救貓的道德反思 - 不太能公開的想法🐱 (Patreon)

尋日我救咗一隻貓，出咗一個post，之後有6000幾個like，幾千個留言，99.9% 都係盛讚，好多人讚我心地善良。

雖然從理性分析，我知自己心地由細到大係偏向善良嗰邊，但我反思嘅係，點解網民可以單憑一件事，就讚我心地善良呢。我覺得，我做嘅嘢只係任何一個愛貓人會做嘅事，我並不特別啊。

1. 人可以出於好多原因去救貓，包括想拿光環等人認同、愛「救援」帶來嘅行動感、愛這種動物、喜歡收集動物、想交朋友、想感受救助弱小嘅「權力」......有好多與「善良」無關嘅原因。

2. 又，反駁返(1)，到底乜嘢係「善良」呢？善良係咪就係等於毫無雜質？「為善無近名，為惡無近刑」，真係啱？一方面想去做義工，一方面想結交朋友，係咪唔純粹？一方面想做義工，一方面想藉此溝仔呢？定係，因為我地無從判斷行善者嘅真正動機，所以只要無明顯嘅私心，都應該表揚？如果有明顯嘅「私心」呢？例如捐錢為咗有個名（eg 上電視）或者為利（eg扣稅、為品牌建立形象）？但就算有私心咁又點呢？善良嘅「本質」到底係咩，而呢樣嘢又有無探討嘅必要？

3. 我發現，你越做得少，越會得到（盲目的）表揚。越做得多，越會遭到謾罵。我做嘅嘢，可能唔少貓義工每日都做緊，但佢地並無幾千個留言讚好，反而大家會認為「義工救貓 = 理所當然」。而我，因為唔係救得咁密咁多，算係個圈外人，所以做一兩次，都會獲得盛讚。而貓義工就算平日付出幾多，只要一出錯，反而會遭到好多攻擊。（類似例子: 整個ig 都係自己圖嘅kol/明星，只要出一個暗示支持民主嘅post，大家就會自行揣測、大讚。但一個平時關注開政治嘅人，就算唔係政治人物，只要講漏一樣嘢，都可能會被謾罵）

4. 延續(3)，我覺得呢個現象有幾個原因。

第一，真係多做多錯、少做少錯，人一定會出錯，救開貓嘅，一定有一兩次做得不足，甚至誤傷貓貓，然後人嘅本性就係容易記着別人出錯，因此應該冇一個貓義工係完全沒有hater。

第二，好多人係欣賞人「跳出comfort zone」，而唔係真係欣賞人去做件事，例如人會覺得貓義工着頹tee救貓好合理，我著住靚靚哋嘅衫去抱污糟貓就好大犧牲，但其實明明都係同一個動作。

第三，部分貓義工可能會透過救貓，得到一啲資本，例如捐款/圈子/知名度/權力，就好似人地會覺得，講得多政治嘅KOL係因為講政治而上位，政治係「本業」（其實好多義工/KOL 都真係真心做自己相信嘅嘢架姐）。而其他藝人/KOL，因為講得少政治，都持續到，所以佢地唔係「透過政治上位」，而係「一向都上到位但都講或暗示政治」，所以更加值得欣賞。套返去貓義工，因為救貓素人從無、亦不會從救貓得到「好處」，所以更能夠獲得稱讚。

第四，人就係喜歡新面孔😂

5. 我發現「善良」同階級、幸運、成長背景係密不可分。一個有錢+家庭又幸福，從來不需要承受惡意嘅人，當然都會更加容易對身邊嘅人好，幫人更加有能力去不求回報。由細到大被愛包圍，遇到一兩件不幸嘅事都容易包容、容易付出愛。

但一個窮+ 經常遭遇不幸嘅人，幫人嘅時候無辦法咁大刀闊斧（例如琴日貓貓嘅醫藥費估計要數萬，如果經濟能力唔係咁充裕，可能幫不到/需要眾籌，一牽涉到錢就總有位比人入）。又或者，好似潘咁，因為佢由細到大成日遭受不幸（當然好多事可以係觀點與角度啦）/性騷擾，所以佢容忍嘅限度，比起其他人，更早已經用盡、因而報復心重過其他人，更加容易激怒，都係可預期嘅。（題外話，佢都救過唔少動物+幫過唔少人，但當佢「做錯事」嘅時候，好似都不太重要😅）

最搞笑嘅係，貓group個post大家都99.9%讚我係大好人，「人美心善」同時間，我youtube 幫潘講說話嘅片/其他內容，比人洗緊「人醜心醜」😅 從一件事就看出人格，不論是讚是罵，真係好咩😭

對上一次我有咁嘅覺悟，係我2017年執咗隻唐狗嘅時候。當年我都係喺狗group比人大讚，同時其他post 比人鬧緊做雞唔死都無用😂😂

最近睇緊一本書，叫Doctors from Hell，講納粹德軍醫生做人體實驗的，我暫時只係睇咗2/5 左右，對「道德」呢樣有唔少反思。多謝大家睇我9up，我成日瞓唔到覺就係喺度諗呢啲嘢，我極度需要一個位去宣洩呢啲想法🙈😂💖