［減息，一樣係買股票］（三）　—　債息跌，債券係實升架喎。示範幾個買直債嘅真實例子。咁諗下，5%回報，鎖定20年，唔好咩？我嘅答案：你可以有耐性鎖20年嘅，就買股票啦！ (Patreon)

減息，點解唔係買債？

債息跌咪即係債價升囉，咁減息買債好合理喎？事實都升咗丫

小心，聯儲局減息，同10年債息，可以唔同步　—　但反正而家都同步

買債：咁睇你點買。直債？ETF？債基？

實戰睇下買美債，5厘息鎖30年，有冇著數有冇伏？

4.93% 鎖定20年回報。賣緊74蚊喎，到期仲可以賺價。有冇咁著數？

記住，小心學睇債券quote嘅yield．5厘就係5厘，你唔使再數息定本

畀多個例子，2036年到期美債，賣99.6蚊，「係咪冇著數？」。有息嘛

Fixed income，一切都安排好。　但如果你中途沽呢？又乜事都可以發生

4.9%　鑜20年，唔好咩？答案係：好難講。你問我，就唔好

好過定存，好過放曲奇餅罐。但，通脹呢？

一年5%回報，real return 可能3%？你好富貴嘅OK，但想增值上流就死得

股市10%回報，你都覺得失望唔夠。　咁點解又覺得鎖20年 5% 好？

1. 唔重覆咁多，但呢個短系列無非話你知。減息，都係買股票。「減息買債」係一樣看似理所當然嘅嘢，但諗真啲，都唔係咁簡單。

2. 第一篇大話西遊，同你講咗兩個好古怪嘅故事，煙傾囡積十，同埋打排球。第二篇話你知，減息買樓或做定期，更加唔使討論。唯獨只有債值得討論下（但都唔係好主意）。

減息，點解唔係買債？

3. 至於「貨幣基金」，寫第二篇時都醒唔起。但原則上同定期差不多，只係可以隨時甩身。或者最尾補返，呢篇都係講，「點解唔係買債」

債息跌咪即係債價升囉，咁減息買債好合理喎？事實都升咗丫

4. 好啦，減息買債，當然不能話錯，甚至好多人覺得理所當然，仲要討論？畢竟，債息跌咪即係債價升。

5. 但呢度當然我可以鑽到好深：老細，大家話減息，係講聯邦基金利率嘛，短息嚟喎，亦好難直接買（當然你可以直接炒CME期貨，但期貨不是投資。或者買超短債都得）。而多數人講「買債」，都係講長債。

6. 咁長息短息，可以完全唔同步，以前都寫過，聯儲局搞嘅係短息，只能慢慢過渡去中期嘅息，去到10年長債息，就唔係通過加減息直接控制。所以好學術嚟講，「減息」同「債息跌」唔係同一回事

小心，聯儲局減息，同10年債息，可以唔同步　—　但反正而家都同步

7. 咁但，首先睇圖，如果全年睇，兩者多數都大約係同步嘅。特別係有加息減息嘅年份，例如舊年咁暴力加息，債息當然勁升。但你睇圖，冇加息減息嘅年份債息就亂咁行了。張圖個Excel attach埋畀你，幾有趣的東西，3年前貼過，未得閒update晒啲數。

8. 另外，雖然聯儲局加息減息，未必直接導致長債債息都郁。咁但大家都聽過「QE印銀紙」，其實即係擴表，直接入市買長債，直接壓低債息。相反呢兩年玩縮表。咁呢啲係聯儲局直接影響長債債息嘅動作（甚至你可以話，正係因為加息減息未必直接郁到長債債息，先要有呢啲做法）。

9. 咁而上面呢啲，都係學術嘢啫。事實你見到都未減息，10年債息已經由5厘回落到4厘半啦，相信之後都係易落難上。

10. 咁再講一次，根本「債息跌」已經代表「債價升」，問題只係你買乜債。

買債：咁睇你點買。直債？ETF？債基？

11. 我估多數讀者，去「買債」，應該只係三樣東西。一係你直接買債券（直債），可能係美債，或者玩企業債（甚至之前有讀者想買新世界永續債　—　By the way，隻永續債反彈好多了，也是因為美債債息跌）。第二，就係啲ETF。第三，就係所謂嘅「債基」—債券基金。

