Ivan 一入市就跌！港交所388受惠中美交惡！小米1810手機market share 勁過蘋果！佐丹奴709又出盈喜？其實係盈警！美國Antitrust 調查數目一直跌。軟件公司併購潮好火熱。 分析美國5.4%嘅通脹。Facebook嘅銀彈攻勢同Youtube比仲係太低 (Patreon)

Ivan 一入市就跌

大師冇點你：港交所388受惠中美交惡

小米1810手機market share 勁過蘋果！

佐丹奴709又出盈喜？其實係盈警

每日一圖— 美國Antitrust 調查數目一直跌。軟件公司併購潮好火熱

Good Read — 分析美國5.4%嘅通脹。Facebook嘅銀彈攻勢同Youtube比仲係太低

1. 星期五晚冇出文，因為早咗瞓，而家出返。另外週末專題應該仲係有嘅。

2. 今日（星期日）嘅大事當然係我去書展同讀者見面影相簽名（未簽的話），詳情你睇Facebook Post有講。

3. 記住係會展舊翼（記住！），L4四樓會議室S428（睇埋圖），所有新書發佈都在嗰度，時間係19:30–20:15，貿發局安排的。記住拎咗書先好上嚟，S428嚴禁賣書。之前已經買咗嘅很好，聽日想買嘅，可以試下去書展三聯counter碰下運氣。埋嚟時最好講你係邊個，因為我面盲，況且絶大多數讀者我都未見過。

4. 另外，20蚊年費會員係免費送書的，但唔好聽日嚟拎，因為我都冇書在手（屋企有，但我點抬出會展？）。最簡單方法都係你自己上HomeBlogger買，然後PM我回水畀你。

Ivan 一入市就跌

5. 大市，都冇乜好講。冇錯，我一入市就跌，上星期入咗三隻嘢。Shopify輸緊3%，CBS Viacom都輸2%，三星REIT 3187就打個和（多謝晒）。問我點？冇，冇乜點，睇得耐嘅讀者應該知，唔好話2%，跌20%我都唔會理的，頂多檢討下，下次小心啲。

6. 事實大市都係麻麻地。不過，道指300點嘅跌幅，1%唔夠，我唔知有乜好討論。

7. 當然個個都想買完即升，或者係進化版：我買之前就狂瀉，買完即時升幾倍，到我沽晒後再股災。但現實邊有咁理想。目測多數讀者都未係富貴到差不多唔使做，咁你應該鍾意跌市—因為一路唔跌你冇機會買。同樣道理，星期一道指升一倍又點？你夠錢收山咩？但當然話分兩頭，到你退休嗰下先股災就好大鑊的，冇仇報（解決方法？唔好真係一次過減持，買要分段，賣都要分段）。

大師冇點你：港交所受惠中美交惡

8. 算唔算大師冇點你？但本人真係9月已經講—唔係舊年9月，係2019年嘅9月。最新嘅發展？難得地中國同美國都同樣唔想中概股在美國上市，未上嘅唔好去，上咗嘅返嚟。

9. 最新玩法係話，在香港上市嘅，豁免企業網絡安全審查。你可以當明益港交所，例如高盛計數話，如果全部ADR返晒香港，港股成交可以升27%—但當然呢個一定係高估咗。首先唔會所有公司都嚟，另外，以上講嘅，全部只係other things unchanged—但一隻中概股，在美股有10億成交，返到香港就唔會有10億嘛，就算唔禁美國人買都會少一截。時差都唔係最大問題（時差有冇令我冇買美股），最大問題係港交所交易費貴嘛，好多high frequency trading 唔方便做。

10. 至於背後中國盤算係乜？起初唔少人（包括我）都認為咩數據安全只係藉口，只係懲戒滴滴唔聽話，但睇返最新發展，就似乎真係呢個原因。你話打擊紐約？就唔會啦，佔嘅成交太少，況且紐交所納交所又唔係政府持有。

小米手機market share 勁過蘋果！

11. 應該好多人知道點解急升，因為小米銷量仲勁過蘋果！嘩！Market share 17%，蘋果先14%，而第一嘅三星先17%。留意呢啲數應該冇乜得假。

12. 呢單嘢，一如好多事件，唔同嘅人睇法兩極。而我唔係中立騎牆，相反，兩邊都戇居，真相就在中間。

13. 米粉（大陸唔少）嚟講，你都知道個盲點係乜：你好賣，但好唔好賺？已經講完。手機市場，好長時間係蘋果賺超過100%嘅利潤—點解超過100%？因為蘋果外有幾間微利，然後一大堆係蝕到趴的。你sales 同 profit係兩回事，偏偏好多人（特別係台灣人，有機會再講），鍾意睇營收，有春用咩。但偏偏market share就係講收入。

