【友好分享👮‍♀️】胡俊謙：我的淺黃警爸 (Patreon)

【按：不久前訪問了移民英國的香港戲劇工作者胡俊謙，他談及反送中運動期間發表的文章《我的淺黃警爸》，不少網友表示找不到，原來發表的平台已經消失，現於這裏重新分享。】

我同我爸爸性格唔太夾，加上生活上仲有唔少磨擦，由我讀小學開始，我同我爸爸嘅關係都唔太好，去到中學嗰陣更加係水火不容，中五嗰年，中文堂作文要寫《我的爸爸》，我根本唔想落筆....... 或者，呢篇係遲來的《我的爸爸》，亦係一篇《真.警察故事》。 

我的爸爸，前皇家香港警察 & 香港特區警察，散仔（普通警員）一名。 唯一一次升級，係由「警員」升為「高級警員」。所謂「高級警員」即係「一柴」，屬於警隊裏面員佐級嘅低級官階（但係叫「高級警員」），當差年期過18年之後就自動升，簡單啲嚟講即係做咗 18 年都未升嘅散仔，就有呢個安慰獎，所以又俗稱為「傷心柴」。當然，熟悉警隊內部結構嘅人就會知道，警隊晉升嘅機會其實好少，晉升比例同其他行業唔同。 

家父退休前一直堅守政治中立，從來唔參與任何遊行，甚至喺屋企都唔參與討論政治。每次講到佢執勤嘅情況、或者討論親朋戚友間求警協助嘅事件，佢都係以《警察通例》及《武力守則》為依據，即係所謂嘅「跟規矩做」，包括佢曾經有份處理過嘅韓農 WTO 事件。老實講，聽佢解釋有時覺得 D 警例好死板，證據不足就係證據不足、程序做唔到就係程序做唔到，唔可以夾硬嚟。

我試過有朋友有事搞到上差館，諗住問吓佢意見，結果問咗等於冇問，因為同自己上網查嘅資料一樣...... 又試過有一次有單毒品案，有個疑犯人贓並獲，但係程序上有一啲嘢令到佢未必告得入，我老豆個上司要求佢上庭作供嗰陣「微調少少講法」，但係我老豆唔肯，因為會構成「妨礙司法公正」！我唔記得嗰個疑犯最後告唔告得入，但係我記得我老豆嗰陣承受好大壓力........

老實講，我覺得我老豆當時係怕孭鑊多過係出於咩「法治精神」，但係，規矩就係規矩，呢個就係英治政府時期建立嘅香港警察（我記得呢單案係回歸初期發生）。 

2008 年，佢以 35 年差齡榮休。 

2014 佔中嗰排，警隊部份執法尺道開始偏離我老豆所熟悉嘅軌跡，佢經常睇收費電視嘅新聞台直播，警隊嘅濫權行為佢睇得好清楚，因為佢好清楚如果跟規矩做應該係點、枝警棍要喺乜嘢情況下先可以攞出嚟打人，絕對唔存在「手臂延伸」呢啲咁荒謬嘅講法！ 就係因為呢個原因，由佔中後期開始，佢開始由無色變淺黃，即使同佢同期嘅退休警察朋友藍多黃少。

到咗 2019，西灣河警員開槍射熊仔餅案，疑犯好明顯冇對任何人構成即時生命威脅，吓？你開槍？ 交通警可以揸電單車撞向疑犯？ 再簡單啲，男警員可以搜女性市民身？ 下刪一千個警暴畫面，仲有 721丶831...... 一個熟悉《警察通例》同《武力守則》嘅前老差骨，只係剩餘兩個選擇，睜開眼睛，定係扮盲裝睡。 

講到呢喥，提提大家，2019年6月至今，《警察通例》同《武力守則》已經被更改好多內容，包括將使用警棍由中級武器改為低殺傷力武器。守唔到嘅規矩，改咗佢，咁唔守規矩嘅情況就唔存在！ 

講番我老豆，佢而家算係堅定淺黃，即係佢叫唔出「黑警死全家」 ，但係佢會去投票，而且斬釘截鐵話俾我聽而家啲警察係濫權！ 家父並唔係一名屢破奇案嘅出色警察， 但係原來安守本份丶保守良知，係咁難能可貴。 年少時唔識欣賞自己父親嘅我，而家以佢為榮！ 我好自豪咁講一句：「我爸爸係香港警察！」

▶️胡俊謙：快必案是決定舉家離港赴英的最後一根稻草（上）
https://www.youtube.com/watch?v=L8gWm3J9spI&t=120s

▶️胡俊謙：在英國演出舞台劇《指鹿為馬》，能承傳香港教育工作嗎？（下）
https://www.youtube.com/watch?v=7i13ztb2u_Q&t=424s