盈富基金踢走道富換恒生，咁點？外資撤尼？聽日恒指大跌？In KS We Trust：長實1113就增持，長和1就回購。邊樣對股價好啲？Prada 升，LV升，愛馬士升。但升乜？業績快講：中銀香港2388，減派息喎，點算？業績快講：中國銀行3988，9厘息，見過未？業績快講：建行939。4倍PE，3000億純利，見過未？ (Patreon)

盈富基金踢走道富換恒生，咁點？外資撤尼？聽日恒指大跌？

In KS We Trust：長實1113就增持，長和1就回購。邊樣對股價好啲？

Prada 升，LV升，愛馬士升。但升乜？

業績快講：中銀香港2388，減派息喎，點算？

業績快講：中國銀行3988，9厘息，見過未？

業績快講：建行939。4倍PE，3000億純利，見過未？

盈富基金踢走道富換恒生，咁點？外資撤尼？聽日恒指大跌？

1. 盈富基金呢壇嘢，大把花生，你見我Facebook Page都寫咗篇文，呢度都有貼。但撇除啲花生是非，呢度就講啲真係關你事嘅嘢。

2. 我假設大家知咩係盈富基金啦，一隻追恒指嘅ETF，本質同咩SPY QQQ冇乜分別，照單執藥買恒指成份股。個問題係，之前個經手人道富（State Street）係美資，原本冇問題，但有一期美國禁止任何美國人美國公司買中移動喎。咁死啦，我點照單執藥？咁嗰時話唔買中移動，咁咪會跟唔足，咪會有人嘈。搞咗幾日，道富又話唔怕，可以照買（相信問咗美國政府，只係我估），但難聽啲講句，你道富又冇乜咁巴閉，「美國人行中國人不行？」，日後美國禁買騰訊，咁你又點？次次去拎豁免？加埋啲政治嘢，扯，索性飛甩你，咪最簡單。

3. 有一排盛傳係會畀中資做（南方東英自己都有隻ETF追恒指，實情差不多一樣嘅嘢，Panadol咁之嘛），但最後恒生中選，就係咁。

4. 有乜影響？近乎冇。會唔會有人見唔係美資主理變咗港資就驚驚唔玩？理論上可能有，但，啲咩流出流入，對你隻嘢，有乜影響？你買SPY QQQ時邊位有睇過幾多流入流出？（當然你去到好極端隻嘢變得好細，就對啲交易費之類可能有影響）。

5. 最重要嘅係，減價！詳情新聞有講。盈富基金嘅管理費，分層式，原本0.025%-0.05%（100萬收250蚊至500蚊），而家減到0.015%-0.045%，實際上大約減三四成。

6. 咁當然對投資者係好，我懷疑呢個亦係恒生中標嘅條件之一。減價嘛，益咗散戶，你見官府出嚟講嘢即時易解釋。減價喎，仲有乜好嘈？唔順超呀？寧願貴啲都要鬼佬嘢？得，你咪買3115。安碩，Black Rock嘢（不過點解決制裁嘅問題就唔知）

7. 正如我講，盈富基金呢啲，技術含量唔高。BlackRock有3115，南方東英又有3037，而恒生自己本身咪有隻2833！

8. 你見到，真係Panadol咁，亦係資產管理，特別係指數ETF常見嘅現象，我寫過幾次。最後，就係鬥大，因為夠大，就可以以本傷人，鬥平。咁你而家明點解恒生可以減價啦，佢原本都係做緊同一隻嘢啦，根本同一班友同一堆嘢之嘛。

9. 亦解釋到，你盈富基金，1100港紙億AUM，我當你真係收到0.05%都好（實情當然冇），都只係五千萬，你同道富甚至恒生嘅規模比，唔算好大。但好在乜？好在，近乎係凈執的，根本冇extra cost咁滯。

In KS We Trust：長實1113就增持，長和1就回購。邊樣對股價好啲？

10. 本身就例牌嘢，都循例通知大家。李嘉誠又增持長實1113。但同時間，留意埋，長和1都做埋回購。

11. 好啦，邊樣會對股價好啲？都有啲難講。傳統嘅講法，增持係大股東自己嘅錢，回購就只係上市公司嘅錢，當然係大股東增持利好多啲。

12. 另外，如果你睇力度，增持就成1500萬港紙，回購只係幾百萬港紙。

13. 但不過，我地講緊係李嘉誠，唔係啲三四線公司搵人笨嘅大股東，似乎呢個「公司錢」vs「自己錢」嘅分法冇乜意思。仲有，增持，就唔影響公司任何基本因素，但回購，就會減少咗股數，提高咗每股盈利的

