記得抽iBond！同場加映：睇Youtube浪費時間。十個牛皮九個淡，好似係。Meme股，不如睇Wendy’s？長和1回購喎，3月嚟第一次。之前兩年都冇做。電腦大爆炸炒起Fastly 股價。理文化工746又新高！愛馬士 ASML Facebook 嘉年華郵輪 DropBox就唔在講 (Patreon)

記得抽iBond！記得抽iBond！記得抽iBond！

同場加映：睇Youtube浪費時間（私人恩怨，不喜勿入）

十個牛皮九個淡，好似係。

Meme股，不如睇Wendy’s？

長和1回購喎，3月嚟第一次。之前兩年都冇做

電腦大爆炸炒起Fastly 股價

理文化工746又新高！愛馬士 ASML Facebook 嘉年華郵輪 DropBox就唔在講

1. 事忙兼早咗瞓，早餐時間先出呢篇文（有冇留恴早排係半夜四五點前實有？）。咁影響咗影音版可能要黃昏先有。因為我朋友要返工的。責任全在本人。

記得抽iBond！記得抽iBond！記得抽iBond！

2. 一句，記得，記得抽iBond，實不相瞞我都因為咁開咗個富途戶口，而之前我係冇任何股票戶口的（工作關係嘛，好煩）

3. 理據，之前講過。但我幾乎想好暴力咁叫你：叫你抽就抽啦！咁多嘢問！

4. 而舊年通脹未係熱話時我都講過一次，仲要事後整多篇叫你反省做乜唔抽。嚟緊幾年點睇通脹都大機會升，更加要抽。你話，扯，我點會渣過世，嚟緊幾年關我乜事！我知丫，我都係第一日走，但老細，會price in 埋架嘛！你估啲價要等之後幾年通脹數字出嚟先反映？講真，一個幾咁簡單嘅例子，就話畀你知市場點運作。呢一刻就會反映啲預期啦。

5. 哦，賺得唔多，冇乜肉食。倒係。但即係冒住得罪讀者嘅風險講句，喂，我又唔覺得啲讀者個個億萬富豪喎。正路估計，你應該可以中到兩三手，一個戶口可能執到成千銀。用埋屋企人戶口嘅，就幾千銀啦。嫌錢腥嘅不如益我，upgrade做20蚊或40蚊會員。  （然後你就會話冇錢，人性真奇怪）

6. 正經講，最重要係，冇風險！真係冇風險，除非你包拗頸估聽日核戰之類啦。

7. 加上，唔使點用間！十分快手，你睇得呢度嘅，明顯已經有投資戶口架啦。我認購都唔使一分鐘。我就唔知有幾多人一分鐘可以賺到幾一千幾百啦。

8. Anyway，小小勞氣，講真唔關我事，但塞埋錢畀你都唔要，第時真係後悔呢。

9. 點抽？睇返舊文咯，但好簡單，咪每個戶口三四皮嘢，今次唔方分得多。

同場加映：睇Youtube浪費時間

10. 既然勞開氣順手講，好多人話我寫文長（都係），但你諗真啲，以上一大堆嘢，你睇完應該唔使一分鐘？讀出嚟要幾耐？都係咁上下？

11. 但你上Youtube睇下，個撚個走去拍十分鐘甚至廿分鐘嘅片講。我心諗，做乜鳩？當然我明白要計廣告呀之類，亦都有啲片係本身賣埋券商廣告。但，你見真係一分鐘講完嘅嘢，啲友拖到廿分鐘。

12. 呢個亦係我其中一個堅持寫文唔拍片嘅原因之一，更唔好講嗰啲友都要搞一輪先整到段廿分鐘嘅片，然後同啲有靚女嘅片，或者好多靚後期製作嘅片（即係，好多錢好多時間好多人力）鬥。根本係紅海，死路一條。

13. 當然我唔係完全抗拒睇片，有啲嘢係要拍片先清楚。但教你抽iBond肯定唔係咯！

14. 而當然我都明白聽聞而家好多人鍾意睇片唔睇字，咁首先呢，「個世界低能我就要跟住佢咩」（再講一次，我不抗拒Youtube，但抽iBond要廿分鐘片真係反智，拖長嚟做，廢話連篇）。但第二，所以我地咪搞埋聲音版同影像版咯，順應民意嘛

15. 但真係的，你嫌我口水多過茶嘅。你去買份報紙，或者上網碌篇文，睇兩三篇iBond攻略，應該都係幾分鐘。

16. 仲有，我不抗拒娛樂，你見我連垃圾港產片都睇，除咗係一種執迷，亦係放空。你睇YouTube無聊嘢絶對冇問題。問題係，你去睇iBond唔係娛樂嘛！鬆又放唔到，浪費時間去睇啲根本兩分鐘講到嘅嘢？而整嗰啲，亦都係浪費時間，rat race，可能一兩個跑出，其他就食蕉（所以識玩應該係：拎公司份糧拍）。

