［勞蘇基金死因研究］ (Patreon)

［勞蘇基金死因研究］一句：backfire．兩個字，犯不著。三個字：機會成本。四個字，risk and return．五個字：calculated risk

1. 好啦，上篇文講咗到底勞蘇基金係咩回事（https://fbook.cc/3mxy）。　咁聽落，幾好丫，400人，每人50萬港紙，計埋「歡樂滿東華」，咁預1億去勞蘇基金。當中管理費，我落袋嘅你當1%（唔係全部去晒我度啦），一年100萬。都幾美好啦。仲要未計「表現費」喎，固然冇包生仔，咁但，可能真係生三胞胎呢，升市個個都股神啦，係咪？咁舊年我同你買SPY都升三成啦，「都分你30%入面嘅20%」（可能仲要同間行再分）。1億嘅30%嘅20%喎，6球嘢喎！（當冇hurdle rate的話，唔知係乜又係有得佢）

2. 咁點解，都係胎死腹中？

TLDR：而家一個月你畀一舊水睇Patreon梗係輕輕鬆鬆客客氣氣。試下你50萬老婆本畀我，我同你一個星期輸咗10萬丫，睇下你到時咩面口？

TLDR2：你見到呢，我寫文好似好張狂，買股票好似好大膽，但做嘢我係好小心嘅。中產嘛，機會成本。唔好backfire

3. 本文同你剖析下，勞蘇基金嘅死因。都係分享下，叫做有個交代咁。但再講一次，個真相可能令人唔愉快。

4. 我係要做得好睇嘅，好簡單。借我青光眼手術呢件事，打蛇隨棍上，話唔想太操勞，加多句多啲時間陪屋企人。「個病令我知道乜嘢先最重要」，DLS，完全就係心靈雞湯。成件事so馬時亨（諗唔起第個）。

5. 但我就真係選擇質你食red pill 嘅人嘛（又，其實邊有人會話自己食blue pill？大家都自我感覺良好啦）

6. 好，真相。首先，搞呢啲東西，OPM嘛。咁最難，當然係籌旗啦。你都想像到，你籌到幾百億嘅，任何問題都有人幫你解決晒啦。

7. 咁直接啲講，係咪我冇號召力，唔夠數？又唔係喎！

8. 一早講明，唔夠數我唔會開檔。你如果一年得幾廿萬落袋嘅，就真係don’t mess with me 了，thanks but no thanks．我又唔係要證明自己乜。

9. 而冇呃你，過程中，係好多人叫我唔夠數都照開檔，有成績自然有人嚟。我當然有禮地心領，但心中諗嘅：鳩唔知咩。我年年升幾倍嘅，人人爭住畀錢我添（Cathie Wood嘅嘢）。「咁如果冇成績呢？」。係咁易嘅，你做咗啦。

10. 然後又總有啲友（all due respect，比較有錢嘅人，甚至係公司），婉轉地同我講，老細，你冇track record咩都冇，咁山寨，有啲難搞。咁等於你fresh grad搵工嗰時嘅catch 22：我冇第一份工，又點有工作經驗呢？（實情好多出面鳩流流track record都係搵笨實，你冇出面fund audit嘅，自己開個富途當係，即係一邊買升一邊買跌咁，實做股神的，但冇所謂，好多人信，但如果你去到拎大錢就不能咁求其了）

11. 但，天有眼，即使冇任何track record 下，咁400人，都真係夠數的！固然未真係去到畀錢，咁一日未見錢都未係真，但即係，我有理由相信，最後係可以有200人的。夠數

12. 所以唔係因為唔夠數。係夠數的

13. 咁係咪因為我收得太貴？「Cathie Wood都係0.75%咋，你何德何能收到2%」，呢句就真係多餘，你睇多上面嗰段一次就明啦。夠數，咪即係唔係太貴咯，滿意冇？我話知你同我講話平啲可以多10倍錢啦，總之夠數　is夠數，有邊隻字你唔明？（結果你買Cathie Wood咪輸撚到仆街，佢就OPM袋袋平安。我肯定你幫襯我唔會輸咁多先）

14. 同樣地，你話「你做分析員就叻，寫文可能仲叻，但落場炒係另一回事」。我完全同意呀。但，又係睇多次頭先嗰段啦。夠數is 夠數，打後嘅，打後先算啦。我衰咗你可以講呢堆，但我都未開波已夭折，就因為其他原因啦。

15. 至於你質疑我有冇咁能力嘅，都係　樣，結果就　切啦，夠數咪夠數。我有咁多人肯信我，咪就證明我有咁嘅能力。你可以話呢啲唔係咩大錢，但我目標就只係咁，夠數咪夠數。即係你不能話踢丙組嗰個冇能力，咁佢踢得咁多年丙組，咪就係有丙組嘅能力。係咪埋沒咗佢，另一回事。但你總不可以話唔係甲組就冇能力—因為丙組嘅都勁過好多普通人嘛。（又係「Jeff Bezos先算有錢」論）

