Kill your darling （勞蘇基金） (Patreon)

1. ［Kill your darling］新正頭，幫勞蘇基金整個訃聞。冇錯，已經胎死腹中。都講過，我嘅特點（優點定缺點？睇情況）係，一般我唔會死頂，即係唔係咩《足球小將》戴志偉打止痛針頂住上嗰啲，一般我話OK，就真係OK。唔OK就真係唔OK。咁真係唔得，就唯有打消個念頭。又冇乜嘢嘅

2. 損失，實在冇乜，叫做「心願未圓」咯。但，人人都N咁多心願未了啦，講到尾ego啫，亦唔係我嘅top priority, 不值一提。況且，個心願，拎住人地啲錢喎，唔好夾硬嚟。

3. 講明先，你知我最高透明度，以下講嘅嘢，可能會有啲人唔係好開心。但冇法，真相就係令人唔開心的。Truth？You can’t handle the truth．

TLDR：400人，每人50萬港紙。夾埋1億。管理費我落袋1%。一年100萬。如此美好，c’est si bon．好似係，除非唔係。咁點解唔去馬？又，點解400人 每人50萬唔係2億？文入面解。

4. 之前都唔少人知勞蘇基金已經八萬五咗，有啲朋友私下知，亦都好多人見我慢慢冇提就知道收咗皮。

5. 成件事十劃未有一撇（當然要行可以行得好快），冇乜需要交代。我亦都一個仙都未拎過。頂多有啲人係口頭承諾。我亦都講過，絶對冇壓力，no hard feeling，到時你一樣可以變掛，唔使覺得唔好意思。

6. 金融嘅嘢，you are done，quite simply，就係you are done．咁一日未done，就係未done．而我當然亦都factor in 埋呢個百份比落去，一早預有唔少人會答應咗但到時唔科水。咁好多原因的嘛，可能老婆知道反對，可能睇清楚我嘅為人，可能買ARKK輸撚晒，可能炒幣已經發咗達唔使同我一般見識。或者其他技術問題。咁我當然會「歡樂滿東華」，預計埋呢啲東西。正如我地搞講座，200人報名，有100人出現都幾好。

7. 所以真係冇欠任何人任何嘢，中途但凡有人嚟問我（全部都好客氣），「喂你壇嘢點架？唔係開動嘅我有其他路數喎」。我都一定係叫唔使等我，有錢要用自己用咗先。

8. 所以，只係一個心路歷程分享咁。舊年勞蘇生日（11月）已經想寫，但你知，一路忙。咁好啦，呢幾日做完手術，而家打到下文，但仲未寫到Patreon，啱晒寫呢啲。

9. 唔再搞勞蘇基金，係舊年10月左右嘅決定，所以當然同我開刀之類冇關。

10. 首先講返，勞蘇基金到底係咩回事。

11. 勞蘇基金，technically 並唔係一個基金，只係個名咁叫方便。實情要正式搞隻基金，是好煩嘅一回事，我係唔會搞的。Period

12. 咁但，係可以用一個「授權戶口」嘅方式，做到類似嘅效果。當然全部合規合法，犯法嘅嘢我唔會做，N咁多人都打開門咁做緊。全部有晒文件呀乜，唔係咩私下「我幫你炒你分返畀我」咁化學。

13. 正如我之前嘅文講，200條友，每人50萬（港紙，下同）。夾埋1億嘢，pool晒佢。當然我要搵間有牌嘅公司，掛個牌。然後你地呢200個人就去開戶（做KYC做suitability test 都做到你傻，唔知係乜就有得佢）．

14. 然後，就全部授權晒畀我。咁當然本人唔係倫敦金，唔會出出入入食晒你啲佣。之後呢啲戶口，全部行動會一致。例如今日開張，人人50萬。聽日我話齊齊買10萬蚊Peloton，咁咪齊齊買。你個戶口唔係50萬係200萬？咪pro rata返，大約係咁。（當然你買股巴郡A股就煩，所以唔會買）。而你係會睇到我做乜嘢嘅，有statement嘛。但記住所有決定係我做，你只係收到通知。當然你可以選擇唔玩，至少在開頭嘅講法，我呢個勞蘇基金，冇任何lock up，你隨時可以拎錢走。

15. 咁去到最重要嘅位，「我賺乜？」。

16. 類似以前啲對沖基金，2/20，two and twenty．即是甚麼？即是2%管理費，硬掘，點都收你，贏輸都收（係咪好和味呢）。當然係計AUM，即係你入50萬，一年硬掘咗你1萬先。

17. 咁20%呢？就表現費。贏嘅部份，我再收20%。即係例如50萬我幫你一年炒到上100萬，咁淨賺50萬係咪？呢度我再抽20%，即係我拎走你10萬。你年尾係得90萬，而唔係100萬（未計管理費，計埋就係89萬）

