【讀者分享 ⚽️🇯🇵】 日本足球崛起之謎 (Patreon)

沈教授及各會員，又喺我哋由足球看國際關係時間。今日我哋講日本足球點樣崛起。喺講呢個話題前,我哋做下互動，大家知唔知邊個係河本鬼茂呢？！（知道嘅朋友對日本足球算幾深資歷）

日本自1998年法國世界盃開始，直到2022卡塔爾世界盃，連續七屆都進入到決賽週。後生一輩理所當然覺得日本係亞洲強隊（甚至係亞洲一哥），其實係1998世界盃前，日本隊只處於二、三流。大家一直覺得棒球先係日本國民運動（Maybe唯一重視嘅運動），咁樣日本足球係幾時崛起，又係經歷乜嘢過程，會有今日嘅成績呢？

首先，我哋簡單歸納日本主要靠呢三樣嘢脫亞入歐：青訓、專業化（職業化），及遠大理想（俗稱叫有plan：世界盃百年奪冠），外加幾位重要人物引領，而造就現今的日本足球強隊。

我哋以1992亞洲杯日本首次奪冠劃一條線，當時日本隊已經具備衝擊世界盃決週嘅實力，可惜1994世界盃外圍賽最後一場對伊拉克的比賽，日本隊領先至最後幾分鐘被伊拉克扳平，從而折戟於多哈（日本稱為多哈悲劇）。日本經四年磨礪後，終於打入世界盃決賽週。

我哋之前唔係話日本足球處於二、三流位置。點解會喺1990年代有佳績呢？ 我哋睇下乜嘢叫做人創造時勢。首先有一個叫高橋陽一嘅漫畫家，喺1981年創作出足球小將呢套科幻（入面嘅情節及人物比例仲唔係科幻情節咩）足球漫畫。呢套作品面世後，令參與足球運動嘅年輕人數大幅上升（由1981年11萬小學生註冊，到幾年後變成26萬，小學球隊由2967隊到7451隊），好多外國球星都話睇過呢套卡通，然後愛上足球。參與者多咗，就令人才選拔基礎增大，不過常言道「千里馬常在、但都要有伯樂」，咁日本嘅伯樂，就係環境育成及完善體制。

其實日本好早就有足球運動展開（1886已經出現喺日本高等校園），但一直都處於鍛鍊身體為主。二戰後1964東京奧運會，因爲奧運會入面有足球項目，所以喺1960年，聘請德國人D.Cramer做顧問（日本人向德國學習不是新鮮事，「維新三傑」之一的大久保利通推動以當時德國君主立憲制度嘅中央集權，寫成日本憲法）。佢引入當時先進足球技戰術觀念和制度，及促成日本足球聯賽於1967年成立，到現在，都被稱為現代日本足球之父。大家可能會問：點解請一個德國人嚟做顧問？入面有一個民族性原因。大和民族同德意志思想都係著重細節、做事按規矩、深耕細作，有共同思維下，一拍即合。

有咗呢個開頭後，就係需要一個革新人物去改革整個大環境，川淵三郎就係呢個人，本身係紅褲子出身，入選過日本國腳。川淵三郎多次親身考察歐洲（係咪好有岩倉具視使團feel呢，日本對情報嘅搜集有一種執着），佢上任後有三樣重要變革：推動聯賽職化、統一整個青訓系統，及確保每一個教練都要考取執照，最後佈下「百年世界盃冠軍」宏願計劃。

日本足球漸漸變得有競爭力，終令日本隊擠入1998年世界盃決賽週。呢位伯伯現在已經高齡，但未有退落嚟，現在做緊日本籃球B League嘅改革者。他就算轉換項目都有成績，日本成功打入2024巴黎奧運會。任何運動要搞得有聲有色，都離唔開青訓同職業化，日本嘅青訓係混合歐洲及美帝方式，用雙軌制去培養人才。職業球會由U6梯隊至成年隊構成，而某些著重體育嘅學校，亦吸納大量有資質球員。

大家唔好以為呢班後生仔喺兩邊系統各自為戰，高中學生會同職業球隊青訓參與同一個聯賽（叫高圓宮杯），大學足球隊亦可以參加天皇杯，增加比賽經驗，大學球隊亦出現多次「下剋上」的好表現（三千分曾帶領築波大學有好表現）。簡單一句係，日本球員不乏比賽機會，好嘅青訓唔只係要人多，仲要質量高。多人才兼要踢高質比賽先有好球員出現。日本嘅青訓亦好著重學業，有基本學養，才能好好理解更高階的戰術（《Slam Dunk》中櫻木都要考試合格，先有得比賽），及保障球員踢唔到職業，都有其他出路（唔似某囯嘅奧運金牌選手，退役後要江湖賣藝、甚至行乞）。

日本人仲明白到足球發展除咗球員外，教練亦一樣重要。日本足協要求每一個教練都要接受資格考核，然後取得執照，確保教練有專業知識去訓練球員。（題外話：日本教練階段認證同國際足協係無互通，呢種方式好日本人，就似以前手提電話喺日本行CDMA制式咁。）

大家會唔會覺得職業球會嘅青訓人才，係多過高中和大學出嚟嘅球員呢？答案係經高中及大學出嚟嘅日本國家隊成員都佔一半（有三千分、本田圭佑、岡崎慎司等）。除咗球員脫亞入歐（現今喺歐洲各大聯賽嘅日本球員有100人左右），日本教練亦都輸出世界，之前有前日本國腳本田圭佑做過柬埔寨國家隊教練，還有小倉勉現在執教新加坡國家隊（之前仲主場打和某強囯），可見日本軟實力，不只文化輸出。

篇幅太長，分段再講。

堅離地延伸閱讀（今次係漫畫）
1. 《我們的足球場》：呢本係見證日本聯賽成立及打入98世界盃的漫畫
2. 《青之蘆葦》：描述職業球會青年軍及點樣挑戰世界各強隊
3. 《逆轉監隊》：用領隊視覺理解足球呢種運動 以上漫畫都有一個共同點，就係打入世界，單單呢份視野就可見其野望（日本真係會拎世界盃）

▶️ 胡戩：日本足球做到的，中國足球做不到：我為何成為日本國家隊粉絲？（上）
https://www.youtube.com/watch?v=KxPY-EfBGCo