阿里巴巴9988嘅嘢，北京交易所嘅嘢．新意網1686業績速評．畢菲特買日本股，我又買．買Bitcoin的教訓 (Patreon)

阿里巴巴嘅嘢，北京交易所嘅嘢

新意網1686業績速評（有Excel）

畢菲特買日本股，我又買

買Bitcoin的教訓

阿里巴巴9988嘅嘢，北京交易所嘅嘢

1. ASML SPGI又創新高，嘻嘻，但真正有趣係NetFlix新高，睇下有冇機會講多啲。但除此以外，美股港股悶得很，講下其他嘢。

2. 阿里巴巴，一方面話會2025年前投入1000億人仔，「共同富裕」。當然實際點做我都唔係好知，上市公司當係開支？定稅？會唔會走數？或者左袋出去右袋返嚟？但影響實有，不過阿里巴巴一年8000億，分幾年科1000億，還OK吧？最緊要係，保住條命嘛

3. 而另一單，講螞蟻直頭要同國企合組公司 —我就覺得直頭重大利好消息添。最緊要保住命仔，即係仲有得傾，仲有得玩啦。至少你話咩估值會大降？一Q早反映晒啦。所以你見昨日股價都強，騰訊都強，雖然ADR又麻麻。

4. 至於北京交易所？本人覺得，評都費事，乜嘢詳情都冇。出面啲友平時就講大陸嘅政策完全不透明亂嚟，但到自己講嗰時又個個知晒人地想點咁，一係又覺得港交所玩完（但ADR唔係咁反應），一係就覺得大陸嘅交易所冇Q用。真相？當然亦係兩者之間。你睇深圳上海交易所啲交易額好驚人的，但始終未開放資本帳，都仲同香港唔係同一回事。驚？冇驚過。況且，你控制到？控制唔到嘅，驚嚟做乜？

5. 不過又係一個好嘅故事教訓你，出面好多人寫文呢，就只係為咗引你注意。而好多人亦係樂在其中嘅。

新意網1686業績速評

6. 都好快提下，反正以前有講過下，又整過個Excel（今篇文最底有）。出咗業績，原文呢度，新聞呢度。但簡單嚟講，麻麻地。記住公司係6月底年結，今次係出全年（舊年7月頭至今年6月底）業績。

7. 業務？Facebook都有寫過。Date Centre，即係高端收租地產霸權。新地子公司，新地持股74%。你見好高負債的，但好大舊錢係新地借，雖然扣埋都仲係高。留意上年有啲業務賣咗，所以你只睇「持續」嘅得了。

8. 半年半年睇，收入，毛利，純利都些少增長，OK但冇乜特別。咁已經差不多講完。仲有留意公司雖然負債重，但係差不多派晒所有利潤嘅，股息分派比率往年九成，今年去到十成！但你見都只係2厘息多啲（0.194/8.18），股價表現強嘛，今年年初至今仲有得升，跑贏大市。

9. 呀最後留意，公司一向唔派中期息，所以最尾嗰舊（亦即係今次）亦係全年嘅股息。190億市值，一年8億純利，24倍PE，點都唔叫做平。

畢菲特買日本股，我又買

10. 早兩日講過畢菲特買日本股，一年執三成，跑贏日經同美股指數。仲有，過去年幾我都講日本股有趣（可惜我唔識日文），舊年FB Post都有講。勞蘇基金原本一大賣點都係會買 歐洲日本英國。

11. 不過，唔使等到勞蘇基金。我本人就會買日本股！買乜？過幾日話你知，收咗Patreon月費先有錢買，但唔會係太細嘅公司，相信亦唔會幾日升好多，所以唔使擔心咩太少成交，會唔會係我買咗沽畀你嘅問題—況且我都係長線持有，長線講緊幾年。

12. 留意返，日本股市呢，應該係100股買賣單位嘅，都有點煩。點買日本股？都叫你開個IB戶口。早知問佢地拎返介紹費—不過未開嘅，用我呢個referral link吧。咁講明referral link我就有錢收返的，但你冇蝕底，好似都有著數。

13. 順手講下，勞蘇基金（唔知係乜嘅睇最底）仲係停滯不前，不太樂觀，但仲未死的，有機會再update。唔係咁易嘅，但易嘅就唔值得搞—又一人生道理，低門檻嘅嘢，好難高回報。