18. 大約就係咁回事，至於咩high water mark呀嗰啲就唔解了

19. 睇到呢度，有乜感想？「嘩屌你食水咁深」「搵笨實喎」「人地XXX都係收幾多幾多咋」

20. 但我可以不客你咁話你知，以上呢啲，真係廢話。

21. 直接啲講，關我撚事，關你撚事。即係我開間星巴克你同我講麥當勞賣緊12蚊杯。或者我開間乜乜隱世小店收你60蚊杯你話星巴克收30蚊。

22. 嫌貴嘅，扯，唔好買咯，有幾難明？

23. 總之合法，又計得掂條數，又有人幫趁就得啦。唔好成日都「網友最撚醒」。「都唔明XXX收XXX做乜有人幫襯」。咪話存在即合理咯。

24. 再粗鄙啲，你可以話你去叫北姑1200蚊，港女冇波冇服務，憑乜收3000。你理得人啫。或者有人就係鍾意本土風味呢，或者就係冇乜人幫襯但佢都唔想做平個價，反正本小姐又唔係等開飯。乜都好。總之，嫌貴嘅，唔好買咯。有幾難明？

25. 正如我Patreon都唔係最平架，沈旭暉肯定平過我先，而佢又肯定叻過我好多喎，係咪？咁所以佢咪多人睇過我咯！佢又發過我咯！

26. 但我自己搵到食就得啦。

27. 好啦，講多少少。唔好忘記，2/20，係你畀嘅錢啫，亦係「勞蘇基金」收嘅錢。但不等於我收嘅錢嘛！知冇？即係，我當係一樓一，都要畀租畀廣告費whatever啦

28. 之前都講，我要搵間行同我一齊合作嘛。唔通我自己手寫statement 畀你？仲有各式各樣嘅東西，仲有人地個牌，好值錢的說。難聽講句仲有個risk premium，人地如果同我三唔識七嘅，點知我有冇古惑？陣間畀證監查又好罰又好啲客去樓下掟雞蛋又好，都係風險。同你有親？

29. 咁所以，人地梗要分一舊啦。

30. 細節不講太多，但2/20，去到我度，應該係1/10，或者1/15。係喎！你發現後半截我都未正式傾

31. 呢個亦係有點反常嘅。即係話，我真係著眼個管理費先，表現費？刁，包生仔咩。當然個個講就天下無敵啦。之前個個股神添。而家呢？

32. 帶落去，實情我並唔係一個好典型嘅「金融撚」或「基金撚」。你見嗰啲友一定講到天下無敵的，就算心中唔係咁諗，都係要咁講。大佬，唔係點sell客呀？刁，一年一個開，三年發達，五年買起全日本啦。

33. 「但我係一個有良心嘅人」。至少金融上係。你地啲錢嚟喎，唔好忘記好多會開戶嘅，係我自己嘅朋友。佢地咁信我，我都不能太冇良心下話？

34. 同我一貫作風一樣。封咗蝕本門，睇咗downside先。你唔好同我講咩做YouTuber有人搵幾多千萬，我只知好多最低工資都拎唔到，唔好睇maximum，睇埋minimum．我只係知香港做醫生嘅，最撚折墮嘅都六七皮嘢個月啦下話？

35. 同樣地，早排我寫文，你見我寫定，如果盲咗點算。睇定個最差情況先。冇話一定發生，亦冇話好大機會。但，順境波人人識踢啦。我就要諗埋，我一開波踢少件嘅，點頂到完場（你當保住首回合勝果）。

36. 亦都好明顯地，你見我之前咁多年，從來冇講咩搞個基金。事後睇返，「呢啲都真係大市見頂指標」

37. 基本上，做金融嘅，十個有九個半都係想搵大錢。咁金融業最美好嘅三個字係乜？當然係OPM，other people’s money

38. 以前但凡啲無無聊聛飯局傾合作，有時我係主角，有時配角，有時茄喱啡。但我成日玩個遊戲，萬試萬靈。就係大家吹到咁上下，我就講一句：

39. 「拿總之街外錢齊齊搵～～～」

40. 個效果就好似啲領導講話咁，去到呢個位，就係拍手位。然後大家就會「講得好！埃汾好波！飲！」

41. 我玩過好多次，可見OPM真係好東西。

42. 咁所以，十個有十個分析員，都覺得自己天下無敵嘅。識寫股票就等於識炒股票（但邏輯上明顯係兩回事，識講波等唔等於識踢波？），日日夜夜受啲基金經理氣，過年過節R佢地投票，個個恨不得自己楝支旗證明自己—咁多數最後都證明到自己係唔掂。但冇所謂，OPM之嘛。（咁當然自己點都會擺返啲，skin in the game嘛，勞蘇基金我都至少會放100萬啦，你都放50，冇可能我少過你。如果條友放得少過你你都信嘅，你都幾易信人）