12. 我就只討論頭兩者，「直債」只係講少少，主要講ETF。至於「債基」，不多討論。原因好簡單，首先，從來都叫你唔好買基金，我睇唔到有乜嘢係ETF冇，你要去買債券基金。第二，債券基金千奇百怪，不能一概而論。可能你隻嘢係買內房債嘅，就另一回事（對，ETF都有呢啲東西，之前亦有讀者問隻3001 HK，但我會講明我討論邊隻ETF）

實戰睇下買美債，5厘息鎖30年，有冇著數有冇伏？

13. 首先講直債，其實都唔使討論太多。有興趣嘅讀者可以點唱，但我呢度唔寫太多，費事個系列下年都未寫完，而其實舊系列「債券101」都講過下。

14. 其實好簡單，好多銀行甚至券商，都可以畀你直接買債券。唯一問題只係怕你唔識睇啲Quote。呢啲東西，「債券101」教過，早兩個月寫新世界永續債都教過，不再重覆。

15. 我只講一樣好簡單嘅嘢，睇圖，真實例子。10月頭嘅事，而家嘅價已經唔同，但原理一樣。

16. 例如呢一隻，美國國債，你當冇違約風險。當時就係講，「美債都5厘息」（而家應該4.5厘左右）。而且唔係短債喎，講長債。

17. 上面呢隻，廿年後，即係2043年到期。寫住4.93% yield to maturity，就真係你買落去，就可以「鎖定」20年，每年4.93%回報，還不錯。

18. 更有趣嘅係，賣緊74.3咋喎！到期收返100蚊喎。即係賺價都賺到35%，另外每年5厘息。

4.93% 一年，鎖定20年回報。但賣緊74蚊咋喎，到期仲可以賺價。有冇咁著數？

19. 以上嘅想法，有何問題？

20. 首先，你今日畀74.3，然後到期你的確會拎返100蚊，賺價都賺35%，係真嘅。問題係，呢個係20年後嘅事。年度化，你「賺價」，每年只係大約1.5%—都唔係太差，但真係留意你嗰35%係20年

21. 但另外，最大嘅問題係：double count．

記住，小心學睇債券quote嘅yield．5厘就係5厘，你唔使再數息定本

22. 好簡單講，你見到債券quote畀你嘅「yield」，就係「全包」。亦即係你自己唔使計，總之你坐到尾，連收息連價，一年就大約係收嗰個回報

23. 在我地呢個例子，你就不能計完「一年4.93%」回報，然後再去計「74.3買到時收返100」　—　你嗰4.93%，包埋呢個架啦！

24. 另一個角度睇：上面有寫住，呢隻嘢其實一年派2.875息（實務上會分兩次）。咁即係我今日畀74.3買，每年收2.875息　—　即係3.9厘（2.875/74.3）。然後仲有20年後你收返100蚊。呢堆嘢拉勻晒，你一年大約就4.93%回報。

25. 記住，唔好double count．買債嘅indicative yield，就係你坐到尾，連息連價嘅回報。

畀多個例子，2036年到期美債，賣99.6蚊，「係咪冇著數？」。有息嘛

26. 畀多個例子，呢隻2036年到期嘅，即係12年左右，4.5% yield．見唔見賣緊99.6蚊？到期你拎返100，即係近乎冇「賺價」。「咁咪好蝕？」。又唔會，因為你見呢隻，一年派4.5息。你亦可以話，呢隻差不多「只係賺息」，冇價賺。

27. 另一角度睇，第一隻就派息低啲，但今日賣得平啲，有價賺。第二隻就派好啲，但今日賣得貴啲，冇價賺

28. 但，記住債券又名fixed income，只要你今日買咗落去，佢又唔違約，咁你所有回報，都係預先知道晒的，所以唔係好存在「賺息好啲」定「賺價好啲」嘅問題　—　一切都在個 yield to maturity 度。所以你真係唔使自己計（但當然，你想中途有啲錢買下糖食，就要睇下係中間多息但賺價少，定掉轉）

