【國際夢工場：讀者分享🇬🇧】BBC《香港的自由之戰》：真正的說好真香港故事 (Patreon)

感謝英國BBC製作了上下兩集有關2019年香港反送中運動的紀錄片。大家可以喺YouTube打「香港的自由之戰」，便會找到這兩集詳盡地從多角度去剖析整個反送中運動的紀錄片。由於係一套敘述事件嘅節目，你會見到唔同嘅人物交替出場，當中包括抗爭者、記者、政客，甚至你會見到葉劉淑儀及湯家驊。

紀錄片由解釋逃犯條例開始，巨細無遺地將整個抗爭嘅來龍去脈一一嘅呈現喺觀眾嘅眼前，以非常持平嘅敘事手法，順序地將整件事記錄，穿插着訪問剛才提及不同嘅群組，讓大家能夠聽到正反兩面嘅聲音，從而作出自行判斷。紀錄片明確嘅提到，整場運動唔係淨係有關「逃犯條例」所衍生一連串嘅警民衝突，而係關乎整個香港日後對自由民主嘅演繹及發展。

當中有幾樣嘢係令我好有印象嘅，包括：湯家驊同葉劉淑儀嘅英語水平非常高，佢哋基礎上係能夠流利嘅去將自己嘅意見表達，無論係口音、用詞上都充分表現出係殖民地政府時代對佢哋嘅教育係一等一嘅，可惜而家佢哋嘅表現就正正就係食碗面反碗底，明明係殖民地政府才令到他們有咁好嘅教育機會，成為今日社會嘅上流階層，而家香港需要一啲有名望嘅人企出嚟，佢哋反而企咗喺中國大陸嗰邊。

在訪問當中葉劉淑儀認為抗爭事件早晚會發生，講咗一句「整場運動只有一個贏家，而北京注定勝利」（There can only be one Winner，and Beijing is bound to win），呢句說話當中係咪帶有一點兒嘅無奈定係話更加肯定佢係需要靠邊站呢？相信只有佢自己心裏才有答案。葉劉喺評論理大一戰嘅時候都頗為中立，認為抗爭者「made a bad move」而導致最後有千多人被捕。

而湯家驊嗰幾段，雖然佢已被「奪舍」，卻道出了一個 hidden fact，就是整場運動背後劍指的，是香港人對中國政權根深蒂固的不信任。為咗護主，佢當然認為抗爭者應被檢控係「Line need to be drawn」，完全不能從他身上感受到整個反修例運動二元對立嘅惋惜，反而係佢嘅表達恍似係講緊令香港撕裂責不在政府，抗爭者才是那作惡的人，所以要以高壓去震懾他們。

係抗爭者嘅一方，從佢哋幾位嘅對話以及剖白自己嘅心情，好能夠睇得出其實根本上就係政權逐步逐步，甚至好似係有預謀，有意識嘅去將佢哋（抗爭者）推向牆角，官逼民反，令抗爭者走上與警方以及政府對峙嘅呢條不歸路。片中睇到林鄭月娥喺每一次面對傳媒嘅時候嗰種嘅傲慢、梗性、甚至有時輕挑的態度，令人感受到一個硬了心腸的女人可以令人幾咁不寒而慄。

有抗爭者甚至想到要與警方攬炒一鑊熟，因為佢哋已經衍生出勢不兩立嘅意識形態，認為革命就必須流血。他們的這些分享，看得令人看得痛心疾首，慨嘆政權嘅頑梗，加劇了衝突及對立面，將人逼上梁山，也讓人對他們（政府）的所作所為更加不齒。

看畢整齣紀錄片後心情沉重，同時也想再一次感謝BBC的用心製作。這會是一套可以非常清晰告訴世界「香港到底發生過什麼事」的文宣，而這個香港2019年歷史嘅真相，豈容南深圳以及泱泱大國隨便篡改？

YouTube 連結：
香港的自由之戰（上 ）
https://youtu.be/YcDv4eoQX5Y

香港的自由之戰（下）
https://youtu.be/DB4QnUc0FBU