都用父權嘅框架，去蔑視我嘅身體自主權、將我當成一塊肉（pun intended）咁樣看待。但佢冇。我喺佢身邊，唔介意因為佢成日俾白粉報、大公文匯嗰啲騷擾、唔介意屋企俾國安釘上。同樣地，佢係我身邊，都唔會介意其他人對我嘅偏見同攻擊。

更莫講影相出post，本身係我哋一齊玩嘅小遊戲，不單單係「不介意」嘅程度，而且我地係樂在其中。至於你話影得靚唔靚，見仁見智啦，我本身個人就係咁嘅樣，冇得勉強，但至少我（地）享受過程，又有人鍾意睇，就已經好足夠啦。

一直以來，陌生網民以為我係「無主孤魂」，喺未搵到「主」之前，竟然夠膽將自己嘅身體公開，唔留俾未來嘅主人，實在大逆不道😂 所以當佢哋知道我有「主人」（其實我先係佢主人😌）之後，即刻mindfucked😂 然後就覺得，黃太一定係為咗錢，「佢唔做雞點養我」😂 Again，真係笑到我OinkOink聲😂

作為亞太區香港patreon總部開荒牛，當時全個香港根本就冇人用呢個平台，亦冇人知道喺呢個平台，用圖黎做content，係會搵到錢，連我自己都唔知。（其實我就唔只圖嘅，不過啲人鍾意斷章取義，就算流出都只係流出圖，我辛辛苦苦寫嘅文係冇人流出嘅😂）

係我2019年自爆買咗樓，啲人先至發現原來搵到錢（跟住就變咗好多人開啦）😂 喺自爆之前，大把網上輿論係話冇人會課金俾我嘅，又話我做雞會窮😂 當然，我睇到都係默默地指住笑，解釋都廢事😂

喺我經營收費平台之前，黃太已經支持我影相、講性別議題，仲會同我辯論，去完善我嘅說法。當我飽受攻擊、欺凌，佢仲會陪伴我、開解我。喺我經營收費平台之時，根本唔知有冇錢搵嘅時候，係佢幫我影所有嘅相、係佢支持我去試新野。如果唔係佢，香港應該冇人會用patreon（因為係佢鼓勵我用嘅，如果冇佢鼓勵，我未必會用，我唔用嘅話，全香港應該冇人會用😂）

斷章取義嘅人，淨係睇到相，然後將佢個人嘅價值觀強行加諸我身上，無限幻想虛構我嘅私生活，不斷借題發揮。愛我嘅人，不但鍾意睇我嘅相，仲鍾意我成個package，包括用啲相去表達某啲性別思想，或者打破傳統嘅審美觀，又用自己啲肥肉相鼓勵其他人一齊欣賞自己嘅身體。而愛我嘅人除咗一眾girls、patreon寶寶、粉絲，當然仲包括黃太。

講講下，已經覺得講多咗😂 其實明就明，唔明就是L但😂 如果無啲乜都唔知，但又自以為是對我嘅人生發表偉論嘅人，我又點有得笑呢😂🥰