[FB文] 金融 [啟示幾個] (Patreon)

FB出左篇文，連結如下：

https://m.facebook.com/story.php?story_fbid=533563131676293&id=100050678310520

［啟示幾個］Netflix 一晚插咗差不多40%，今年股價跌咗超過六成，高位得返三份一。當然係城中熱話。但我試下用抽離少少嘅角度去討論，雖然我都係有買的。至於撈唔撈得呀，使唔使止蝕之類，Patreon有講。

根本以前Patreon就寫呢啲（以下嘅嘢），只係因為而家錄音，講唔到咁多（錄音版呢啲害咗你的，內容一定冇咁深入）。所以今次呢度寫，下不為例。未訂Patreon快訂，應該好快變返文字版。

TLDR：以我標準嚟講呢篇夠晒短。除咗講返公司業績，仲講幾樣嘢。第一，好公司唔等於好股票，而凡事有個價。第二，個串流市場，something is wrong，照計大把加價收割你嘅空間。第三，有冇留意係美股先會啲巨企都出完業績跌三四成？最後，叫咗你分散。我當你渣四隻股票，一隻一晚跌40%，你一晚輸10%身家，我包你懷疑人生。因為講到點廢嘅港股，今年都未跌10%。你一晚就廢過佢幾個月。

1. 首先講返，導火線當然係個業績。上客量同預期爭好遠（亦畀你見到啲業績都係同預期比）。其實上次業績已經令人大失所望，已經插咗一轉。大家都調低咗期望，估唔到低處未算低，仲有更低。街估只係上250萬客，結果？直頭係倒退，流失咗20萬客，十年嚟第一次見流失。當然嚇死人

2. 固然，亦因為公司撤出咗俄羅斯，嗰度都冇咗70萬客，唔計呢樣嘢實情仲有得升，但都同預期爭好遠，況且個預期應該有計埋呢樣嘢。況且公司都預今季仲會流失。

3. 我都寫過好多次，公司一早知呢個先天問題，係冇得搞的，只能叫你轉移焦點。你仲要入唔到大陸，咁始終見到有一日會飽和，唔使好快，要上嘅都上晒。公司一路想大家嘅焦點放在其他嘢，但未能成功。所以我八奇地諗，今次之後大家死心，知道見咗頂，可能之後就會留意返其他嘢。

4. 留意其他乜？最奇怪係，公司實情係賺錢嘅，相當賺錢添。一年應該點都有50-60億純利，而家插到1000億市值。即係……17至20倍市盈率咋喎，貴咩？而啲盈利似乎仲有得上。

5. 生意嘅嘢，不外乎係價同量。咁既然你係畀月費，唔存在你會可以用多啲，而用戶人數又見頂。所以，只有係加價，或者減成本，又以前者較好。所以，一係就加你月費，一係就會有廣告。前者做緊，仲會做，陣間講。廣告，公司原本反對，但最新已經轉口風。

6. 記唔記得公司之前公佈咗啲戲有幾多人睇，啲人睇幾耐？你估下呢啲數字畀邊個睇？當然係畀廣告商。

7. 我就認為，公司嘅股票係轉型中（未必係業務）。由一隻燒錢嘅發夢股，變成一隻有穩定盈利增長嘅正常公司，咁當中當然個估值會受壓。但如果個盈利一路上，股價都係會返嚟嘅。當然，個假設要盈利一路上，而唔知得唔得。

8. 好啦，抽離啲，睇迫辟啫，教訓或啟示幾個：

9. 首先，講咗N次，好公司未必係好股票，凡事有個價，偏偏故事個個識講，估值最難捉。你話公司唔成功？成功到不得了。但偏偏係大家覺得佢就死時，就升得最勁。反而到佢開始收成時，股價就唔得。所以難怪有啲人覺得股價係唔使睇盈利嘅（其實，只係預期啫。公司如果唔係有今日賺錢，根本連而家呢個市值都唔會有，亦唔會有之前嘅升浪）。

10. 然後你睇Tesla嘅情況差不多，亦係我成日quote 嘅一句：Successful investing is having everyone agree with you………..later．重點係later．你啱係冇用的，你知公司好勁又如何？個個都知。除非係之前大家覺得公司根本唔會成功，而你覺得佢會成功，嗰時你買，就有回報啦。Tesla, Amazon, Netflix最神奇嗰浸都係主流覺得唔work

