在床上裸一裸 - 男友怎樣看待我露肉 (Patreon)

呢個系列今日影的，我其實覺得唔係影得太靚，但既然影咗，日後都會逐漸放上嚟，今日分享長文先💜

事先聲明，其實由於種種歷史、私人原因，我本來係唔想同佢確立任何關係。雖然實際上我哋係好親密（唔係講身體，係講精神上），但我喺國安法呢單嘢之前，都唔會特登走去話佢係我男朋友。

但呢單野之後，我要幫佢處理咁多嘢，為咗令世人能夠一針見血咁大概認知下我嘅身份，所以對外以「男女朋友」宣稱，實際上無論我同佢都覺得我哋唔係情人，或者咁講，唔止係情人，亦唔係一般人所理解嘅「男女朋友」。點都好，當住係先😂 如果想知更多可以睇《明報》以下2篇報道：

劉頴匡女友：他有想過代價 沒想過那麼重 牆內人憂被遺忘 怕港人離棄這地方

星期日現場：致劉頴匡的「社會性」書簡

咁我就講下，佢點睇我做嘅所有嘢。

一句講：其實當初2017年開patreon，係佢鼓勵我嘅😂

當時我同佢商量，講出我嘅擔憂（包括啲人好鍾意講嘅什麼商品化），佢再同我辯論，不斷鼓勵我開。相，除咗自拍之外，基本上全部都係佢同我影嘅😂 影完之後仲會一齊揀，佢又會睇住我執相，仲成日叫我唔好將啲格打到咁厚😂

經營呢個patreon，除咗我自己鍾意、比我自己去發洩各種慾望、情緒，有一部份都係我哋兩個嘅情趣之一😂 所以啲人成日講到佢要「容忍」我去做呢啲嘢，其實完全係相反、大錯特錯，佢不知幾鍾意我發揮自我😂

絕大部份時間，佢係十分之尊重我，特別尊重我嘅思想、自由。佢明白我唔係佢嘅擁有物，而係一個同佢並肩同行嘅夥伴（當然會有嗌交、想拆夥、做錯事（佢）嘅時候😂）。正如我唔會管束、限制佢嘅發展，佢都一樣唔會限制我。只有互相嘅支持、善意嘅批評。

身體只係一個皮囊，其實有時都唔係好明點解有啲人要咁執着，走去管人哋嘅身體。佢同我一樣，都係注重大家嘅腦、思想，會鍾意試啲新嘢，鍾意冒險同刺激。而且我哋性格、價值觀都係夾嘅，都係深層次咁了解對方，所以根本唔會因為有人睇到我嘅性感相，而負面咁影響到我哋嘅關係，因為我哋嘅關係從來唔係base on 外在，唔係base on要控制彼此嘅肉身，唔會咁容易就出現妒忌、失去信心。

雖然佢成日做一啲野激我，我其實成日都好唔想認佢🥲😂 但佢而家都咁慘，比個政權迫害，咁我就粗粗地支撐住佢先啦。所以話，我哋唔係一般嘅情侶，但同時我哋亦超越情侶。我做嘅一切基本上佢都支持。

（反而佢唔係咁支持我之前玩個愛國藍屎kerrytan，因為佢覺得好無謂，怕我又再俾人拉，但佢都只係講兩句，就叫我自己諗）

我唔係屬於佢嘅，佢都唔係屬於我嘅。但同時我哋又係深深咁樣連繫住，咁多年來變到好熟悉大家，都唔知點樣可以形容到我哋嘅關係。但一句到尾，我做嘅所有嘢，佢不單止支持，更加係始作俑者😂