[FB文] 金融(?) [馬里烏波爾關注組] (Patreon)

連結如下：

https://m.facebook.com/story.php?story_fbid=538404017858871&id=100050678310520

［馬里烏波爾關注組］（＊）諗起件往事，小學雞嗰時，你知無所不講架啦，成日同同學比較啲利是錢。我聽到啲同學，嘩，咁多利是錢嘅？我就覺得佢地係吹水，因為同我想像中太遠。教訓？兩個。首先，貧窮真係限制人嘅想像力。第二，我細細個已經覺得人地係會講大話（又，我利是錢少嘅原因不明，但不見得我屋企特別窮（我大西北居屋小學啲同學屋企又可以有幾有錢？），又唔係特別少親戚。但可能係我不受歡迎吧）。記住啦，有錢人多的是。

TLDR：己經少咗15%，但依然43萬人過千萬身家，7%嘅人。世界上更富貴嘅地方，屈指可數。我知貧富懸殊，但另一個課題了。有錢嘅真係極有錢，而我係指普通人都好有錢，唔係top 0.1% 嘅香港人。我記得我有諗在台灣搵工，有個台妹朋友幫手搭路咁，佢打聽我幾錢人工，我答咗佢，佢已經「真的假的」，幾乎想獻身（我作的）咁。然後傾多幾句，「原來佢以為我講台幣」，我話，係港紙。佢就真係話傻眼—留意，我唔係借呢個故事晒自己高人工—而係，同一時間，在香港，有網友攻擊我，咁知我職位，估我幾錢人工咁大把，個range都大約啱，然後網友話，「完全冇乜咁特別，一街都係」。See the difference？你可以話因為台灣人工低，但，你試下去英國，睇下係咪打個電話可以呃個主婦6000萬？仲要過現金。

1. 好啦，呢類報告，成日有，我百寫不厭，因為讀者一定鍾意睇。亦都出賣咗大家嘅木性，個個話錢唔重要，但我講其他嘢唔會咁多人有反應。好心唔好咁虛偽。

2. 如果你仲要問咩「自住樓計唔計」，甚至堅持「自住樓應該唔計」嘅，「我一早寫咗兩千字去反駁你」，你可以慢慢享用上集（https://fbook.cc/3ssn），慢慢跟返個進度，我就同其他同學再傾住先。你見呢啲報告，清一色都會計埋自住樓。閣下堅持應該唔計，實情又係折射你嘅自大—即係所有金融才俊都冇你咁醒，你嗰套先啱

3. 又，你見個定義，有講埋要有100萬港紙流動資產。咁你大可以話Gotcha，「如果我得層2000萬供滿嘅自住樓然後戶口得幾千銀咪唔計入去」—但我懷疑有幾多咁嘅人。實情你有得1000萬身家嘅，要有100萬流動資產太容易—你咪加按層樓，「或者瞓街啦，放租幾年應該都有100萬」—但認真，可以有1000萬港紙身家嘅人，有幾多會搵唔到100萬流動資金出嚟？真係借都借到。有嘅，都係不為，非不能。

4. 然後又有啲契弟（我真係好累）要同你拗，「乜嘢先叫流動資金」，「股票算唔算」。你話呢？自己睇圖啦仆街。股票今日沽後日收到錢，仲一般可以拎去抵押即時拎到錢，你話計唔計？個個講撚到自己點醒，但真係基本常識都冇的。「你銀行定義之嘛我唔鍾意咁定義」，咁又返返去閣下有幾自大嘅問題。

5. 好，預先封殺咗一堆廢話，可以講返正題（做人真累）。值得討論嘅，都唔少。

6. 但首先，好礙眼嘅一樣嘢：千萬富翁（當然計埋億萬）呢個群，人數少咗—但反而呢班人嘅身家中位數仲要升咗唔少。

7. 結論？正係印證咗我之前好多文都寫過嘅一句嘢（文字唔會一樣，意思相近）（例如呢篇寫過　https://ggle.io/4xD0），你記得背熟佢：

8. 記住，你係窮人嘅，千萬唔好望咩金融危機大災難，以為洗牌—冇錯，每次呢啲事件，都係洗牌。係有錢人嘅機會，有錢嘅變得更有錢。You name it，87股災迼就李嘉誠百年（？）霸業，沙士買樓，金融海融後買股。全部都係。你見呢個疫情亦不例外，滿意未？所以你以為乜災下有錢人仆街　重新洗牌？諗多咗。重新洗牌係真，但佢地更加有錢。所以唔好咁撚黑心，因為你之後見到嘅嘢，足以令你痴線。