11. 第二樣，就講「主流」。公司就真係由顛覆者變成主流（或「建制嘅一部份」）。而家肯定係主流啦，以前都話咩頒獎禮唔受佢，而家大豐收，所有「電影應該在戲院睇」嘅廢老都屈服晒。但一樣，變成主流時，股價反而死。

12. 十分邪門地，正係Redd Hastings上神枱，變咗管理大師指點江山，出書（No Rule Rules）講公司文化後，股價就見頂。呢類嘢都不難理解，股價係咁升時你咪係神，你做乜都啱，而冇人會搵間股價大插嘅公司叫CEO講哲學。況且亦可能只係個別例子，都話Steve Jobs死前已經唔知幾多層嘅神枱，但無數咁多佢嘅書佢嘅戲後，股價都仲係升咗幾十倍。

13. 但第三我仲想講，串流成件事，都係Something is wrong。有啲地方唔啱數。如果公司畀人取代咗，咁無話可說，例如Facebook打殘晒傳統媒體。但，你見根本公司已經算係串流一哥—而好似人人都唔多賺到錢。我覺得件事係有啲問題，雖然我唔識好好咁表達。

14. 應該咁講，既然大家都知，串流呢樣嘢，成為咗你必需品。咁我相信總會有方法在你身上搵到錢，搵更多錢。亦即係我信有好大嘅加價或者廣告空間。情況類似我廿幾年前上網，喂，嗰時大家覺得網上嘅嘢「應該」係免費，好烏托邦，所有嘢都唔應該收錢，亦唔會收到錢。但隨住呢樣嘢人人都用，就自然可以收割你。

15. 講白啲，一個月串流，先好似一舊水？仲無限任睇。我覺得係過平嘅。證據？你自己去戲院睇套戲都舊幾水，唔好講你一家大細睇超級英雄買爆谷，六七舊水落樓。我就真係覺得串流仲有好多加價空間，兩舊水個月你估啲新一代會唔會走去戲院同廢老（如我）一齊睇戲？

16. 當然有個問題係，公司搶灘後，好多傳統媒體都想做呢樣嘢。你食咗頭啖湯，但個優勢可以幾耐？而迪士尼甚麼，似乎個口袋都幾深，燒錢好可能可以耐過你。幸好公司之前都已經借落啲錢同做咗啲投資，你話而家加息，更加不利添。（而Netflix同Tesla冇死到，都幾多得聯儲局過去N年冇大手加息）

17. 你可以留音意下，Netflix一度市值大過迪士尼，好不風光，個個講舊經濟已死。但而家？Netflix市值唔夠迪士尼一半。而唔好忘記迪士尼呢幾年股價都相當差。

18. 尾二，有冇留意，係美股先會出現呢啲業績後插兩三成嘅嘢？我講係大企業喎，唔係四五線股。三個月前，Facebook出完業績，一樣一晚插25%。仲要個市係冇事冇幹的。即係，你有冇見港交所又好，匯豐又好，建行又好，會個市無事無幹，只因業績一日跌三成？我就冇見過。

19. 至於點解呢個現象嘛，可以慢慢討論。你可以話港股冇人玩，但即使多人炒嘅年代，都唔見呢啲情況。你可以話美股衍生工具多，但以比例計，我估港股唔會爭好多。亦可能係美股啲業績真係保得密啲，你見出業績前Netflix都仲升緊3%，全無先兆。

20. 最後，老土都要講句。分散。平時梗係個撚個也文也武，到你隻嘢一晚跌四成，我睇你點唔嚇到賴屎。都話啲讀者，隻嘢一日跌5%已經問我點算。咁你可以想像下，我當你成副身家四隻股票，「已經好分散」「畢菲特話放晒落一個籃然後睇住佢」（睇住佢跌？），「彼德林治話唔好過度分散」。你渣四成嘢，一隻一晚跌40%，你副身家一晚冇咗10% -  港股美股今年都未有跌10%，啲人都叫救命，仲要一晚跌10%？你唔嚇到賴屎？

21. 但我一樣有買Netflix，而未賴屎。因為我唔係只係買一隻嘛！

22. 你仲係唔信嘅，比個數學你。一隻股票跌咗40%，要成返七成先回家。你可以諗下你有幾多隻股票你賺到七成。

23. 再講一次，平時係在Patreon先講呢啲。今日破例一次，下不為例。未訂嘅好快訂。照計好快我會變返寫文，而唔係錄音。