ivanliresearch

非農職位增長遠勝遠期，但債息唔升，美股新高，點解？Google Microsoft BlackRock Visa Nvidia Nike SPGI 全部新高．下半年應該仲有升。牛市第二年調整可以幾勁。KOL 泡沫爆破？有排都未。Dating App點解仲係咁雞？ (Patreon)

Published:

2021-07-02 20:26:12

Edited:

2021-07-02 23:55:59

Imported:

2021-07

Content

快評幾句—非農職位增長遠勝遠期，但債息唔升，美股新高，點解？

大師冇點你— Google Microsoft BlackRock Visa Nvidia Nike SPGI 全部新高

每日一圖— 下半年應該仲有升。牛市第二年調整可以幾勁。

Good Read — KOL 泡沫爆破？有排都未。Dating App點解仲係咁雞？

FB Post Summary — 從缺

快評幾句—非農職位增長遠勝遠期，但債息唔升，美股新高，點解？

1. 都在Facebook 快講咗幾句，之前都唔記得提大家，但，星期五晚出嘅美國非農就業數據都幾重要。

2. 咁首先交代返，星期四晚出嘅首次申領失業救濟數據好強，36萬人，疫情後新低，街估39萬。加上之前嘅「小非農」ADP就業數據都極強，都預咗星期五晚個非農數據有機會幾勁。

3. 結果？當然係非常勁，非農新增職位85萬個，預期只係72萬。之前個月係55萬。

4. 咁正常你估嘅反應係點？如果係舊年年中出好過預期嘅數字，就梗係股市升。但而家你都知情況唔同，估值貴咗好多，市場炒預期，焦點變咗係加息縮表通脹。出好嘅數據往往對股市不利，特別係有機會推高10年債息。

5. 但結果？冇喎，10年債息照跌，然後標普指數照創新高，死未。

6. 真係要解釋嘅係點？首先，你見市場之前所謂擔心通脹縮表，只係維持咗好短時間，之前啲通脹數據高，甚至就業數據好，都冇乜反應。可能聯儲局成功說服市場通脹只係暫時，又或者係擺明係有通脹都唔會加息唔會縮表，點丫。

7. 另外，值得睇下細數。經濟篇文有講埋，你見失業率不跌反升喎，上個月5.8%，今個月5.9%—而市場預期係跌到5.6%。失業率遠高過預期

8. 點解會好似打交咁？明明新增職位高過預期，但失業率又會高過預期仲要不跌反升？呢度就涉及好多嘢，可能星期一再細講。但，首先有職位，唔等於有人做，會有啲錯配。第二，亦涉及大家都估到嘅嘢：勞動參與率，有啲人之前唔搵工，而家想搵但未搵到。

9. 最後值得一提，你可以睇埋嘅係，薪金增長都冇特別高於預期。雖然新聞好似不停咁講請唔到人，好多人辭職。但似乎畀錢搶人嘅壓力唔係想像中咁大。因為，仲有樣嘢叫做機器。仲有，如果冇記錯，之前啲派錢之類，陸陸續續停了。低技術勞工嘅叫價能力，可以維持幾耐？

大師冇點你— Google Microsoft BlackRock Visa Nvidia Nike SPGI 全部新高

10. 港股嘛，就真係唔好講了（唔係以後唔講，今日啫）。雖然我嘅哲學一定係地理上分散，美股港股甚至歐股日股都買。咁有啲讀者係只買美股，我不同意但絶對可以理解。之但係，有少量只買港股嘅，就真係有點……不智。固然之前差唔代表之後差，但港股都差咗好多年，亦有原因（我一路講嘅問題：共產黨嘅首要任務唔係公司賺錢或你向上流，同美國資本家好大影響力唔同）。