43. 但我就真係唔同，你見我從來都係懷疑自己能力。雖然去到一個點，我有時都會諗，「嘩呢啲友咁撚廢都可以做，我點都廢唔過佢啩」。又真係咁喎。正如我網上寫文，搞Facebook Page，搞Patreon，都係咁。

44. 我一路都係懷疑自己嘅實力，但真係去到一個位，見到啲真係好廢嘅人，都做到啲成績。咁，「佢都得，我照計都得啩？」

45. 得咗。

46. 仲有一個契機，就係我畀人炒咗。天時地利人和。

47. 如果我仲返緊工，就冇可能有呢樣嘢。但到我畀人炒咗，就有戲唱。

48. 實不相瞞，呢壇嘢，最初甚至唔係我諗的，係有人幫我諗。佢就大約都係同我講「刁，即使我們錯，不比他們多」「畀啲信心自己，大把比你更廢嘅人都係咁搞啦」「總之街外錢齊齊搵，係咪咁話先埃汾」（呢句好熟）

49. 好啦，唔好咁虛。畀實數你。

50. 記住，我個勞蘇基金，嗰時嘅目標，係400人，每人50萬港紙。夠人就開車。

51. 條數點計？400人，每人50蘿，即係1億。我落袋嘅管理費，你當1%（都話你畀2%唔係我食晒），即係一年100萬。

52. 你話，喂，埃汾你點計數？400人每人50萬點會1億？大佬呀，咪話「歡樂滿東華」，「十個救火的少年」，到時改變主意呀，減少銀碼呀，咁預得返一半差不多。再唔夠就我去R啲有錢朋友或以前識嘅人，大約咁做。

53. 喂，一年收100萬，仲要未計我請條友喎，如果我請個正常嘅分析員，四皮嘢個月走唔甩啦下話？（你鬧我我都講句。四皮嘢以下嘅，我都唔敢請返嚟，講真你亦點唔到佢同你認真做嘢）。咁嗰度又50萬，刁，咁我落袋咪得50萬？咁就不如我做埋佢嗰份啦！分乜鬼析員！我咪今晚打老虎！

54. 然後呢個位你又睇到：我打工時，請人畀人工梗係不手軟，又唔係我嘅錢。但到自己收嘅錢拎一份出嚟，喂，就即時另一種心態啦。即係你自己在酒店做廚請人，同你自己開間餐廳咁。小店開張嘅，所有嘢盡量你都自己做埋啦

55. 係好現實的。

56. 總之，就係咁：400人。每人50萬。Adjust for 甩底，總數1億港紙。我落袋1%，100萬一年。人都唔請了。

57. 亦所以點解真係要夠人先開車。嗰時有人叫我係咪都上咗馬先，我睬你都有味。你一年冇100萬嘅，就真係唔好搞咁多嘢了，你估好多錢？「都未同你講交稅」。

58. 你如果話咩一年得50萬管理費落袋嘅，唔係我大口氣，屌，我不如打份工算啦。阿叔本書咪話你知，我2007年已經拎呢個人工（美好的前雷曼年代）

59. 你話，喂，「表現費呢」？刁，咪話，包生仔咩。唔係我冇信心，而係現實。唔講呢啲，講咗base case先。

60. 好啦，聽落十分美好。但點解胎死腹中？你可以估下。好可能同你想像中唔同。下篇文講。

61. 順手講埋，呢篇文原本係在Patreon出的，好多勞蘇基金嘅認頭人，都係嗰邊嘅讀者。十分感激。

62. 暫時仲未寫到Patreon，但好可能下個星期會開始寫返。未寫到啲好多圖或好多數字嘅，但可以寫下啲心法，或舊年回顧之類。記得join

=====

月頭訂最抵！Ivan Patreon 已經2000人訂！多謝大家！比別人知得多。subscribe now（bityl.co/9CyV） ，可以睇返晒以前嘅文。港美市場評點，專題號外，每日一圖，好文推介。每星期6篇，月費100． 畀年費仲有85折，

富途嘅，送蘋果加200蚊股票現金券，用我個開戶碼：9M85BY4D

IB嘅，買啲歐洲股日本股新加坡股，送佢自己嘅股票：ibkr.com/referral/yinha820

華盛，可能都多人未開，送1200股票現金券：vbrokers.app.link/e/ivanli

Webull嘅，送兩股Cisco：a.webull.hk/i/IvanLi

USMART，都送蘋果，月供美股好用：usmart8.com/kol/r/G6

============