【讀者分享】一個中學生的震撼教育：學校已經淪落到這模樣了...... (Patreon)

【按：以下分享來自一位中學生網友，相當無奈。】

教授，如非必要都唔想打搞你，但係最緊發生咗啲事，我只係唸到可以分享比你聽，同埋向你請教。以下嘅分享比較長🙏

咁我就修讀緊中史科，冇幾耐之前就輪到我哋學校比教育局定期檢查，教育局都會檢查圖書館。咁我同幾個同學就俾中史科嘅老師，選擇咗負責去清理圖書館嘅一啲有關中史嘅「敏感」書籍。

老師只係話一啲用字比較敏感嘅書籍就要下架，但係其實作為學生嘅我哋，都分唔到邊d比較「敏感」，所以我哋唯有殺錯冇放過。

我好記得，我將一本，只係講緊香港娛樂產業發展史，但係入邊只不過係講咗幾句有關中國足球嘅腐敗，就比我哋下咗架。

仲有一啲講緊香港社會結構嘅書，都因為輕輕帶咗1-2句對以往中國嘅睇法，就比我哋下咗架。而一啲講文革、六四嘅書，自然冇得留低。

最後係書架「香港史」位置上，同原本比，只係剩返大約一半數量嘅書籍，只有一啲香港地貌大全，香港攝影集之類嘅書，以及一啲由屈穎妍之流所寫嘅書。「中國斷代史」位置上嘅書，近乎清空。

所有嘅書，都係我親身將佢哋下架，呢件事嘅可怕之處係我set 比自己嘅紅線，我知道其實大部分嘅書都唔關政治事，佢哋都只係中立咁陳述事實，但遍遍我將佢哋一本一本咁下架，佢哋大部份應該都唔會再放返上去。

最後只係剩返一啲講祖國偉大嘅書籍，我唔咁想像未來讀中史嘅學生會睇d咩書……

仲有第二件事。相信教授都有留意有關香港小學播放南京大屠殺片段嘅新聞，而學校聽日週會都會分享有關南京大屠殺，我又再次被揀中，要負責分享百人斬事件。

我有少少唔知點好，作為一個讀歷史嘅人，我明白以事論事，亦都唔介意分享。但係作為一個香港人，我係唔太想分享，我都答唔到自己點解要分享南京大屠殺，而唔分享六四。

如果比教授你，你會點做？