16. 至於其他咩監管上呀，麻麻煩煩嘅技術細節呀，根本都解決到。難聽啲講句，我分多啲出去，咪有人同我解決到。

17. 同樣地，你講咩收費嗰啲，都只係量嘅問題，咁嫌貴我係咪收平啲就得？但而家我係講緊成個本質嘅問題。就唔係呢啲細節位可以解決到。

18. 好啦，賣咗咁多關子，講咗咁多「唔係因為XX」，講第一個真係有關嘅理由

19. 就係市況

20. 你可以回想下，呢壇嘢，緣起係我畀人炒魷，即係2020年尾咁上下。搞得嚟，都係2021年中。市況非常之熾熱。事後當然睇到，係開到荼蘼。拿，真係當時已經聞到些少燶味。你睇，之後啲各方妖獸，ARKK SPAC 乜幣物幣，好多都死晒。

21. 但當然，唔係真係100%一早料到啦，「否則我成副身家買SARK發咗達」

22. 搞勞蘇基金途中，市況係好熾熱的。你心諗，「咁咪好咯！」。唔係市況熾熱先好？yes and no

23. 再坦白啲講，「視乎你有冇良心啦」。

24. 市況旺，的確拎錢唔難，亦可能因為咁所以我都夠數，嗰時真係個個都FOMO，驚執輸。咁你要快手掠一筆嘅，當然係可以。

25. 但，忍笑吧，「我真係個有良心嘅人」。我嘅直覺係，咁情況下開檔呢，就多數瀨嘢。咁當然會連累我畀人媽，做臭自己個名，「否則我都未必好介意」

26. 事後孔明又好乜都好，但如果真係開咗檔嘅，就瀨晒嘢啦！幾乎肯定，就會摸頂買啲貴嘢，然後出事。喂，你畀2%，唔係諗住我同你買盈富基金或者買SPY下話？「至少都砌多隻LVMH 畀你啦」

27. 咁，咪應咗我TLDR嗰句咯：你50萬，我一個星期同你輸咗10萬，到時你估下你咩面口？而舊年年尾，或者今年年頭，呢啲嘢真係會發生。刁，Facebook剛剛一晚都跌咗20%啦！大藍籌喎！

28. 我寫文成日引一句，Only the Paranoid Survive，原文唔係講投資，但用落投資度一樣。投資就係一樣咁精神分裂嘅嘢：

29. 你越覺得應該做時，就越唔應該做。

30. 冇錯，正係市況最大煲時，最適合開檔，但嗰啲時刻，搵人科水都難。所以退而求其次，不溫不火，Goldilocks，金毛女孩三隻啤嗰時開檔。當然你夠冇良心嘅，咪最旺時拎舊大錢，然後摸晒頂，冇所謂，你咪拎一兩年管理費，然後摺咗隻嘢佢，改個名又再出嚟呃飯食，由勞蘇基金變咗熊抱哥基金，個個都係咁做。隻嘢潛水70%，你點上返水面收表現費？咪摺咗佢

31. 咁但，我就真係犯不著咁做嘛。又係嗰句，拿，你有幾億落我袋我就同你癲。但幾億AUM嘅，咪玩啦，「梗係要道德高地」，犯不著呀，錫身，珍惜羽毛。又唔係一窮二白，無謂做壞自己個名丫。

32. 所以帶到去，就係TLDR嗰樣嘢。點解唔搞？一句：backfire．兩個字，犯不著。三個字：機會成本。四個字，risk and return．五個字：calculated risk

33. 你諗真啲，個downside實在太大。

34. 50萬港紙，話多唔多，但話少亦唔唔少。你話唔係錢嘅，歡迎你即時捐畀我。讀者有50萬，點解唔拎去自己洗咗佢？可以做幾多嘢？就算想拎去投資，點解要經你？

35. 認頭嘅，唔少係我嘅朋友，有啲後生讀者，50萬可能係佢地半份甚至成份身家。我好感激佢地咁信任我，但又真係造成我嘅良心壓力。

36. 有個直頭話拎份保單去融資拎50萬，我話萬萬不可。好感激你信任我，仲多過我信任我自己，我都唔會借錢投資。但千萬唔好咁玩。

37. 再加上，唔少工作上嘅朋友，特別係以前嘅師傅老馮，都認為勞蘇基金唔係一個好idea，而我唔相信佢地係因為眼紅我啦（扯，又唔係好多錢，有乜好眼紅）

38. 呀老馮都同我講咗唔少嘢，但概要就係「埃汾，你冇你想像中咁冇良心」，你真係可以話知啲客輸錢，一句OPM就拍拍屎忽袋袋平安？「你係咁冇良心嘅就唔會咁窮啦」（呢句我自己加的）

