【讀者分享】 工商管理角度拆解「劉備棚」的創業元老、風險投資者、合併企業、自帶股本投資者...... (Patreon)

劉備嘅「棚」，大概可以分為涿州老鄉核心創業元老（張飛、簡雍等）；徐州豪族風險投資者；後嚟合併（不是收購）嘅荊州集團。其中唔好睇小入贅荊州大族嘅諸葛丞相，他絕對唔係演義裡面嘅「村夫」，岳父黃承彥亦都係荊州名士，係劉表嘅老襟，太尉張溫嘅姨甥女婿，荊州軍頭蔡瑁係丞相嘅表姐夫。

後嚟入蜀之後，再有幾派入股。首先係「東州派」，即係益州以東南陽、三輔一帶人士，地近益州、但係非因戰亂其實未必入蜀嘅嗰一班人，李嚴、法正、孟達係代表人物。二係益州派，即係喺蜀中經營多年嘅「真・本土派」地頭蛇，不過益州其實地緣甚廣，成都盆地中，同今雲貴一帶嘅「南中」（李恢、呂凱等），以及大巴山一帶嘅「巴西」（王平、黃權、馬忠、張嶷等）嘅地方豪強有所不同，不過籠統可以叫做益州派。

另外，涼州馬超、馬岱團隊，係自帶股本加入團隊。

要講點解劉備能夠從涿州靠地方武裝，一路搭出偏安一隅嘅「大棚」，人格魅力當然係重要嘅一環，信譽同識得買關係都係關鍵。鞭打督郵歷史上唔係張飛做嘅，係劉備自己落手。劉備喺中原亦都有唔少雖然屬於唔同陣營，但份數私交好友嘅文武官員，文有「九品中正制」制定者陳群、陳登、徐庶等，武有兩任護烏桓校尉牽招、田豫。

而且名聲呢樣嘢，本身就係好大嘅資本。劉備咩時候正式用漢室宗親做旗號加持，當然有一定重要性，但係歷史真實嘅劉備應該係一個講義氣、愛惜員工同平民（從不夷滅三族或屠城）嘅類似江湖大佬嘅狠角色，唔係演義裡面成日喊嘅弱者。

而且劉備亦都好識得落注，好似佢用難得嘅名額，舉袁紹長子袁譚為茂才，其實就係買保險。一旦唔夠曹操抽（知己），起碼北面有同曹操早晚兵戎相見嘅大佬照一下（知彼），亦都做得相當俐落。

喺娶老婆方面，先娶徐州豪族糜氏，再後嚟娶埋江東孫小妹做老婆，吸納咗嘅資本，某殞落嘅保險大亨都要企埋一邊。

最後，千古CEO沒有management buyout的人不多，丞相能千古留粉，也是因為這個。歷史也不是全都是虛無的，裡面也有風流人物，永垂不朽。

▶️ 孔子第77代家族成員孔德維博士，親自講解三國雞棚學：「漢景帝之子中山靖王之後」賣鞋佬劉備，如何搭靚棚、吸金主、蛇吞象，成就霸業？（沈旭暉x馮智政x孔德維)（中文字幕）
https://www.youtube.com/watch?v=L4a2lGriNmI