9. 另外，都講過，好多人質疑，呢啲數字點嚟。我就冇心機睇methodology啲細字（聽聞我隻眼仲係好差的），但不外乎都係問啲客，或訪問其他人—冇錯，可能唔準，但你見好多唔同機構做嘅數字，又唔會爭好遠，咁已經證明啲數唔會太脫離現實。至少你冇可能話我知香港得幾千個千萬富翁，或者香港有幾百萬個千萬富翁—至少你個order（幾十萬）係唔會點大錯嘅—你覺得吹水嘅，冇咁多嘅，again，有啲嘢限制咗你嘅想像力。

10. 然後，動機論，總有人問，做啲咁嘅調查或統計為乜。仲使講？銀行開善堂？梗係為生意，做親嘅都係金融或地產公司。一來可以免費拎下版位，但更重要嘅係：sell其他嘢。

11. 你諗下，千萬富翁，無敵地剛剛好，而幾千萬亦真係夠你財務自由，「千萬富翁」係可以sell到客嘅，因為客可以以呢班人做目標，或者有錢啲嘅，當佢地係同類。「拿我地見到千萬富翁係點諗，點睇後市，買乜」，然後可以說服啲客做一樣嘅嘢，「買accumulator啦」—如果調查係「百萬富翁」，你個客心諗，「幾百萬唔係咩錢咋喎」，甚至再仆街啲嘅「我要聽班得百萬身家嘅窮人分享經驗？不如我教返佢」。但同樣地，定得太高，搵啲十億十億嘅，客又覺得太遙不可及，「我早啲自殽投胎好啲」，「你唔使話我知李澤楷點投資！你話我知佢點投胎就得啦！」（呢句好有做楝篤笑金句嘅潛質）

12. 但，不如講返正題，都係，「香港人好撚有錢」。我地睇返，43萬人有1000萬港紙，13個有一個，7%人。你話多唔多？我地同其他地方比下。呢個課題我成日寫，都收集咗啲數據。Again，唔同source，肯定會打交，但又唔會爭好遠。

13. 之前睇過報告，睇下你在世界不同地方，要有幾錢，先可以做到top 10，1%，同0.1%（例如呢篇　https://bityl.co/Bymh）

14. 好啦，要做0.1%。香港要8000萬港紙 ，坡國差不多。全世界有冇地方更高門檻？都只係得三個地方，瑞士摩納哥門檻再高啲（多外國富豪避稅），而在美國你要2億港紙先做到0.1%，超級富豪都在美國

15. 如果講做1%，香港要2000萬港紙左右（留意同花旗報告嘅數都大約符合，花旗份嘢話7%中嘅中位數就1600萬咁），坡國差不多，美國要3500萬。瑞士摩納哥再多啲。（另外，可以留意下，要做0.1%就美國門檻高過瑞士摩納哥，但做1%就掉轉，同啲財富分佈有啲關係）

16. 做10%呢？香港千幾萬港紙就得（而花旗報告就話你有1000萬已經係7%），美國應該唔使一千萬港紙添。但當然都話啲source 唔同，定義亦有少少分別（計唔計外傭？），同埋仲有時間—美股美樓呢兩年跑贏香港不少，相信都有影響

17. 咁你見到，全世界，門檻高過香港嘅，一隻手數得晒。唔好忘記，瑞士摩納哥就真係因為啲（外國）富豪推高。但香港呢？應該唔係。固然唔知佢有冇計在香港啲大陸佬（馬雲？），但正如我第一篇文講，你求其入個大型屋苑，搵個供滿嘅業主，都係千萬富豪—咁呢啲肯定唔係瑞士或大陸富豪。

18. （呢段嘅source我已搵唔返，但大約都可靠的，你可以睇埋下一段）如果計全世界嘅，你有700萬港紙，已經係top 1%—但在香港你連7%都未入到。同樣地，70萬港紙夠你做全世界top 10%．而實情只要你有幾皮嘢，已經有錢過全球一半嘅人—唔好忘記有唔少人係負債嘅。

19. 畀多個資料你，又係我舊文寫嘅（https://ggle.io/4xDH）。另一個角度睇，全世界有100萬身家嘅，有幾多人？1000萬呢？留意係美國文，所以佢用咗美金。下面我都係。而我計全世界有77億人，係有計埋小朋友的，是但。留意啲數，同上面嘅，都大約吻合

