ivanliresearch

悶呀喂！北水新貴睇位走。不過似乎有通脹聯儲局都唔加息．Facebook 愛馬士 DropBox 三星房託3187 全部新高．股市短期好危險。但股市長期必勝。建制企業跑贏顛覆者。銀行Fintech 化敵為友。9個大企業打工求生指南。到底啲友拎幾多錢去買加密貨幣？肚餓唔好買Bitcoin (Patreon)

Published:

2021-06-07 19:53:21

Imported:

2021-07

Content

快評幾句—悶呀喂！北水新貴睇位走。不過似乎有通脹聯儲局都唔加息

大師冇點你—Facebook 愛馬士 DropBox 三星房託3187 全部新高

每日一圖— 股市短期好危險。但股市長期必勝。建制企業跑贏顛覆者。

Good Read —　銀行Fintech 化敵為友。9個大企業打工求生指南。到底啲友拎幾多錢去買加密貨幣？

FB Post Summary —肚餓唔好買Bitcoin

1. 星期六出咗篇文，係Domino’s Pizza跑贏Google啟示嘅下集。上集花咗好多時間講細節，都入唔到正題，只係講咗dividend reinvestment嘅重要。下集就有更多啟示。唔好又話冇心法文 101文了。

2. 同時，未投票嘅可以去投，影音版格式四選一。不過見到似乎「手機版」最多人投，我自己都鍾意，但朋友就要用多少少時間咯。但我地一向係讀者為尊嘛！星期六篇文，我朋友Charles已經用咗手機版錄，有興趣可以去睇下。呢篇係最後一篇所有人都睇到的，未升Tier都可以試睇試聽。

3. 遲下我會PM投咗票嘅大家去升Tier了。「唔想畀我PM煩到嘅就自己去做咗先」，upgrade做20蚊或40蚊會員。畢竟真係做多好多嘢的

快評幾句—悶呀喂！北水新貴睇位走。不過似乎有通脹聯儲局都唔加息

4. 堆Meme股就喪炒，但除此之外，大市嘅嘢，悶呀！但係好事，我鍾意悶嘅市，儲平貨嘛。你可以話跌市仲好添，但跌市心情點都差，人性就係咁。

5. 循例提下大家，北水嗰兩隻新貴，心通醫療2160同醫渡科技2158，今日都要跌。咁即係例如再跌多5-10%（我唔知你幾錢買啦），就好走了。但我估都係跟市況，如果短期港股反彈嘅，呢兩隻嘢仲有得上。但相反亦係啦。

6. 講少少宏觀嘢，即使你唔係成日睇文，都大約知道過去幾個月由朝到尾都係講通脹。我嘅睇法之前寫咗，「通脹會重臨股市繼續升」（明報文要訂戶先睇到，我諗不如我另外搵個地方自己upload畀你地睇，只要係舊文同埋唔完全公開，佢地應該唔會投訴）。而家就更有信心。

7. 首先之前係El-Erian寫咗篇文。何許人？「埃及佬」，我都唔知點介紹，PIMCO嘅前CEO咯，債王Bill Gross以前拍檔。值得講嘅係此人都幾燈下，好似過去N年都不停聽佢講爆煲。但Anyway，呢篇寫得不錯（我等於送多篇Good Read畀你）。佢提出咗個好簡單嘅問題：點解通脹數字升，通脹期望都升，各種指標都似乎估通脹升—但，美債債息完全唔升？呢個正係早幾日發生嘅事。「埃及佬」話，當然可以話投資者通脹只係暫時，或者投資者覺得復蘇係假。但佢覺得係第三個原因：投資者都知通脹會嚟，但睇死儲聯局會容忍，唔會加息或收緊。佢認為咁樣玩遲早會爆煲，就後話。

8. 今次我係同意佢講嘅嘢（除咗佢認為之後爆煲嗰部份）。然後？你見最新耶倫出嚟講到明咁滯，通脹好丫，冇事喎，利息上都唔怕。咁結果大家覺得既然聯儲局（但留意，耶倫而家係財長，唔知做乜成日都踩過界咁）唔介意通脹，就直頭利息都唔上。大約係咁。

