Ivan又入市買美股．另一隻睇緊嘅：Okta．博通買（唔到）SAS嘅啟示．美國聯儲局堅持通脹暫時，反正市場信了．美麗新世界17—業主點算好？股東又點算好？ (Patreon)

小小版務—有關我本書

Ivan又入市買美股

另一隻睇緊嘅：Okta

博通買（唔到）SAS嘅啟示

美國聯儲局堅持通脹暫時，反正市場信了

美麗新世界17—業主點算好？股東又點算好？

手冇再痛，又寫返3000字畀你。

小小版務—有關我本書

1. 呢排都會日日提，新書銷情暫時不錯。暫時最簡單方法都係在HomeBlogger買，一係你上尖沙咀拎，一係佢順豐畀你，都有唔少人買咗，冇乜出大問題。但建議你上去前Whatsapp 佢地客服（+852 6383 2145）（辦公時間先答嘢）。

2. 另外，你經Homeblogger買嘅，暫時全部都係親筆簽名版。

3. 海外讀者嘅，都提返，HomeBlogger順豐應該可以寄澳門同台灣，有人試過，搵返客服問郵費。理論上好似新加坡都得，但郵費好貴，不過你肯畀我估佢地都肯幫你。至於中國內地（澳門台灣以外），應該寄唔到，寄書比較敏感。

4. 最後一提，書展會場，應該係冇我本書！冇！冇！冇！（好重要講三次）。但之後書局會有。

Ivan又入市買美股

5. 係喎，好似一買就跌，但如果你當我明燈嘅，你可以睇下我買咗十幾年美股，咁美股係升定跌？好心啦。睇嘢睇兩日？

6. 早兩日講過買Shopify，買咗。話買3187，都買埋。銀碼都講咗，10萬港紙唔夠。咁話仲會買多隻美股，今日都買埋。

7. 順便提下大家，我可以做嘅就係我買嗰時話你知，你可以跟亦可以唔跟（事實亦都有啲輸得好勁，不過贏嘅夠冚）。但講真唔好，亦唔需要買完跌幾個% 問我點算，對大家都冇益。首先就，有乜點算？我幫你掃返上去？二來，睇得耐嘅都知，跌20%我都唔會理的。呢套做法舊文提過，舊讀者實知，我亦成日再講，新讀者可以睇下。我係好少止蝕（但你真係要做嘅我都明），更加永不止賺的。

8. 仲有，真係唔好聽一半唔聽一半。我本新書都有講，除咗呢啲新買嘅嘢，咁你見我之前買落好多Big Tech之類嘛，所以我先唔會再買。但你完全冇嘅，當然係另一回事。所以好多時你問我應唔應該買乜乜乜，根本答唔到，你本身另外渣住乜先？你成手舊經濟嘅梗係買啲新經濟，反之亦然。

9. 講咁耐，我買咗嘅係乜？實在冇乜特別，就係CBS Viacom，舊讀者必然知道我提過。媒體併購嘛，相對地又唔算太貴，分散下啲行業咯。幾多？都係唔過10萬啦，實情之前都100% invested，冇乜閒錢。你唔會以為我賣書收到好多錢下話？

另一隻睇緊嘅：Okta

10. 仲有另一隻睇緊嘅，Okta．剛剛高盛話買入評級，唔知免費睇唔睇到，但根本不重要，只係提醒返我呢隻嘢之前望過。留意睇咋下，即係放在Monitor List，可能永世都唔買的，實情由Monitor List升到上Core List（即係由齋睇變買埋）嘅都唔係太多，但又唔係冇，例如今年LVMH，愛馬士，仲有新鮮滾熱辣嘅CBS Viacom 同 Shopify都係

11. Okta是甚麼？Identity management，用家身份認證（但係軟件，唔係硬件），都幾多大公司客戶，遲下我再深入研究。歷史唔長，2009年先成立，2017年上市。然後你可以睇下股價升咗幾多倍。

12. 當然今年股價就冇咁好，估值肯定唔平，同埋好似都冇乜點賺過錢，仲要越蝕越多！但又至少，啲收入都仲係好高增長。

13. 咁，炒乜？又係嗰味，併購咯。畀埋個圖你睇，6月嘅圖，但而家唔爭好遠。當然不能話Price to sales越平越好，平嘅自然有道理，可能因為業務唔得或太單調。但，你睇DropBox今年升到笑，都係咁上下原因，其他平嘅，SalesForce太大隻（2000億市值了），冇乜人食得落，亦都相當成熟，佢食人就有份。Adobe都講過下，在Monitor List上，日日創新高，走寶，但仲大過SalesForce！（3000億市值）。Okta之類，300億，細細粒易食（Dropbox 120億添咋）

