【讀者分享🇬🇧】移居英國Kingston實地考察報告 (Patreon)

我打算移民英國，所以最近去咗 Kingston 一個星期睇吓環境同探吓附近朋友。我有以下感想想同大家分享一下：

1. 今次嚟英國見番好多朋友，大家都已經 settle down 哂。有嚟咗英國一年嘅，有兩年嘅，亦有大學畢業之後就留喺度做嘢。表面睇大家嘅生活都好順利，好如意，但係詳談之後，我就知道大家都經歷過唔少難關。大家都曾經面對過唔少不為人知嘅苦況，例如收樓之後發覺 sewage pipe 有問題，令到半個廳係浸咗(詳情就恕我唔多講) 。當然，到最後佢哋都係覺得係值得嘅。我自己嘅體會就係移民英國係要好有決心，同準備去面對一切難題，而最終係會收成正果。

2. 基本上，英國呢度乜都有得買，上至日用品，下至家庭電器傢私都一應俱全。理論上帶個人(同埋錢 of course) 過嚟就可以生存到。同埋呢度好興上網買嘢，所以好方便。唯一冇嘅就係中文書，叮噹Hello Kitty 嗰啲。電器嘅話，如果係最新款嘅日本型號可能都比較難搵。

3. 原先諗住英國地方大，有部車可能會方便好多，可以揸車去買餸去玩，諸如此類。之但係喺 Kingston 一個星期之後，我又覺得個 priority 可以擺低一級，因為大部分社區行15分鐘就到一條 high street，坐巴士就仲快，同埋都有好多架巴士，上網又可以 check 巴士到站時間。雖然只係一條街 (未必有商場百貨公司)，但你可以喺high street買到一切生活所需。又同埋出 London 嘅話，基本上都唔會揸車，因為倫敦好塞車。咁當然啦，揸車去遠少少探朋友，或者去大型supermarket shopping 都係樂趣嚟嘅。

4. 搵工方面，其實如果肯做啲低技術嘅工(咁人工都係相對低)，係唔難搵嘅。正常人有得揀嘅，當然都想搵番本行嘅工作啦，如果係做開技工/I.T.，咁英國係易搵工同人工係唔低。如果係醫生護士呢啲專業人士，搵工都係唔難，不過人工就會低過香港好多。

5. 小朋友方面，讀書返學對比香港就少好多壓力，功課真係唔多。咁時間多， 其實係預你參加好多課外活動，發展自己興趣 (但係唔似香港乜都要 cert 去考學校嗰隻，揀樂器又要睇學校樂團欠咩樂手)。同埋小朋友係可以十點前上床瞓覺，至少我今次見面嘅朋友啲仔女都可以。

謝謝！