美股又話驚加息驚衰退驚滯脹啦喎。但股票我照買。嘉年華郵輪訂單破紀錄。Twitter：仲有冇得玩？Starbucks叫停股份回購，創辦人七十歲先再出山，得唔得架？ (Patreon)

美股又話驚加息驚衰退驚滯脹啦喎。但股票我照買。

嘉年華郵輪訂單破紀錄。

Twitter：仲有冇得玩？

Starbucks叫停股份回購，創辦人七十歲先再出山，得唔得架？

港股放假，文照寫，不過仲係康復中，都未必保證日日有文，盡量吧。

美股又話驚加息驚衰退驚滯脹啦喎。但股票我照買。

1. 港股放假冇市，美股走勢就麻麻地，雖然你問我，標指1.3%嘅跌幅濕濕碎，但納指就跌2.3%，又已經有人嚟問乜事。

2. 實情有乜特別事？都冇。但如果睇媒體解釋，會講返聯儲局官員講嘅嘢，忽然市場又話驚加息。而且，2年期以及10年期債息都再升。

3. 聯儲局官員講嘅嘢，冇乜新意，都係之前嗰幾味。5月加息，有機會半厘（但佢實在冇講到好實），同埋縮表。但亦正如我呢兩個星期在明報寫嘅文話頭（Attachment有），記住市場梗係炒預期，到5月加息前，就會又開始驚一輪了。

4. 同樣地，你見亦都越嚟越多人（呢度，呢度），講美國有機會衰退，雖然大家都係估估下，但亦畀你知道市場上發生緊啲乜事。有趣嘅係，驚加息同驚衰退，兩樣嘢似乎係有矛盾的。如果真係經濟唔對路，聯儲局就唔會狂加息啦。

5. 當然，兩者都可以有一定嘅時間差，或者你理解做聯儲局加息會加到整死經濟都唔知，到發現已經太遲，亦係一個make sense嘅講法，因為加息減息嘅效應，當然係滯後的。咁就睇你覺得聯儲局嘅斷判力有幾高了。

6. 而另一個可能就係，冇錯係經濟衰退，但依然要加息，因為物價升云云。所謂「滯脹」，但整體我係唔係太信的。

7. 咁即係點？純係得個知字，亦告誡你唔好太心雄，否則又一個浪打埋嚟又嚇到唔知點算。重溫一下，你以為好大件事嘅3月，美股不知幾易玩（港股就難啲），反而係之前，舊年第四季或今年一二月，之前冇乜先兆下，先忽然跌得多。又真係咁的，大家有晒防備，反而到時就冇乜事，況且，有乜嘢，都反映晒啦。

8. 最後可以畀你望一望，我每個月買緊嘅嘢，依然係照做，甚至一出院就買。咁呢啲係星期一嘅事，你見到星期二晚美股就跌返，但冇得咁計啦。只係話你知，我係有恒心有紀律，同埋唔會老點你買自己唔買。

9. 正如之前都提過，唔好以為衰退股市就一定唔得，2020不知升得幾癲。況且。就算股市表現差，其實咪更加係你應該買嘅時機咯。

嘉年華郵輪訂單破紀錄

10. 都好一排冇講過呢隻嘢，一路都係講re opening，而家就應該真了。股價你話好好又唔算，亦可以話未升上嚟，今年暫時跌5%，又只係同大市差不多。最新仲見到最近一星期個訂房創咗新高，照計可以留意下，嚟緊啲業績應該會有驚喜。

Twitter：仲有冇得玩？

11. 可以再講下Twitter，而家直頭Elon Musk會入董事局。但係咪想成間買？實在不重要。留意Cathie Wood就打鑼打鼓，之前佢都好似買咗唔少Twitter。都唔使講咩協同效應基本嘢，又睇下有冇機會因為Elon Musk嘅個人魅力又炒一轉上去。我個人就覺得搏得過的，但你見市況唔係好就，明顯同舊年兩個世界了，如果舊年公佈咁嘅新聞，股價必然飛天，點會只係一日升30%咁少？

Starbucks叫停回購，創辦人七十歲先再出山，得唔得架？

12. 星巴克，相信都唔使點介紹。呢兩日股價都跌咗啲，原因？係因為暫停股份回購。

13. 咁股份回購會推高股價，大家不難理解，但做乜會忽然叫停？原來就因為創辦人Howard Schultz回朝。

14. 此人嘅地位相當高，仲傳過選總統，我亦都睇過佢嘅書。佢創辦公司，原本2000年已經退下來，但金融海嘯後又再出山打救公司，今次係第三次做CEO。原因當然係公司近年面對嘅挑戰，成本上升，同埋難請人

15. 結果佢上任第一個動作，就係叫停咗之前批咗嘅回購計劃。

16. 可能佢嘅諗法，就覺得應該「回歸本心」。搵返公司嘅價值，而唔係靠回購呢啲「財技」（但很有用）。講到話會加大投資，重塑品牌，再開分店咁，但當然呢啲都要錢，所以叫停咗回購。

17. 暫時睇，投資者嘅反應當然係唔高興，唔好同我講咁長遠嘅嘢啦。況且，佢老哥都七十歲，個世界同佢創辦公司時都好唔同了，況且，仲開分店？實情仲有邊度未開？

18. 當然，2008年佢出山，一樣係算成功。而你話公司食老本冇增長亮點都好，過去五年，都升四五成，唔係好強，但還可以。

19. 股價呢，都真係殘殘地的，如果信佢老哥又可以扭轉乾坤，可以諗下。我都有諗過買，但還是不了，短期內都未必會。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。