博通買（唔到）SAS嘅啟示

14. 送多單超短打畀你，之前講博通買SAS，講緊150-200億美金。好似好貴？睇你點睇，SAS冇上市，但一年收入大約30億美金。咁即係5-7倍price to sales，貴唔貴？你望下上面Okta個圖咪知。但又不過，文入面有講，呢幾年SAS嘅收入都原地踏步，冇乜增長。

15. 戲肉嚟啦喎，博通呢單嘢，應該已經告吹。但原因？反而係SAS唔多想，話驚失去自己嘅企業文化之類—translation：出價唔夠吸引。咁你見到即使SAS呢啲冇乜增長嘅公司，都咁惡，真係而家似乎係皇帝女唔憂嫁，係賣家話事（唔知免費睇唔睇到）。呢，轉頭就已經話可能微軟想買 。

美國聯儲局堅持通脹暫時，反正市場信了。

16. 另外，早兩晚出嘅美國CPI，按年升5.4%，但你見市場都唔係好驚。繼續畀幾個圖你睇下，我都真係BUY聯儲局嗰套話通脹只係暫時的。啲圖未必一一詳細解了，自己參透下。但，留意幾樣嘢。

17. 首先，唔多唔少係因為啲二手車價格， 一個好大嘅outlier（而呢個就係受暫時短缺影響）

18. 另外，亦都有好多係因為一啲重啟經濟嘅項目影響，亦都似係暫時性嘅嘢

19. 仲有，舊年嘅低基數效應

20. 事實仲有好多其他量度CPI嘅指標，例如UIG，都見到好似冇咁誇張

21. 又或者，可以度下唔計最極端數值嘅（原理好似跳水或體操唱歌辯論評判咁，斬頭斬尾）

22. 又或者睇下邊啲係Flexible，邊啲係Sticky

23. 仲有更重要嘅，之前唔少人（包括我）以為係因為啲友要加人工，所以導致通脹。但你睇真啲，啲通脹，係由貨物（但主要唔係商品價格），而唔係服務業帶起的。

24. 種種嘅解釋，又真係好似話畀你知，高嘅CPI只係暫時喎，至少暫時市場都仲信。不過唯獨小心，通脹係一樣好神奇嘅嘢，有時會自我實現，個個覺得嚟緊會通脹，就會自己先加價，然後員工又會想加人工，睇下聯儲局幾時可以等到通脹真係回落。

25. By the way，留意聯儲局主席係4年一任的（可連任，好似無限期都得，但要再授權），不經不覺鮑威爾都玩咗3年半，下年2月就任期滿，祝佢好運。雖然正路地佢連任唔會有問題—除非通脹失控啦。

26. 順手可睇埋，星期四晚出嘅首次申領失業救濟人數，都係普普通通。出嘅數36萬，有啲source話市場預期35萬，有啲話36萬，點講都冇明顯比預期低。經濟過熱等等，似乎過份擔心。

27. 所以，照舊，債息都係低迷嘅。

美麗新世界17—業主點算好？股東又點算好？

28. 都講一講港股，都唔少人問新世界柏傲莊單嘢。實情就唔使急，所以我今日先寫。

29. 首先，你見個股價，根本跌得唔多，10%都唔到，你仲要記住嗰排港股都係弱嘅，咁嘅跌幅並不特別值得研究。當然係同事件有關，但不足以令你飛入去。反正之前我亦從來冇點推過，亦冇買過。

30. 但你話對公司影響？大約都估到了，有限錢。可能講緊損失10億—好似好多錢，但人地個帳面值講緊近3000億！咁你話影響大唔大？股價跌得唔多亦好合理。

31. 至於咩影響聲譽之類，就純係廢話，我都要好厚黑咁講句，群眾係善忘嘅。你咪玩啦，幾多大公司搞到真係好大件事（例如蒙牛），有幾可真係翻唔到身？再厚黑啲講句，我任你鬧到公司點垃圾啲用料點差都好（事實唔係），我啲樓賣平10%，你唔買？20%呢？

32. 事實你亦可以話，新世界主動引爆，亦主動賠錢，算係幾負責任。如果係有人踢爆，或者啲苦主去樓下又嘈又求，仲核突。而我暫時亦聽唔到啲苦主（買咗嘅）有乜不滿，好似幾多覺得發咗筆橫財添。

33. 順手講埋，原來呢度都有十個八個讀者買咗（我啲讀者好富貴！）。咁個做法？我覺得不能一概而論，但，自住嘅就真係話知佢，梗係繼續，發筆橫財。但投資嘅呢？就因住第時租客或下手買嘅會壓你價 —雖然我懷疑，嗰啲友嘅議價能力有幾高，驚嘅可能取消交易算。仲有，如果諗住第時都會賣嘅（可能移民？），都大約諗下。咁你三五年可能都仲有人提呢啲事，但十年廿年後，冇人會理啦。

================================

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。