39. 現實啲，你係我朋友或讀者，咁你嗰50萬，我一個月同你輸咗20%嘅。你估你咩面口？好人啲嘅，咪口中不說但心中有條刺啦（特別係如果畀老婆知道），正路嘅，應該冇朋友做啦，人之常情。再極端啲嘅，周圍唱鳩你都係好合理丫。輸撚咗我10皮嘢喎。你見有啲讀者真係隻嘢跌幾%已經問我點算

40. 更甚嘅，仲會影響埋我個Patreon喎！即係原本好地地嘅收入都影響埋。為乜要受呢啲風險？都係嗰句，你有幾億落我袋，我就同你癲。

41. 呢度仲帶到去三個問題。第一，機會成本。我最初諗呢壇嘢時， Patreon一年可能四五十萬，咁勞蘇基金可能一年成百萬喎，多200%。但搞搞下，我Patreon去到過百萬一年，而家近兩百萬（公開資料啦，又，我有報稅的），見到分別冇？而家個Patreon就要好好保護了，唔好做壞自己個名。

42. 第二，你話，扯，你話調整唔怕嘛，低位再買。但，呢個就係分別啦。係我自己嘅錢當然唔怕，但，你有冇我咁坐得？直接啲講，堆嘢高位跌兩成，你仲唔嚇到瀨屎，即時贖返晒？但我自己啲錢我就唔會。所以我好婉轉地講，問題唔係我坐唔定，係你坐唔定嘛。你畀我就有信心，但因為你可以中途拎錢走，我就冇信心，「除非你授權我扑暈你」

43. 咁當然啦，我可以話玩一年兩年鎖定期嘅，但，如果有呢啲條件，又係咪可以夠數？唔好忘記，散仔個個都講「止蝕」，鎖定期即係你冇得「止蝕」，你制唔制？況且，最初我同大家溝通，都冇講鎖定呢樣嘢嘛。就唔想好似臨時先又加啲嘢咁了

44. 仲有最後，係咪我諗得人性太差？又唔係。即係，我估大多數人都係好人嚟嘅，照計絶大多數都會理解，喂，市況嘅嘢，我想架咩。然後剩低嘅，都有大部份係敢怒不敢言，當自己信錯人。

45. 但問題係，呢個世界上麻煩嘅人雖然唔多，但就好有破壞力。你有幾丁友周圍唱，就已經夠煩了。咁而你真係輸咗人地啲錢嘛。固然我係仆街嘅，可以講句「包生仔咩」。但，你真係輸咗人啲錢嘛，搞到咁就無謂啦。況且，仲可能係朋友嚟喎。搞到咁，有乜謂先？「又唔係好多錢」「你有幾億我就話知你」

46. 好啦，最難聽嘅真相嚟了。睇到呢度，你見到呢個business model，有一個好大嘅flaw

47. 1億，我拎1%，一年100萬，呢度條數都冇乜問題，甚至可以進取啲。（但我就唔想再去不停咁R啲有錢撚呀 公司呀 之類）

48. 問題係，嗰1億點嚟，就大分別了。

49. 最好，就梗係一個有錢佬，包起1億，咁就簡單，就可以去馬了！因為真係有乜事都好，佢都唔唔得閒去唱我（有錢人嘅好處！），甚至佢都唔好意思畀人知，驚畀人笑，「吓條肥仔咩track record 你畀一億佢？」。又或者，我畀佢去執一劑（？）消消氣，咩都好，一條友就易搞。

50. 呢呢呢，如果搞到200人嘅，實情就煩的。都係嗰句，99%都係講道理嘅人，但有1%，2個痴線嘅，日日去公司樓下靜坐，你就已經煩啦。

51. 結論？真係喎，好彩冇搞，搞咗就真係會出現「你畀50萬我我一個星期輸咗你10萬」之類，仲要係出statement畀你，到時你又可以好似啲睇波阿叔咁，「做乜買呢隻呀？冇盈利都買（？），你冇嘢呀？」。有乜謂？

52. 所以，成個project，就咁收咗皮。

53. 當然never say never，都話市況都係一個關鍵。可能之後我又搞類似嘅嘢。但肯定嘅係，入場門檻會高好多了，同埋限制會多好多，可能鎖定期長好多，每次贖回收你貴一貴（即係迫你冇得贖），甚至唔會所有交易都通知你（唔知得唔得架呢？研究下先）。

54. 所以？「儲定多啲錢吧」

55. 不日再會。

56. 呀當然，如果你有1億甚至更多，係可以隨時叫我起動返個project的！

57. 未有嘅，join 住Patreon先。你今日冇，好快會有。

=====

月頭訂最抵！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，

富途嘅，送蘋果加200蚊股票現金券，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開，送1200股票現金券：vbrokers.app.link/e/ivanli

Webull嘅，送兩股Cisco：a.webull.hk/i/IvanLi

USMART，都送蘋果，月供美股好用：usmart8.com/kol/r/G6

============