11. 以前唔買美股嘅原因，可能係佣貴，咁解決咗啦。仲有係時差，但呢度嘅讀者應該知道，你係唔使成日睇住啲報價嘅。照計冇乜唔買嘅理由

12. Anyway，今日標普指數同納指又創新高，標普已經7連升。我地core list嘅呢幾隻東西一樣日日新高。除咗Visa近期較少講外，其他都差不多去到日日提提到你都煩嘅地步，所以唔好話我幾百篇文求其一篇remark提過就拎出嚟話推過（日日提又話煩，唔提又話冇講過，好難滿足所有人）。況且呢堆嘢我全都都有買，絶唔係得個講字，都唔少讀者買咗，但最緊要你坐得穩（相對冇咁難），同埋唔好畏高（更難，我都未必成日做到）。

13. 幾時係最好買入時機？最好係舊年3月，第二好係今日。

每日一圖— 下半年應該仲有升。牛市第二年調整可以幾勁。

14. 下半年應該仲有升— 之前寫過，美股牛市已經去到差不多一年半（由舊年3月尾計起），咁一般都仲有得玩。咁你見Ryan Detrick嘅統計話你知，上半年升到12%嘅情況下（今年正是），下半年多數都幾強，中位數升到10%．咁你話，「美股長期係升嘛」。係，不過平時下半年升幅中位數係5%的，即係上半年升到12%，下半年嘅回報中位數係平時嘅一個開。雖然正如我多次講，呢啲真係冇乜科學根據，但至少可以反駁到話「上半年升咗咁多下半年冇得升」嘅講法，歷史上往往唔係。

15. 牛市第二年調整可以幾勁。—你可以睇全文。簡單嚟講，牛市第二年，往往有相當大嘅調整。小則5%，多嘅16%，平均都有10%。咁多次指出，美股由舊年10月開始，都完全冇5%嘅調整，而家又貴，真係天時地利人和都估下半年有調整。應該係。 但你話，喂，咪同上一段矛盾？答案一：有時就係矛盾的。第答案：其實可以冇矛盾，調整完再升，或者升多一兩成先調整。

Good Read — KOL 泡沫爆破？有排都未。Dating App點解仲係咁雞？

16. KOL 泡沫爆破？有排都未—有啲長，但好睇。原文講social media influencers，但同KOL差不多東西啦。之前有啲講法話KOL呢樣嘢已經玩到謝玩到爛，阿豬阿狗都係KOL，讀者會疲勞，加上有啲又太過假，仲有係唔少地方開始監管（外國有的，香港就冇王管，唔使申報係咪收咗錢）。但係咪見頂？作者話正好相反。原因好多，其中一個好有趣嘅係，佢講返以前行銷同廣告，兩個元素，一係科水落廣告，一係唔畀錢靠口碑。傳統上呢兩個領域冇重叠，而公司係重視科水落廣告，因為靠口碑，個用家唔會reach到好多人。但KOL嘅出現，就改變咗呢樣嘢，佢地就係可以口碑reach 到好多人嘅東西。

17. Dating App點解仲係咁雞？— 又係好睇。都2021年啦，點解Dating App仲係咁雞？點雞？就係用戶滿意度好低，好少match，推介畀你嘅你都唔鍾意，然後match到嘅仲有好多好多難關要克服。明明大數據推介電影呀，網購呀之類畀你都幾啱你心水，點解Dating app唔得？背後嘅演算法其實差不多，兩樣嘢，首先係你列你鍾意乜（6尺以上，身家1000萬港紙，之類）。另外，亦睇match咗咩人，然後推介多啲差不多背景嘅嘢畀你，match咗達哥嘅，送埋蔡思貝畀你之類。但偏偏呢個方法在Dating就唔係好掂。點解？主要都係：Garbage in garbage out．首先，啲人唔誠實，明明鍾意靚仔又唔肯認，或者唔知自己想要乜。另外，傳統媒人工業都知，就算佢哋誠實，啲人把口講嘅偏好，同佢地真正嘅偏好，往往係唔同。你以為你鍾意穩重，其實唔係。當然仲有，人係好複雜嘅東西，呢個男仔5尺8 金毛讀港大我鍾意，不等於另一個都係咁類型嘅我都鍾意。