喝醉後解鎖🔓 (Patreon)
Published:
2020-12-18 15:11:41
Imported:
2023-11
Content
平時,大家好少會見到我個樣咁迷,大部份時間我亦都鍾意保持清醒,做個叻叻豬,呢個係我飲咗三四杯之後先會出現嘅樣😂
講起飲大咗成就解鎖,其實我就冇乜嘅,一黎我唔係成日飲酒,二來飲酒都會有自制能力,第三,唔係酒精令人做錯事,而係酒精令到某些人覺得有藉口做錯事。
我遇過一次最嚴重嘅借酒搞事,係學生時期去實習。當時男上司好似話慶祝聖誕,跟住就請晒啲實習生(10幾人,女多男少)去佢屋企。上到去,佢一樣非酒精飲品都冇,個個焗住飲酒,佢仲不斷要人飲,最後唔少人包括我都醉咗。
之後佢就開始出手,摸啲女仔大髀、手、嘗試從後熊抱、拉啲女仔入房。我本身俾佢隊醉咗瞓咗係梳化,佢仲成個人瞓上我度、宅落我度,不過比啲未醉嘅女仔拉開左。
最後個個都安全離開嘅,跟住個個都冇出聲。
去到第二日,佢喺我哋個wtsapp grp自己喺度講嘢,係冇人講嘢嘅情況下,佢無啦啦自己話乜嘢尋日發生咗乜嘢事呀,我完全唔記得呀😅我真係飲到好醉,完全斷晒片呀😅
至今,我地個grp都再無講過野....
係咪話唔可以告佢呢,又唔係嘅,但咁樣嘅案情,好大機會搞完一大輪,最後都係不了了之。佢本身個人都幫好多人嘅,係呢方面原來咁樣(之後都聽過好多其他事件),如果無啦啦告上法庭又要擘曬面,佢錢又多,要打官司根本好大機會鬥佢唔過,無權無勢嘅我哋唯有就咁就算。