[FB文] 非金融 ［有禁運制裁就有黑市走私］ (Patreon)

FB出左一篇文，連結如下：

https://m.facebook.com/story.php?story_fbid=533373498361923&id=100050678310520

［有禁運制裁就有黑市走私］真係江湖從此多事。當然非legal advice，我又唔係律師，我係律師都唔會在呢度寫，寫都唔會免費。咁但，又討論下（＊）

TLDR：我估好多人唔知係犯法，仲要咁大罪。仲有，亦好多人唔明做乜會揚咗出嚟。即使犯法（我相信都係，老廉做得嘢嘅），實情要捉都幾難…….？不過，大家當然唔好犯法。

1. 案情表面不難理解，導火線當然係因為政策（但呢個應該唔係你上庭可以求情嘅理由啩？）。因為按揭成數，條線劃咗在1000萬。1000萬以下就可以上8成。1000萬以下就唔得，只能做5成。對買家嚟講，即係抬多3百萬首期嘅分別，當然係大分別。

2. 咁買家當然多數想做盡，就想1000萬內搞掂。但業主未必制，可能企硬1050萬，你上唔到會關我鬼事，我又唔急賣。咁唔講法律道德之類，只講經濟誘因，當然大家有mutual benefit，去安排一啲一家便宜兩家著嘅嘢。

3. 不難想像，咪就係「成交1000萬」，但買家私下畀返50萬蚊個業主咁。咁個業主又唔使減價，買家又拎到想要嘅八成按揭，win-win．

4. 「但，你令官府收少咗錢喎」，收少兩皮嘢。咁就…….出問題了。我甚至懷疑根本銀行唔多介意你「呃」咗個按揭的。「根本仲做多咗生意。原本係500萬變咗800萬」，先唔得閒理你背後做乜。況且，分分鐘個買家做唔到八成根本就唔會買或買唔起。但當然，銀行就唔會同你同流合污，總之唔好畀佢知，你拎上嚟係1000萬，我咪信你1000萬。

5. 不過我想講嘅係，首先，似乎份約就真係寫1000萬，否則你冇可能拎上銀行做到按揭。銀行就肯定唔會明知你1050然後仲同你癲。銀行就睇文件做嘢啫。咁即係，份合約就真係1000萬的，亦應該唔會有「陰陽合約」

6. 呢啲方法，聰明嘅香港人當然諗到。但可能好多人唔知犯法，甚至係咁大罪。串謀欺詐。

7. 你問我，就梗係因為你有個cut off 位就會有人咁犯罪，但肯定呢個唔係你有得脫罪嘅理由。所以，都係唔好犯法。

8. 異曲同工嘅，當然係印花稅，亦好多人因為避印花稅，特別將啲成功壓低啲。特別係近親轉讓嘅，都要畀稅嘛。咁大家都聽過，「市價」1050萬你壓到999萬，怕且奈你唔何。但「市價」1500萬你壓到800萬轉讓，就祝君好運了

9. 但話說回頭，呢壇嘢，點樣穿煲架呢？我都係唔明。係咪有人篤？個業主篤佢？係咪後來有人反口唔畀錢？因為我覺得正正常常，無啦啦點會有人查？你又唔係啲成交價偏離晒正常水平（應該唔係？我冇望市價）

10. 然後你見到，係告個買家，同埋兩個地產經紀。個業主呢？冇事喎。睇下幾時有多啲案情。係咪分贓唔勻？

11. 再提大家一次，唔好犯法呀。特別唔好呃稅局錢，「成個政府最有效率的」。

12. 不過話說回頭，之前德國柏林咪話咩租管嘅？「明明話德國人好誠實」，但結果出嚟嘅後果，就係一係業主唔租出嚟，一係要你畀幾皮嘢買傢俬，或者收你啲「噪音附加費」之類（「我有心理影響你地兩公婆扑嘢會影響我心情所以要加錢」）。至於柏林有冇人捉，我就唔知了，怕且都係有嘅，但捉得幾多？

13. Anyway，再講一次，唔好犯法。雖然抬少3百萬上樓係好多錢，但咁樣定罪，都真係…….幾慘

14. 都仲係唔係好明，點解冇告個業主，同埋點解會揚咗出嚟。但我直覺都係冇鬼唔死得人，分分鐘係個業主篤出嚟。「定業主已移民告唔到？」

15. 但照計，你個業主又好難扮唔知情下話。合約係寫1000萬，但做乜你會收人1050萬？做乜後來有人畀多50萬你？好難解檡喎。定口頭講過　然後收現水算不留痕咁？都係唔多明。又或者，根本個業主已經移咗民，告唔到。

16. 同埋我都係唔係好肯定，到時個官點咬實個「成交價」一定係1050萬，點去全無疑點咁去覺得「買傢俬」之類唔合常理。

17. 但之前講炒黃牛呀之類，亦有「演唱會飛原價但海報5000」，或者「波飛原價但個萬字夾3000」，呢啲就似乎比較難說得通。但，1050萬同1000萬咋喎，真係不能買傢私？定有人白紙黑字咁畀人斷正（但，唔白紙黑字又怕人走數喎）

18. 最後，專業人士（即係埃汾太）補充：九成係啲經紀行家篤灰啦。係人人都做呀，但你高調又仇口多咪有人篤你

（＊）又，Bloomberg Money Stuff個 Matt Levine都會咁講，佢都之前係律師（高盛添），但當然newsletter唔係legal opinion，不過不代表佢唔會評論相關嘅嘢。即係，「發表兩句意見」同legal advice係兩回事啦下，正如「就隻股票講兩句」同「investment advice 」都唔同。「但條線在邊？」。就真係要拎legal advice