今年上半年好易玩，但唔會永遠都係咁．道指恒指上半年咩成份股表現最好？邊啲最差？回顧經濟一週推介．遲下完全公開Core list 同 Watch List (Patreon)

心法：今年上半年好易玩，但唔會永遠都係咁

道指恒指上半年咩成份股表現最好？邊啲最差？

回顧經濟一週推介

遲下完全公開Core list 同 Watch List

1. 祝自己生日快樂！生日做乜？當然又係寫Patreon．又到新一個月，照舊多謝大家。今次係我3月失業/創業後嘅第一個生日，亦係搞呢個Patreon後第一個生日（舊年8月搞的）。感覺？就係I feel more alive than ever，每日都好充實，多謝大家。

心法：今年上半年好易玩，但唔會永遠都係咁

2. 港股冇市，美股又靜靜地，所以都係會講啲Big Picture 嘢。但正如昨日講（唔貼link了），美股上半年三大指數12-14%回報，港股三大指數就  -3 至+6%回報。即係？合埋眼都應該贏錢。

3. 再苦口婆心講一次：首先，如果咁嘅市況都輸錢嘅，不如幫襯勞蘇基金（照舊，未報名嘅PM我，冇任何commitment 或負擔，報咗嘅等下）（我講咗咁多次，先醒起應該將呢段嘢放去最尾，以後每篇都有）

4. 但更重要嘅係：花無百日紅。歷史平均美股一年都係講緊10%左右嘅回報，近年多少少（因為印錢？或者因為科企？），但都係想講：而家我地半年已經做咗平時「正常」一年嘅回報。

5. 當然，歷史平均回報係咁多，你半年做咗超額，不代表下半年就會跌，亦不代表一定下半年嘅回報會差啲，正如你掟咗10次雙數，唔代表下次單數嘅機會大咗（但，留意呢個比喻唔恰當，因為股市有一樣嘢叫做估值，other things equal，聽日忽然10萬點的話，之後跌嘅機會當然大啲）

6. 想講嘅係：大家真係要知足。今年上半年都已經好易玩。如果你都輸錢嘅，我比較擔心到個市唔上唔落時點算。甚至乎，到個市大跌時你點算？

7. 呢個Patreon嘅前身，HomeBlogger嗰時嘅收費專欄，係2020年3月開嘅，跌得最勁嗰期。但到呢個Patreon開時已經係2020年8月，到而家差不多一年，個市完全係順風順水。

8. 我係要管理你嘅期望：唔好以為永遠都係咁，到日日跌時，我保證你懷疑人生，然後發現我啲嘢即時變得「唔準」，或者日日都只係叫你唔使驚，買多啲。到時分分鐘你都冇癮，唔再訂我Patreon，甚至唔再投資股票。

9. 但你明知道，次次事後睇，逢親呢啲時刻，就正係你最應該睇Patreon最應該買股票嘅時間。所以古語有云，Only the Paranoid Survive，有時真係個人要忽忽地，先適合投資。或者話，投資唔要靠傳統嗰種學霸式嘅邏輯智慧。你真係要人格分裂，到人人話你錯，你都覺得自己錯時，往往就係最好嘅時機。

10. 你可以我話我咁多嘢，都係為咗保住自己，等大家唔好退訂。咁都真係關事，我成日同人講，我呢個Patreon，同我打金融工一樣，都係順周期嘅行業：市況好嘅，讀者真係唔介意人人股神，即係賭仔贏到錢，買多幾份馬經，畀貼士荷官，甚至請陌生人食飯都唔介意。到輸錢嗰時？一杯可樂一碗叉燒飯都同你計呀！

11. 但撇除以上因素，我都真係為大家好的。記住，唔止升市你要聽冧把，日日跌你先要繼續睇多啲。呢一點呢，就同宗教相反：你見好多人都係有事先求神問佛的，平時富貴就唔會。

