長文：感言和感謝💖 (Patreon)

首先，小女子真係好多謝你地支持我，不過我其實係一個好悲觀嘅人，凡事都會向最壞嗰一面諗，依家有你地嘅支持，我雖然好感恩同自覺好幸運，但同時我嘅悲觀症都慢慢發作。平時我好唔鍾意比其他人知道我咁悲觀，因為我自尊心好強，我寧願俾人鬧同攻擊，都唔會想人地同情或可憐我，不過我又覺得，既然你地都咁支持我，我可以向你地展露自己較私人嘅一面。

1. 我覺得讚我嘅網民/陌生人，全部都係想害我

呢個係長期被四方八面地攻擊嘅後遺症。

識我耐嘅朋友可能都知道，我三年前Year2嘅時候，乜性感照都無post過，已經因為政治原因，比東方嘅狗仔隊跟仲上埋東周刊，之後陸陸續續都上過東方、文匯幾次。

到後來，新界東補選，我因為支持6號而不斷被放上不同立場嘅論壇/page，無論係藍絲、泛民定本土，認同我立場與否，全部都樂此不疲地攻擊我嘅外表。其實我真係好難受好困擾，好唔明點解d人要咁對我。嗰時，我以為全世界都好憎我（將自己想得太高lol）。

再之後，我明明無攻擊過某「唔係本土」政黨一句，卻被其支持者大規模網絡欺凌，開page、改圖、跟蹤我、寄信去我書院、send email去1000個機構叫佢地唔好請我，打比我中學校長、不斷inbox 騷擾我嘅朋友/每一個follow我嘅網友。

仲有數之不盡嘅被放上各論壇與content farm、上文匯報嘅次數。仲有無數辱罵、騷擾嘅inbox同留言。

當然，每一波嘅攻擊欺凌，都必然包含大量侮辱嘅言詞，喺我無侵犯過佢地嘅前提下，將我往死裡打，從頭到腳都攻擊千遍萬遍。

最陰濕嘅，就係嗰d將我封為「女神」嘅標題，將我捧到高一高，引人黎猛踩我，等我從高處墮下跌得疼一疼。然而，我從來無覺得自己好靚女、好正之類，我只係做返我自己、同時宣揚我相信嘅價值。

所以，就算係你地，當有人走黎讚我嘅外表，我係完全唔會有飄飄然之感，反而係會好不安，不由自主地覺得評論者都係想捧殺我、諷刺揶揄我。

2. 唔知你地會唔會好失望

其實，雖然我依家post d 相都接近係裸照，但其實我開始呢個patreon 只係試玩，一開始並無打算亦無承諾過要走出自己嘅comfort zone去post d 全裸嘅清晰照片（唔排除日後可能或者有機會會）。

然而，每次當我走出少少comfort zone，你地總會有人嫌我唔夠放。一開頭有人表示ig 相仲多過呢度（呢度開左一個月，ig開左7年啊親😞） ，之後我post 下d 朦朦朧朧嘅裸照，又被嫌棄朦朧，但其實我已經用左好多勇氣先post到的啊😞 

同埋，我好記得一開始開patreon嘅時候，我係如何被全世界圍攻，唔少人更揚言，要一follow到我之後就放曬我d 嘢出去......你地話，我點可能唔謹慎、點可能無戒心？你地成日叫我加位，成日叫我尺度up，但我點知幾時會有東方日報個記者入左黎，之後又利用公權力欺凌我？😞😞😞😞 我點知有無人喺呢度等待時機害我？😞 希望你地明白啦...😢

雖然我好享受經營呢個page，同你地分享我同埋我班girls鮮為人知嘅一面，但其實同一時間都承受緊好大壓力，每一分每一秒都覺得有人準備入黎害我😞 每一分每一秒都覺得又要承受另一波欺凌....

3. 就算係依家，我都好驚出街

每一次出街，總有人inbox我話見到我。每過一陣子，就有人偷拍我、跟蹤我。早期睇高登（未有連登），d人話係中大/街見到我，然後佢地公開地用盡侮辱嘅說話黎評論我，縱然我無得罪過佢地。其實呢d經驗，全部都令我好有陰影，甚至性格都改變埋，變得更內向，可以嘅話儘量唔出街，就算出街，都行得好快，頭dup dup😔

有一段時間，我係無上堂一年、日日匿喺屋企避世、出街一定要戴口罩.....

呢d經驗令我呢三四年長期處於不安嘅狀態，同埋認定左自己又核突又肥又無價值。係你地嘅支持，先令我振作翻一d，不過都係不安😞

多謝你地睇晒呢段文字。我一向係比較長氣嘅人，打字快令我更加長氣😐🙈 呢段文字唔知想帶出d咩，只係真心想同你地剖白一下，同埋用分享私隱（脆弱對我黎講係好私隱架）嘅方式黎感謝你地嘅厚愛💖