14. 不過又話說回頭，唔少米黑嘅睇法亦係錯。雷軍此人實在騎呢，切合大家恥笑大陸佬假大空嘅stereotype，加上當年香港上市又有啲爭議。我都以為呢間公司上完市就潛大水玩完，但真係好少人估到可以低位反彈咁多。上市價17蚊，上市後潛水潛到得一半，但今年居然上過34蚊，真係做到雷軍講嘅升一倍，估佢唔到。

15. 退一萬步講，做手機真係冇人做到有蘋果咁搵到錢，台灣日本廠直頭死晒，剩低三星同大陸佬有微利。但小米可以銷量超過蘋果，已經相當難得。

佐丹奴709又出盈喜？其實係盈警

16. 冇乜特別好講，但係好好嘅教材。我見到隻嘢出盈喜，心諗，又盈喜？邊有咁快。我明明記得冇耐前先寫過。果然如此，今次嘅盈喜，係中期業績（12月結，即係今年1-6月），明明之前5月咪出過咯，今次只係補充埋，有埋實數，話不多於5000萬。

17. 我寫過呢隻嘢，呢度兩次，另外明報寫過一次。第一次係3月，出全年業績，蝕錢照派息。然後幾日後我在明報有寫（篇文要收費，但我已經attach在呢度）。到5月佢出中期盈喜，我再寫多咗次。

18. 冇叫你買（當時我都話走寶，事後之後股價都橫行），但請你由頭睇多次，好好嘅教材，教你點睇公司睇業績。特別係呢啲唔太多人睇嘅公司。可惜走寶，原本可以變做另一次746咁嘅代表作。

19. 最新嘅盈喜？咁你又睇下，幫你計埋數，咁你話個盈喜係咪好消息？梗係唔係啦，舊年下半年有6300萬純利，今年上半年反而得5000萬唔夠。我估星期一股價跌的，應該係。

每日一圖— 美國Antitrust 調查數目一直跌。軟件公司併購潮好火熱

20. 美國Antitrust 調查數目一直跌—有啲講法話美國近N年越嚟越「左」，你睇啲年輕選民可能係，但至少過去N咁多年嘅趨勢，無論乜黨上治都好，明顯係越嚟越親商。例如稅率一路跌，仲有呢個圖見到，Antitrust 調查數目一直都跌的。當然你亦可以話物極必反，而家到咗反彈點。或者話而家根本已經係巨企殺晒，冇公司畀佢地收購。但你睇多個圖，至少今年之前，啲併購都係非常多的

21. 軟件公司併購潮好火熱—講開併購，你見我美股推唔少公司都係因為併購概念。軟件行業就特別係重點，可能因為冇Big Tech咁多問題，亦都好多係B2B，唔係對消費者，政府比較少管。你睇舊年軟件嘅收購交易，佔咗成個美國嘅差不多20%。今年少啲但都近8%，都係歷嚟最高的。

Good Read — 分析美國5.4%嘅通脹。Facebook嘅銀彈攻勢同Youtube比仲係太低

22. 分析美國5.4%嘅通脹— 呢篇幾好，夠短，但都係我之前講嘅嘢。聯儲局一路堅持通脹只係暫時，而市場又好似真係信。點解？因為你睇多啲數字就會信。正如之前講，主要都係啲二手車，同埋一啲同重啟經濟有關嘅項目推高，唔似會一路持續。可惜好多人連睇多少少嘢都懶，只會睇個頭條5.4%（甚至頭條都唔睇，只係聽人講通脹好勁，哦，股市爆煲，石油危機咁）

23. Facebook嘅銀彈攻勢同Youtube比仲係太低—呢個現像我都講過幾次，你啲小朋友，好多都話想做Youtuber，部份話你知想做ig-er（咪又係Facebook），好少話你知想搞Facebook Page。固然Facebook 用家好似比較老，而家啲友又聽講只係睇相同睇片（但，你睇緊乜？）。不過，即使係老嘢，都好多話搞YouTube Channel，較少話開個Page。原因？（佢地以為）好搵。眾所周知，Facebook 係一個仙都唔會分畀你的，但YouTube會分廣告費比你。但你話「唔公平」？我就掉轉諗，Facebook唔分錢畀你你班友都爭住去喎，咪話老細角度，即係你用得好開心啦？相反，YouTube係要靠畀錢，唔派錢，好多人根本唔會拍片。咁何者較吸引呢？同時間，留意Facebook收入，利潤，市值都大約係Google一半左右—但，Google並唔止係Youtube．Youtube嘅廣告收入，佔Google 十份一左右—而Youtube嘅廣告收入，只係Facebook 四份一左右。而Youtube仲要係蝕錢嘅，死未。兩個模式，實在難分高下，但呢一刻，Facebook 係市值1萬億嘅巨企，Youtube甚至仲要蝕緊錢，當然如果係獨立公司都會幾值錢，但肯定唔會值1萬億。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。