大師冇點你—Facebook 愛馬士 DropBox 三星房託3187 全部新高

9. 循例快講下，愛馬士就唔講啦。但，DropBox又新高，而我有在明報講咗—又係訂戶先睇到，但當然呢度講咗先。實情我唔想啲好topic益明報，所以而家好多時將呢度講過嘅嘢隔一排在嗰邊講算。

10. 至於三星房託3187，都新高，但呢啲你不能預個價會升好多。息當然點都派到啲，好過你做定期。但唔好忘記商場酒店寫字樓，啲租應該都會受壓，可能過咗最壞但未有耐加，特別係寫字樓，多咗Work from Home，有結構性改變。呢呢啲一定係玩長線

11. 反而Facebook又新高最得意，不經不覺，又就快一季，又就快出業績。好似近期成堆科企都係咁，業績前就升，然後業績得，反而再跌。咁Facebook嘛，就真係唔知iOS對佢地影響有幾大。而家可能仲係升緊之前嘅業績。

每日一圖— 股市短期好危險。但股市長期必勝。建制企業跑贏顛覆者。

12. 股市短期好危險—留意下半截係摩根士丹利自己嘅combined market timing indicator，似乎自己知識財產，冇公開話你知點計。幾次都捉到個市頂。當然未必今次都中，亦唔係叫你清倉（次次都要強調），但唔好太進取啦。

13. 但股市長期必勝—遲下會寫文講呢啲東西，但你見，「股票長遠係升」「而且跑贏晒其他嘢」。你見拎好多時代去比都係咁的，咁你都仲可以質疑之後未必會嘅，理論上都係嘅，但你點知聽朝太陽會東邊升起？你又點知今晚你瞓著第二朝會起到身？又，同樣留意下，股市嘅回報，一年平均先係7%左右咋。係近幾年先再高啲。所以你見出面啲友話幫你一年三四成嘅，祝君好運。

建制企業跑贏顛覆者—類似嘅嘢都貼過，如果睇全文可以去CNBC（但我唔知要唔要付費）。比較有趣係迪士尼跑贏NetFlix，仲有福特跑贏Tesla，另外兩個例子就冇咁好。但，咩原因？首先係估值，二來好多人真係以為啲舊公司係坐低等死的。所以買股票邊係就咁你一句顛覆者個技術好勁天下無敵就掂丫。

Good Read —　銀行Fintech 化敵為友。9個大企業打工求生指南。到底啲友拎幾多錢去買加密貨幣？

14. 銀行Fintech 化敵為友—同上面第三個圖講嘅有少少關係。你見呢，啲咩FinTech，並唔係點真係郁到銀行。券商都還好（RobinHood），銀行真係冇乜點郁到，咩virtual bank嗰啲都係燒錢，而背後好多都有銀行出埋資！香港最成功嘅FinTech可能係Payme—即係匯豐嘅嘢。篇文話你知，銀行根本就擁抱啲FinTech公司，最後你發現FinTech公司服務嘅係銀行，唔係你。

15. 9個大企業打工求生指南—呢類文有唔少，但呢篇幾好。講下大企業生存嘅法則，同埋教你點應對。包括：任何人都可以被取代，度度都有政治，大家啱嘴型重要過一切，個個同事都同你競爭，做嘢要畀人見到先得，好多公司啲改革根本就係混吉為改而改，你係去執行啲白痴決定唔係去質疑，大把白痴嘅企業人格測試，分花紅多數都係亂咁嚟冇乜準則

16. 到底啲友拎幾多錢去買加密貨幣？—絶對可以質疑個調查點抽樣本，個sample size肯定唔係general public，佢嗰堆人三個有一個有買加密貨幣。但留意下啲友買幾多？原來中位數係7000美金。咁就真係死得，根本升10倍都唔會令你變得好富貴（100倍就還好）。另外，原來只係佔佢地3.5%嘅投資，果然個個都係講就大大聲。