林鄭唔玩，港股升到一個月高位，但又關中概股事？知乎虎牙鬥魚，騰訊系中概股大升。冬海SEA低位彈返六成　—但同高位比得返三份一。點避免呢啲情況？Tesla強，Twitter更強。前者我執150%，後者都上返水面 (Patreon)

林鄭唔玩，港股升到一個月高位，但又關中概股事？

知乎虎牙鬥魚，騰訊系中概股大升。

冬海SEA低位彈返六成　—但同高位比得返三份一。點避免呢啲情況？

Tesla強，Twitter更強。前者我執150%，後者都上返水面

1. Yo！係咪估唔到咁快復出！星期六入院做手術，星期日出院，星期一覆埋診，情況幾好，當然仲要繼續一路康復，但你見我都寫到Patreon，即係還好．亦見到之前我話寫唔到，就真係寫唔到。

2. 都係好感激呢兩個月一路支持嘅大家。雖然我都仲係有排未返到去第一次手術前（年頭）嘅情況。

3. 但結果，今次一日Patreon都冇miss到，對得住大家啦？

林鄭唔玩，港股升到一個月高位，但又關中概股事？

4. 先講港股，鍾意嘅可以睇埋我在明報篇文（Attachment 亦有）。留意我係星期五晚寫嘅，當然唔會知道林鄭話唔連任，亦唔會知道星期一港股大升（460點，2%，算多了）。但我就早早寫咗，如果呀某人唔做，而恒指大升，又會有人話「市場開香檳慶祝佢走」云云。

5. 你當然可以對林鄭不滿，照計好多人都好不滿。但正如我講，你將佢唔連任，扯上去港股表現，咁你嘅思考能力只會越嚟越低。

6. 正如我半個月前都講，都係成也中資股，敗也中資股。你見科指都係跑贏恒指，明顯唔關咩特首事。特別之前嘅中概股審計問題，而家又可能話講掂數。

7. 但大家知我立場，你話買咩騰訊阿里巴巴，可以。其他啲根本錢都唔多賺嘅，我就有保留。你當賭大細都冇所謂，但明顯係人地在暗你在明的，大把內幕消息你唔知。

8. 港股又好，美股又好，你見由3月到而家，你要做嘅，就係唔好亂咁畀人震走。你睇隻中海外688，今年已升35%，表現好過好多你以為點sexy嘅公司。（實情任何股票一年有三成都好好了）。但有冇留意，往往啲人都係升晒先去買？固然好多時事後先知咩叫「升晒」，但留意個市場氣氛，好多人都係最多人買股票時自己去買，但偏偏大家都知，呢啲時間又比較危險。

9. 呢個就係股市差不多不變嘅道理，因為背後係人嘅遊戲，而人性咁多年都冇乜點改變。

知乎虎牙鬥魚，騰訊系中概股大升

冬海SEA低位彈返六成　—但同高位比得返三份一。點避免呢啲情況？

10. 可能我miss咗，但我見唔到有咩特別新聞。但中概股ADR大反彈外，騰訊系嘅呢堆嘢，特別強（呢個係CNBC嘅app）

11. 順手講埋，同樣係騰訊系嘅「東南亞小騰訊」冬海SEA，唔止一次提過，但最後我都係冇買，「實在太貴」，雖然你見呢啲「貴」有時真係幾主觀，就真係靠你經驗同感覺，而且成日都唔準。

12. 但又睇睇隻冬海，好似都有讀者買咗，咁正路係一定輸錢。高位見過370蚊，一路插，上個月低位去到85蚊，真係高位插八成咁滯。而家彈返上135蚊左右，高位嘅三份一左右。

13. 但公司有冇變過？咪又係咁。大家都知，殺估值嘛。

14. 點避免中伏？都係有啲難。一係你唔好買啲波動咁大嘅股票，齋買SPY，但你又嫌悶。一係你夠膽低位買，但多數人都係高位追，只爭在幾高。又或者，至少你夠坐得，如果你仲未走嘅，我覺得係仲可以坐的。但你85蚊止咗蝕嘅，當然冇仇報

15. 當然，一個好關鍵就係，你間公司係咪一路仲有成長，就算唔係好賺錢，至少啲收入都越做越大。係嘅，都仲有啲機會畀你咁捱返上水面，唔係嘅，就冇計了

16. 仲有，再講一次，唔該你唔好只係在個市「好」嗰時買股票，否則你發現自己買乜都買貴。最理想當然係滿地鮮血時買，但太難，退而求其次，市好買，市差又買，幾時都買。唔好永遠貴一貴先搶。

Tesla強，Twitter更強。前者找執150%，後者都上返水面

17. Tesla又抽返上嚟，我係有嘅，但我係470蚊買嘅，仲要之前已經斬邊食咗一半，你而家追入去，又另一回事。呢個係好奇怪的，照計你幾錢買，同間公司值幾錢冇關，係咪？但，大家都係人，我當你今日1100蚊買，下星期Tesla跌一半，你唔驚？但我就唔會驚，我只係賺少咗（固然有啲人賺少咗都會急急腳走，但至少，蝕錢嘅壓力係大好多的）

18. 至於呢排Tesla強乜？上次都講過下，可能跟科技股，可能因為德國廠，可能因為油價升（但油價高位回落唔少）。另外仲見到，個出車數字好強。但都係嗰句，1萬億市值嘅公司，仲可以升幾多？咁你會質疑，喂，咁你買蘋果微軟嗰啲又夠大。但，一來嗰啲公司盈利強好多，二來，「我唔係而家先買」，三來，我有耐性嘛。

19. 而關於Tesla，今日最神奇，當然係炒起埋 Twitter．呢隻嘢值得講，因為我有買。但我買得好少，兩萬蚊港紙左右。對，係舊年咩Webull之類狂推優惠時開戶的。事後睇，明顯嗰時個市已經去到爆煲邊緣

20. 隻嘢高位73蚊，我就應該係在佢業績後大插時買，56蚊，十月定十一月咁上下。之後一路跌，見過31蚊。但照舊，我先唔會走去「止蝕」。始終公司用戶呀，收入呀，影響力之類仲在，唔係真係完全發夢嘅公司。

21. 咁，往往去到唔知咩位，就會有啲消息爆出嚟，甚至有人買咁。

22. 留意返，買嘅係Elon Musk自己，唔係Tesla，買嚟做乜？唔知，亦唔使認真討論。以佢嘅影響力，要帶起隻嘢炒高，應該好容易，就睇有冇足夠嘅跟風者了。

23. 傳出呢個消息後，Twitter當然炒咗上去，差不多升30%，上返51蚊，即係同我買嘅價差唔多。See？間公司正正常常的話，都仲係有得守嘅。

24. 但最重要三樣嘢：第一，我冇走去「止蝕」。第二，間公司仲係正正常常。第三，我買得細。

25. 希望大家不停睇呢啲例子，會學到啲嘢。而唔係只係好general 咁問，隻股票跌咗落嚟，點算？呢啲問題冇答案。你買乜，買咗幾多，先係關鍵。亦係呢個原因，你最好真係都了解下間公司先買。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。