20. 你見到，如果你有100萬美金身家，你就係最有錢嘅4000萬人，0.5%。亦即係，你在香港top 6-7%，就係全世界top 0.5%．你話香港人係咪好有錢？（其他數字嘅：10萬美金身家，4.8億人，全球top 6%．1萬美金身家，18億人，全球top　23%．實情只要你有1000美金，即係拎一次消費券，都已經係有錢過地球上一半嘅人）

21. 好啦，一堆悶數字後，都要講幾樣嘢

22. 首先，同你講「只要你拎咗消費券已經有錢過（or even worse，「幸福過」）地球上一半嘅人」，必定難聽過講粗口。因為人係同人比較，但人會揀某啲群體同自己比較，而你在香港唔會同啲食樹皮嘅人比較。正如我同你講「北韓/非洲好多小朋友冇嘢食你成舊水食個蛋治好幸福」，你都無感的。個比較框架係乜，人人唔同，亦都隨時間唔同（「我細個覺得八佰伴美食廣場嘅熱海麵屋好高級」「大啲就覺得百人一朱先係我夢想」），但總有個譜，香港人總唔會同啲食樹皮嘅比的。

23. 另外，正如我不停講「供滿層樓嘅人就千萬富翁啦」（可惜我嗰層供滿都唔係），香港人咁有錢，或者至少話，「嗰啲」香港人咁有錢，亦相當程度多得樓價高（雖然瑞士摩納哥一樣高）。而香港人咁富貴，亦都部份因為生活成本貴—你總不能好似檳城咁幾千銀請條友返嚟整Roti。但，呢兩樣嘢，亦互為因果，亦因為你畀得起錢，食一舊水嘅蛋治，啲租先可以收到咁貴。

24. 你搞清楚：唔係星巴克啲租貴所以收你四十蚊杯，而係因為好多人畀得起四十蚊杯咖啡，佢先可以租咁貴嘅地方。

25. 你比較唔同地方嘅財富，冇錯物價係個因素，但冇你想像中咁大。即係，你拎住幾萬蚊去索馬里，唔會做大帝的，你亦唔會咁做（嗰時個索馬里推友話嗰邊充滿希望，我話贊助機票，問佢幾時去）。同樣地，你可以話「唔止係睇錢」，但一樣有個譜。你話你搬去台北倫敦東京生活好啲，絶對認同—但在索馬里幾皮嘢，唔會好洗過你在香港幾皮嘢。

26. 同樣道理，寫過N次，唔係絶對一條直線，但你見宜居城市，必定係收入高物價高，絶對唔會係收入低物價低的。你可以話你在曼城人工低過香港但嘢平一大截，OK—但你唔會出現有啲得兩千蚊人工然後物價係香港10%嘅好地方—亦因為好多消費係全球化嘅，特別係高質嘅消費，你去邊都好，「訂我Patreon都係咁多錢」，正如iPhone在非洲唔會賣平一半，而你在緬甸想一年去幾次日本，日本唔會平畀你的，你去柬埔寨食KFC，唔會平過你在香港食好多（「明明租又平好多人工又平好多」）

27. 最最最後，真人真事。Bloomberg呢個「在香港有2000萬港紙你就係top 1%」（https://bityl.co/BynX），我在Patreon都有貼過，特別係我有講埋計埋自住樓。當時都有讀者覺得，「咁少就夠？」，「咁好多人都有喎」（讀者可能係想講「咁我都有喎」），因為讀者真係話，「咁好多人層樓都值2000萬喎」 - 但，又係貧窮限制我想像力，我當然有住2000萬樓嘅朋友，2億都有（都勉強算朋友嘅），但，肯定唔係「好多人」下話。仲要減走未供滿嗰啲喎（雖然話分兩頭，貴價樓必然首期大，目測「供滿」嘅比例，高過啲住濕鳩新界樓嘅，例如我住嗰度）

28. 緦之，香港人好撚有錢。我冇見過一個地方咁多名牌（無數外國朋友都同意），文員仔都個個LV愛馬士。亦冇見過第度啲學生個個一年去幾次日本，細細個已經食米芝蓮。特別係女仔，物質見識之廣，全球肯定第一。話分兩頭，雖然我冇仔女，你亦可以話我封建（所以我點會係左膠？），但，「女真係要貴養」。As I aways said，千萬唔好畀啲MK仔請食餐爭鮮就呃咗隻豬，「至少都要食千兩」。No offense to MK仔，亦唔係賣女，但，你話「真愛」？真愛就唔好食爭鮮。港女，in spite of all the evils（咩英文？），still deserve better

（＊）怕且有人又出嚟同我講，「唔應該拎馬里烏波爾嚟開玩笑」。係喎，我咪正係討伐嗰啲「香港慘過索馬里」嘅人。