道指恒指上半年咩成份股表現最好？邊啲最差？

12. 點解唔寫標普指數同納指？因為成份股太多，講真最好最差嗰啲我都未必識（雖然我未查）。道指30隻，易啲。

13. 道指全個名單表現，呢度有

14. 睇最好嘅先，多數….我都係冇嘅。N年前買過高盛，已沽。而家仲有嘅係JP Morgan，同埋都成日推又過咗2萬億市值嘅Microsoft．咁你話啟示？都唔清楚，明顯金融股強（債息升，但近排已唔強）。油價強亦幫到油股（Chevron），樓價升銷售好又幫到Home Depot甚至 Caterpillar 咁咯。但事前問我都幾難估到。

15. 最差嘅呢？不幸地我都有幾隻，Verizon啦（極少提），迪士尼啦（舊年OK今年死火），蘋果啦。仲有P&G同 Johnson & Johnson都在monitor list（但冇買，下一段會詳細講）。有乜路捉？都係冇乜

16. 港股呢？全文你可以睇呢度。但呢張圖都夠晒。最好嘅？中石油（857），樓上咪講咗油價勁石油股勁。中信（267）就資源股，商品價格升。其他碧桂園服務（6098）舜宇（2382）瑞聲（2018）之類，都唔係我推嘅嘢。唯獨係安踏（2020）我耐唔耐講，但都係多年前買落。

17. 最差嗰堆？我都少講。平保（2318）我係有嘅。另外阿里健康（241）之類都有推過，但早早同你講呢啲係短線嘢。

18. 結論？對唔住，都係冇乜結論的。但真係揀中最勁嗰幾隻，極不容易，事後解你都未必解到，何況事前？不過又掉返轉，我又唔使勁到揀到最勁嗰啲先得嘅。睇埋下一段。

回顧經濟一週推介

19. 我會在Facebook 開篇新文講，所以呢度只會快講。但，就係舊年年尾經濟一週訪問我，我畀咗11隻心水股（我居然畀9隻美股2隻港股）。

20. 點解經濟一週重要？因為，我應該冇在任何其他地方做過呢類推介，公司都冇（12月尾被炒啦，仲同佢整嘢？）。即使經濟一週都只係得呢次，所以唔存在 cherry pick，或者呢邊話升嗰邊話跌實有一邊中咁。

21. 咁而家表現如何？就係咁樣樣。就係點？就係跑贏大市咯。美股嘅跑贏晒三大指數，港股嘅反而跑輸少少，但拉勻都遠遠跑贏六大指數。算係咁啦？

22. 留意，大部份股票，都係我在呢度成日推嘅，唔少我都持有。Visa BlackRock SPGI Paypal ASML都係我有買又成日講嘅股票（Paypal呢排少啲），領展都係。SalesForce都有買，但少講，因為股價表現麻麻地（但都年初至今11%）。P&G 同Johnson & Johnson，耐唔耐都講（民生品牌嘛），但我冇買，表現亦唔算太好。華潤置地就冇買又好少講（中海外688反而多啲，雖然我冇買，但唔少人買咗，但都返咗家鄉）。

23. 事後檢討？半年後，我覺得多數都冇揀錯。留意不能只係靠事後表現去判斷返當時決定，P&G 同Johnson & Johnson畀我揀多次都會揀。反而我覺得SalesForce係揀錯—雖然表現不錯。佢地買Slack真係買得太貴了。華潤置地都係一半一半，不能話我揀錯，但如果當初多啲時間諗，可能我揀第二隻。

遲下完全公開Core list 同 Watch List

24. 至於我個core list 同 Watch list 嘛，冇問題，話咗今個月公開（雖然你有睇開文都一早知）。遲少少寫。但反正會轉，可能我一個星期貼一次咁。Core就好少轉嘅，上次買股都已經係4月買LVMH （幾好）愛馬士（仲好）同  Bitcoin（BTCC，已死），未計啲月供港股啦。Watch list就會轉，冇買，睇之嘛。

================================

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。