14. 然後睇股價，今年長實1113升9%，而長和1就升夠13%的。

15. 當然，以上呢啲都真係事後嘅narrative，實則你問我，增持好定回購好？都難答。咁買邊間？當然最好兩間都買晒。

Prada 升，LV升，愛馬士升。但升乜？

16. 順手一提，星期三朝早隻Prada 1913 唔知做乜忽然升咗兩成幾，咁固然之前業績幾強，呢隻亦係少數香港引入海外（非中國）公司上市嘅成功例子。但，照計乜業績都反映晒啦。而收市都仲升10%，奇怪。

17. 更奇怪係，連歐洲啲奢侈品股，都全線升，我就都唔係好明點解。可能俄烏有機會停戰有閞？真唔知，但分享咗見到嘅嘢先。

業績快講：中銀香港2388，減派息喎，點算？

18. 點解講呢隻先？因為有，渣唔少添，而家叫做打過和，當然收息歷嚟都唔少。但今次業績，就似乎麻麻地啦喎[IL1] 。

19. 只睇大數，個每股盈利就倒退13%，2.1726。最關心嘅派息，如果計全年，就1.13，都跌，但跌9%，少過盈利跌幅，即係個派息比率升咗少少，大約52%，同佢地傳統指引水平都差不多。

20. 股價就28.45，即係大約4%股息率咁。今年已經升10%，所以星期三有個比較大嘅趺幅（5%？）都唔奇。但理論上今年下半年經濟應會好返啲，而公司又幾有信心個息差唔會再跌，所以…….還好吧。

業績快講：中國銀行3988，9厘息，見過未？

21. 亦係只睇大數，每股盈利0.7人仔，按年升12%。派息就0.221人仔。股價就3.05港紙，計下，股息率8.9%，嘩。市盈率就3.5倍，嘩。

22. 實在太殘，今年升8%。都真係殘到一個點就變得好抵買，但之前迷失咗N年。你可以留意，中銀香港都仲13倍市盈率，阿媽就3.5倍，當中係咩回事，就真係唔易答了。亦真係部份因為有啲人覺得中資銀行嘅數係假（但，派息入到你戶口，冇得假下話？），或者有啲基金早早係唔買中資股嘅。

業績快講：建行939。4倍PE，3000億純利，見過未？

23. 最後係建行，又係睇大數。每股盈利1.19人仔，升12%。股息0.364人仔。股價就5.75，計數時間，股息率7.8%，3.9倍市盈率咁，冇中行殘得咁緊要。今年升咗6%

24. 之後我仲會搵日講中信銀行998，冇乜特別，業績早出咗，就係十分鍾意講呢間。但肯定嘅係，首先唔同行業嘅市盈率不能相比，甚至我見啲讀者買股票根本都唔睇估值（然後輸錢又唔開心，雖然我知估值好難掌握，但不代表不重要）。但即使係同行業，甚至同一個市場，你睇，好似最貴嘅中銀香港，都仲係今年做得最好，看似最平嘅中行，就三隻中最落後，就唔係咁簡單嘅。

25. 我並無持有任何中資銀行（以前就有），但殘到一個咁嘅點，真係有啲想買，至少，可能好過我買3187？當然，大陸嘅嘢，始終好多難以預計嘅事，忽然叫你個行業「讓利」你就夠死，亦唔係未試過丫。你睇好似講到經濟好唔掂，但呢啲銀行，一年3000億純利，你覺得冇問題？我就覺得係有啲問題的。仲有，如果你在收息嘅角度，人民幣亦係一個問題。呢期就人民幣強勢啫，但，之後跌返兩三成，有幾出奇？當然呢個係你買所有非香港公司都會有嘅問題，亦不見得人民幣特別波動。

＝＝＝

富途嘅，唔使link，download 佢個app，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開：vbrokers.app.link/e/ivanli

Webull嘅：a.webull.hk/i/IvanLi

USMART：usmart8.com/kol/r/G6

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。