九月有啲危險，但又如何？Apple ASML Google Facebook SPGI新高。垃圾倉都係．蘋果25000億市值。今次收水，債市表現同上次完全唔同．人口老化，收入不平等，利息低。熊市先見真章．-Paypal做埋交易所？ Affirm 同 Amazon 合作。星展出輪。恒大軍令狀。是日勞蘇 (Patreon)

快評兩句— 九月有啲危險，但又如何？

大師冇點你— Apple ASML Google Facebook SPGI新高。垃圾倉都係

每日一圖—　蘋果25000億市值。今次收水，債市表現同上次完全唔同

Good Read —人口老化，收入不平等，利息低。熊市先見真章

FB Post Summary -Paypal做埋交易所？ Affirm 同 Amazon 合作。星展出輪。恒大軍令狀。是日勞蘇

快評兩句— 9月有啲危險，但又如何？

1. 無驚無險，又到9月。美股8月就夠晒堅，你見今年創咗53次新高（仲有4個月喎！），分分鐘全年破紀錄。而只係8月已經有12次。易玩之極，你只需要跟住啲基本法則：瞓身，唔好亂咁沽，唔好借錢，唔好買晒細股，已經簡單到極。

2. 壞消息係，9月傳統上係差嘅月份，詳細可以睇呢篇（都唔長）。但，真係得個知字，頂多係提醒你唔好借錢，或者買啲冇咁高beta嘅嘢。記住，長期拎現金唔係辦法，沽走啲股票更加多數後悔

3. 留意美股嘅ADP就業數據遠低過預期，但疫情後往往同官方嘅「非農就業數據」成日打交，所以我唔會過份演繹住。

4. 港股呢？講你都唔信，8月恒指其實只係跌少少—但你好多人唔係渣住恒指嘅嘢嘛。另外，之前見到8月31日（星期二）恒指單日V型反彈700點，成交2000億，靚仔。但我有講咁大成交亦因為MSCI執位，叫你睇多日。

5. 去到9月1，仲頂得住，而且留意1800億成交，算靚仔。見底啦啩？另外仲見到啲中概股反彈

6. 行業上，你見啲澳門股同餐飲股都彈返，夠殘，又相對地低政策風險。但入面我好似一隻都冇。有閒錢又轉身快嘅可以諗嘅，但大陸公司相對地你真係冇乜信心渣得長。原本好地地嘅騰訊阿里巴巴又忽然會惹到政府，難搞的。

大師冇點你— Apple ASML Google Facebook SPGI新高。垃圾倉都係

7. 見尾市收窄返啲，但仲係五隻都升。Facebook就快400蚊（記唔記得有一排咩個個話杯葛又話轉去mewe又乜？）．Google今年升七成，就快3000蚊，ASML都七成。FB Post 都有講，樓下亦有summary

8. 但垃圾倉（呢度，同呢度）先真係毀三觀，令我懷疑人生。昨晚升3%，一個月升15%．實情仲使唔使咩咁多分析呢？不過都係有分別，你見到呢堆垃圾我都唔會買得大。另外，最初真係應該做個對照實驗。例如我真係亂揀10隻出嚟，或者叫你揀10隻，睇下係咪都有咁勁。答案應該係否定嘅（指數都冇升咁多啦）。結論？證明啲分析員可能都有啲用，亦可能只係咁啱炒正啲細科技股。

每日一圖—　蘋果25000億市值。今次收水，債市表現同上次完全唔同

9. 蘋果25000億市值—冇錯蘋果早兩日又創新高。咁添曲十年蘋果十倍呢啲都寫過，但細心睇下個圖。首先留意大家嘅起點唔係完全一樣，但大約都見到係蘋果跑贏啦。當然係因為佢揀咗2019年9月開始計，應該係蘋果第二次10000億市值（第一次係2018年）。咁你見今年蘋果跑輸另外幾隻，甚至跑輸大市。但，正係畀你見到唔同公司往往發力時間唔同，唔易捉的。