買Bitcoin的教訓

14. 有一排冇講過Bitcoin或其他加密貨幣，呢段甚至呢個Patreon都唔係主力講Bitcoin，而絶大多數出面啲討論，得罪講句都係廢話。

15. 本人呢，係唔信Bitcoin嘅。但，我又有買喎。好多程度低嘅人心諗，「精神分裂架？」「講一套做一套？」「唔信又買？」。我答你，錯，正好相反，唔信先要買。舊讀者一定聽過，或者可以睇另一篇文。題目已經答到你，That sounds stupid, I’m buying some just in case.

16. 再講一次，我係唔信的。但，我同自己講，「如果我錯呢？」。得罪講句，我買嘅錢唔多，如果我啱，輸晒都唔會有咩大問題（記住記住呢點）。但，如果我錯呢？如果升幾百倍呢？畀啲XX（自己填）變到有錢過我然後恥笑我？唔得掂。或者換句講講，「我拎少少錢去搭沉船」。

17. 隨你點評論，你可以話我個人黑心之極，但亦都極之pragmatic，亦同你句句真。況且，唔存在講一套做一套，買之前我同呢度啲讀者講晒，買幾多邊日買都貼晒出嚟。

18. 最最最初我買嘅係Grayscale嘅GBTC，其實流嘢但冇乜更好選擇，而我又唔會去搞咩Wallet之類。後來轉做咗真正嘅ETF BTCC．

19. 計買BTCC時，我買咗12定14萬港紙左右，今年4月嘅事。咁當然係摸頂，嗰時Bitcoin 6萬美金，後來高位跌一半，而家又上返5萬美金左右。咁你見，大約都勉強算跟得足（個圖6個月，即係3月開始，我4月先買），當然有啲偏差因為Bitcoin 24小時交易又波幅大之類，BTCC自己亦有開支扣咗你，但大約跟到。你鍾意可以上佢地網拎返個NAV慢慢計。

20. 好啦，都話唔係打算討論會升到幾多定跌到幾多，而家應唔應該買嘅問題。而係講故事。

21. 首先，我原本年中嗰時已經想寫文，「即係差不多6萬跌到3萬嗰時」，固然我都蝕一半，但，「我係感恩嘅」。因為我只係幾萬港紙就搭咗沉船。同埋，畀你見到點解要控制注碼，你升嗰時梗係爽，但跌落嚟呢？我唔信嘅嘢，我買12萬，輸晒我當然都小小痛，但唔會要叫救命。但你瞓身家嘅？祝你好運。

22. 然後引申到，最好笑係，之後又反彈返喎，哈哈哈。但，如果你「止蝕」嘅，咪3萬蚊4萬蚊低位打靶咯？Bitcoin 狂熱者好多嘢都令人十分厭煩，但三人行必有我師，我佩服嘅係佢地信念（好似邪教咁），亦都有啲本身有啲錢，又唔係買得多，同我情況差不多。升佢又係咁，跌佢又唔理 — 咁佢先食到個大浪呀！同啲師奶（例如我老母）買樓一樣。你個撚個（sorry要講粗口），輸少少又止蝕贏少少又take profit 食糊，點搵大錢？你見我亦真係身體力行，呢隻嘢跌一半我都冇「止蝕」。固然你可以話同股票唔同，但大約都有個原理

23. 最後，今日睇嘅笑話，大家一齊恥笑呢條友：10年積蓄瞓身家投資比特幣　美網民買槓桿期貨一夜輸清。佢唔係低能在10年兩公婆身家只係60萬港紙（幾好架啦），亦唔係因為佢摸項（我夠摸頂啦）。

24. 而係佢走去做槓杆！我心諗，傻的嗎？買Bitcoin仲要槓杆。係呀，你贏咪巴閉見報人人講，但幾多人輸死？

25. 最好笑係，5萬跌到落4萬7，佢就已經打靶！個margin of saftey低到一個點。根本佢如果唔係做槓杆，坐到而家，應該返咗家鄉。

26. 好簡單嘅故事，三個道理：唔好做槓杆，控制你注碼，唔好亂咁止蝕止賺。

27. 仲有，唔信先要買（不過唔係定律）

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。