【讀者分享】來自看透南深圳紀律部隊的前香港警察 (Patreon)

【按：以下分享來自一位聯絡多時、曾任職「舊香港」警察的讀者，非常珍貴】

舊時話：讀唔成書先要當差，讀得到書都嚟做嘅，應該係差癡。天下的確很大，但警察嘅思想同認知嘅真實世界都很細。

伊家內部同樣「非黑即白、非友即敵」。對於呢個環境嘅改變，其實都已經超越哂一向嘅認知。同公務員事務局公佈果個唔宣誓嘅數字一樣，大有人用其他理由唔撈了。但係點解大部分都做到退休？相信要由受訓開始講起，工作環境到升遷制度其實環環相扣。

學堂學得最多嘅係，先要逼你放棄個人comfort zone，繼而接受你嘅同班成為你嘅「安全網」。訓練27/36個禮拜後，一定經歷過人性嘅黑暗面。係，包括貪婪、懦弱、出賣、失望。無論你嘅同班係咩人，佢都會成為你必須共同承擔嘅拍檔。你了解左同班嘅守門（工作操守）後，如何不被瀨野及安全渡過係第二個課題。就算係咁，都一樣要「聽ORDER做嘢」。

上司最中意唔思考就「聽Order做野」既下屬。一、因為佢地自己都未必講得出想點樣；二、上司覺得佢講左要咩结果，下屬要自己拆掂佢。 點樣「聽ORDER做嘢」，每個人都唔同。相信唯一會獨立思考既時候，只係要對公眾果陣。 但係會［咁麻煩］用discretion，需要更加係勇氣，當然是包含用多左時間同心力。 因為用，要解釋、要说服佢，兼且確保唔會被上司覺得你玩嘢（雖然明明唔係新嘢，只係少見。）放生喺呢啲年頭唔洗諗，一定有被挑剔嘅後果。

一句「槍打出頭鳥」概括情況。大部份人點做事都係睇學堂班主任、第一個上司（/師傅）點教；再睇就係隔離Senior過自己果位點處理就跟住做。 若然你問點解、唔跟大圍做法，好容易就成為打擊對象，惡劣程度睇隊伍有異。CID係軍裝人口1/10，亦更加舊制。伊家風頭火勢，一定係跟上司想點做就點做，唔會得罪人又可以安全過渡。

死跟唔錯得去邊，至少「少做少錯」係金科玉律。咁嘅環境做就一隊又一隊唔同線/馬房，因為經歷相同案件肩負不同程度嘅踩線行為，或者艱難工作環境而有互信。 影響度就睇最高級果位升遷進度，而帶來幾多利益了。（利益：可以係調職便利、假期申請、升職機會等。）

講左咁耐，大部份前香港警察其實只係一班受半軍事訓練，深信自己係出解放軍最後一道防線。（佢地都明，出解放軍嘅話，佢地以後無工開。）2019年，佢地真係當打越南暴動咁，不過係open camp，用同樣嘅概念咁打上街嘅市民。 佢地真係唔覺得係犯罪，不過係dehumanize左市民做黑社會， 所以佢地做嘅野係替天行道。

98年前加入嘅都有長俸，伊家已經大部份警司以上階級。佢地呢23年同伊家忠誠的廢物一樣，玩爛制度兼且成功完善「劣幣驅逐良幣」。 2010年前開始做嘅，跟過未退休嘅殖民地長官，明白可以點樣去到盡及做到幾勇武。同時又經歷過2014年嘅79天，睇盡個機構崩壞同紀律已經亂到顛。 2010年後（市好每年請成180幫辦同2300警員，質素真係有分別）開始做嘅，一係非常比力做公公們、手袋黨、擦鞋仔，伊家大部分都進佔最害到人嘅崗位：濫捕有佢份。否則，就好明顯係嚟打份工，同強積金一 樣與世無爭。

警隊都係一個社會縮影，但大部份只睇到自己。對機構有共同/歸屬感，只出現在危機之時，例：佔中及反送中。所以伊家已經變成南深圳公安嘅佢地會問：「你地真係咁憎我地？」 呢個反應就正正反映大部份南深圳公安對呢個環境嘅改變嘅結論就係「非黑即白、非友即敵」。因為機構只睇如何保存權、利、或者被人抽秤，而從來唔會去做一個曾經講過「服務市民」嘅反省。

有人問過「點解白警唔反一哥？」講真，肥聰都係睇身份証出生日期、又無咩得罪人，所以順利坐上去。 要改變係要有一整條線（足夠唔同階級嘅人）經年嚟一齊推動，以伊家咁嘅山頭，你就當睇CCTVB改組咁，無任何誘因啦。 講真，如果唔係衰到正（例：佔中七警），或者終於CAPO摺咗、IPCCO有權直接查，否則根本就無制衡。

要宣誓前，其實已經有唔少人唔撈。至少有連長俸都唔做到退休，昇左職嘅都頂唔順國安法嘅，亦有人打算未來幾年安排好就唔撈嘅。大部份人依舊會做到退休，除左Security或者有關嘅Operations外，應該再無second career呢樣野。連HSBC都搬Compliance返大灣區，應該就只剩返中資嘅出路。不過以伊家嘅速度，多10年先退休（長俸要55歲退休）就應該只能食自己了。

後記：數字無得扼人，2019/2020 - 2020/2021出糧、住宿津貼同埋強職金個總數減左，計返大概係講緊少左500人。 2017年前 non-scheduled leavers （非預知離職人員）每年大概係350-430人，所以人再少左係肯定嘅。裡面應該好多人做兩個位， 因為出doubling allowance嘅多左，但總體人工數字低左。 Reference: budget.gov.hk/2019/eng/pdf/head122.pdf