10. 今次收水，債市表現同上次完全唔同—唔知大家有冇咁耐經験，但2013年嘅收水（留意係2008金融海嘯後大減息，搞咗5年先講收水），都引起一定市場震蕩。而家又開始話年尾會減少買債規模（咁其實未係收水，只係「減慢放嘅速度」），但你見個債息走勢好唔同。上次急升，今次就仲要跌。

Good Read —人口老化，收入不平等，利息低。熊市先見真章

11. 人口老化，收入不平等，利息低 — 寫得不錯，呢啲未必直接幫到你投資，但幫到了更了解呢個世界。呢三樣嘢，就係近N年社會嘅趨勢，作者講返中央銀行嘅角色，甚至由「咩係利息」開始講起。得罪講句，人地免費解你知，好過你畀幾萬蚊一年去大學讀。另外，有個主流講法話，因為之前中國大量平價勞工，提供咗生產力，就壓低咗通脹，但而家全球老化，通脹會返嚟。但另外亦有講法話人口老化晒，而家又有科技，唔似以前要請咁多人，咁通脹何來？甚至早兩日又見到份論文講，貧富不均先係壓低利息嘅主因：有錢人係唔洗錢的（係，你諗真啲，真係的，光頭佬份身家分晒畀全世界嘅人，好快可以洗晒，但佢自己點用都用唔晒）。邊個先係真相？你自己判斷，可能永遠都冇答案。

12. 熊市先見真章 — Charlie Bilello嘅文，講航海家嘅故事，美國機長Captain Sully嘅故事（早幾年拍過戲，Tom Hanks），畢菲特嘅故事。話你知，而家股市梗係好，梗係易玩。但正係最惡劣嘅情況先見真章，平時開飛機有幾難？但有壓力下在河上迫降就完全另一回事。你都要明白，呢兩三年咁易玩，唔係必然。而家你都話搞唔掂要輸錢嘅話會驚嘅，真係盡快惡補下，否則大跌市或長期唔上唔落時，極難捱。

FB Post Summary -Paypal做埋交易所？ Affirm 同 Amazon 合作。星展出輪。恒大軍令狀。是日勞蘇

13. 傻咗，忽然間寫咗好多文，仲要全部都幾長，仲要多數都同金融有關。其實仲有啲寫咗未出。應該因為月頭谷新讀者特別有動力

14. Paypal做埋交易所？ — 如題，股價升少少。實則只係做交易平台，類似經紀券商咁，唔係交易所，兩者爭好遠。順手講埋你見美國真係相對地自由競爭，Paypal又可以做券商，而交易所可以有好多間。都話明明美股成交係港股N倍，但港交所市值係全球第一，因為食水深，因為獨家。當然獨家本身不等於一定好好賺，亦不等於你一定要買（你睇大陸啲國企？），亦不如任何價都買。但我係有嘅。

15. Affirm 同 Amazon 合作—Buy now pay later呀，鬼佬潮語，「咪即係大陸花唄」「信用卡分期」咁。留意Amazon冇話係只係同你一個拍檔，我覺得Affirm升五成係升過龍。順手寫埋香港地嘅信用卡呀，貸款呀等等嘅生態。香港人走數率好低的

16. 星展出輪 — 話畀你知輪商生態，點解星展而家走嚟出輪，有乜優勢。同場加映我在星展嘅少少私人恩怨（冇乜怨）

17. 恒大軍令狀—呢篇就同金融冇乜關，雖然由恒大個「軍令狀」講起，講三國演義關公華容道。然後講返啲文學嘢咁。

18. 是日勞蘇 — Core List五隻新高，順手又講下啲基本心法嘢。實在唔明啲人做乜要升少少就沽咗佢，升咗又諗幾時變返做現金。Cash is trash喎，冇價值的，你買ASML買Google就係信佢叻過你，啲錢放在佢度回報多過你自己。既然係咁，做乜要賣？當然有時等錢用，咁我入面會講埋我嘅情況。但我都好後悔沽過啲股票，早知就加按層樓算數。啲WSB Bitcoin Bros雖然騎呢，但有樣嘢你要學：人地真係夠信念，唔會升跌少少就沽咗佢。

================================================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。