Fixed income，一切都安排好。　但如果你中途沽呢？又乜事都可以發生

29. 講咗咁耐，你見我講咗幾次話「坐到尾」　—　咁唔坐到尾會點呀？債券101講過啦，新世界永續債都寫過。其實呢篇文一開始都寫咗。中途啲價，當然可升可跌。出面債息跌，你呢啲嘢咪升價　—　正如呢兩隻嘢，而家都賣得貴咗。

30. 咁返返去最原本嘅問題，當我睇第一隻嘢，4.93%嗰隻。OK我知道唔係又4.93%息仲有得賺價，我知道係全包，就係4.93%　—　咁但，4.93%鎖20年，唔好咩？

4.9%　鑜20年，唔好咩？答案係：好難講。你問我，就唔好

31. 答案係：好難講，但你問我，就唔係幾好。

32. 首先，睇同乜比，咁當然好過你放曲奇餅罐。另外，鎖4.93%息鎖20年，好過你做定期存款，怕且冇銀行會畀你咁樣鎖20年。我亦相信（雖然唔敢肯定），未來20年你年年去續定期，拉勻應該唔會有4.93%息一年。

好過定存，好過放曲奇餅罐。但，通脹呢？

33. 不過問題幾個。首先，通脹！20年就好覺。74.3買，20年後收返100，上面同你計數話賺價，但諗真啲，計購買力，應該一定係蝕！但當然中途你都有息收，可以用咗佢。

34. 又或者另外諗，一年4.93%，但未扣通脹。未來20年通脹會點，實在唔知。但如果大約信央行嗰啲2%目標。即係你實際回報，一年得返3%左右

35. 一年3% real return，可以話唔係太差，至少保持到購買力，仲唔使點擔驚受怕（都話fixed income，你坐到尾嘅，中間發生任何事都唔關你事，除非美國政府違約）　—　咁所以，其實如果你已經　幾千萬甚至過億身家，只係想「保持購買力」，係諗得過嘅。

一年5%回報，real return 可能3%？你好富貴嘅OK，但想增值上流就死得

36. 潛台詞即係：你拎嚟財富增值，就唔多掂了。

37. 返返去嗰個問題：講股市一年10-12%回報，好多人都失望，「下？咁少？」。「夠」定「唔夠」，你自己研究，畀多次個「退休Excel」你玩。但反正市場唔會理會你「覺得」夠唔夠，我只係畀個客觀數字你。你覺得「唔夠」，咁想點？你「覺得」幾多先夠？30%先夠？「咁點解唔係300%？」。要記住世事皆有定律，你「要求」幾多，係唔會影響到現實嘅（所以我認為近來啲調查，話投資者「要求」MPF一年11%回報，完全係低能。咩叫「要求」？做乜要求11%？點解唔要求50%%？）

股市10%回報，你都覺得失望唔夠。　咁點解又覺得鎖20年 5% 好？

38. 講得再白啲：一年5%回報，你就真係好難向上流了　—　你本身好富貴嘅，就OK，但想財富增值嘅，真係要去到10-12%（然後當然代表高啲風險，但以前講過，拉長啲風險就細啲）／

39. 呢度其實亦都講埋買債券一個最大嘅問題：你cap咗自己嘅upside。其實就係同做定期一樣。你睇舊年，你收5%梗係叻過人地買股票輸錢。但今年呢，下年呢？

40. 而拉到10年20年，我差不多可以寫包單：股票應該實跑贏債券。至於你話歷史數字，可以睇返我呢個Excel，十分有用

41. 最後換個角度講：係，股票係10%，債券呢度5%　—　但你話後者唔使食驚風散，風險低好多。係肯定嘅。問題係：我鎖得20年嘅，根本股票都冇乜風險啦！　股票嘅風險，係持住你坐得耐而減低嘅

42. 仲有，有個想法諗：咁我而家買債，冇話一定要坐20年嘛。中間價靚（即係債息跌），我可以沽咗佢啫。　都啱。問題係，沽咗買乜？咁可能你話買股票。但如果到時股票升晒呢？就好掙扎啦喎。如果想「第時買」，點解唔而家買股票？所有歷史數字都畀你見到，股票要升，可以好急。