十個牛皮九個淡，好似係。

17. 好，鬧完，講市況。一個字，繼續悶！但好事。

18. 有幾悶？畀啲數字你。恒指連跌咗5日，但累積跌幅都未夠700點。標普指數呢？連續N日都係窄幅上落，一路都破唔到頂。納指叫做連升3日，但升幅真係皮毛。

19. 老派啲嘅聽過句嘢，十個牛皮九個淡。多數呢啲傳統智慧（五窮六絶七翻身，or even worse：聖誕鐘買匯豐）我都唔信，加上一講出嚟就顯示自己極老土。但呢句十個牛皮九個淡，我都信信地。唔知有冇科學根據，可以Test下。我估唔係九個，但可能六七個淡？加上大家都知，而家估值點都唔叫平。

20. 咁冇乜嘢嘅，短打幾則咯。至於之前推買嗰啲股，買嘅咪買，唔買嘅都好難迫到你。抽iBond咁咯。

Meme股，不如睇Wendy’s？

21. 首先講，美股當然係發悶。啲網紅meme股繼續喪炒，我理解有啲人係真係因為大市悶去睇呢啲嘢。

22. 而另一個原因，亦可能因為BitCoin香晒。近來見到個走勢係相反的，聽落亦都好似有道理，可能買嘅都係嗰班友。

23. 咁meme股我一向避之則吉，好似從無買過（好廣義你可以當Bitcoin都係meme股，咁我咪有買，伏已中）。但昨晚有隻升咗上嚟，好似之前都少人提。就係Wendy’s．

24. 我覺得嘛，因為之前都冇乜太多人提，間公司又正常啲（但未必係好事？），真係揀一隻，可能就呢隻吧。但記住我自己係唔會買的，你堅持想買咪買，輸晒就你嘅事。

25. 當然你亦可以質疑，係因為本人鍾意食（早排先寫過！）。咁而買啲自己鍾意幫襯嘅公司，有時係幾危險的。因為你唔得客觀，以為自己鍾意就全世界都鍾意。況且，有時好公司賺唔到錢，垃圾先搵到錢，你睇麥當勞？

長和1回購喎，3月嚟第一次。之前兩年都冇做

26. 另一隻可以睇嘅，又係李嘉誠時間，今次係長和1，唔係長實1113

27. 原因嘛，應該都唔少人留意到，回購。平時唔成日做的，之前兩年都冇，今年3月做過後冇做。背後有乜打算？唔知。金額亦都好細，似乎係擺明想知你知道。但照計唔會點死錯人。

28. 不過都循例講下，回購同增持係唔同的。前者係用公司嘅錢街度買返自己股票，後者係個股東自己嘅錢增持公司股票。理論上呢，前者對基本因素有影響（股數少咗，你睇之前咩Domino’s Pizza咪係，拿，環環相扣呀），後者呢，同基本因素完全無關。

29. 不過實務上，對股價嘅影響，好可能掉轉。前者嘛，公司錢有乜所謂。後者。大老細嘅錢喎。你睇之前雷蛇1337嘅玩法：公司錢就回購少少，大股東就大手減持（拿，環環相扣呀！）

30. 無論如何，李嘉誠啲嘢都OK嘅，但你要無比耐性咯。

31. 順手講開回購，呢排Dynam Japan 6889都唔錯，呢幾日亦開始在市場回購。早排寫過下。

電腦大爆炸炒起Fastly 股價

另一單神化嘅係，Fastly大升．

32. 話說星期二晚全球電腦大爆炸，元兇就係呢間公司。都唔知咁重要呀下。但你睇下股價？反而係大升。原因？我都唔知，好勉強解，令啲友知道呢間公司原來都幾重要？

33. 不過居然係之前有提過呢間公司的。當時大插，因為冇咗一個大客，叫做Tick Tok（抖音呀）。而家股價比當時仲要低一大截。65億美金，殘到不堪。唔怪得彈起。

理文化工746又新高！愛馬士 ASML Facebook 嘉年華郵輪 DropBox就唔在講

34. 自high時間，隻理文化工746昨日（星期二）又突破高位了。唔係話升好多，但即係，過去大半年任何位買，你都係贏錢嘅。算係咁啦？嚟緊就可能等出盈喜了。

35. 咁其他嗰堆就不再重覆。雖然隻愛馬士日日新高都係好爽。當然仲有Facebook 同 ASML又破頂（但又跌返）。

36. 反而亦想講講monitor list，你地有人買咗嘅。嘉年華郵輪CCL 同 Dropbox（併購對象嘛）都仲新高，算係咁啦。

37. 雖然呢個環節有啲無聊，真係嫌無聊嘅咪skip咗佢。但，啲嘢日日新高，都係一種成就嘛大佬。而你知唔知咩叫新高先？即係任何位買都贏錢喎。我唔係寫啲之前升咗跌返落嚟嘅嘢喎。等於都有讀者問買唔買得愛瑪士，真係幾時都買得的。但當然，最好嘅時機係十年前。第二好嘅時機係今日。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。