ivanliresearch

非農數據極差但美股又新高。買Adidas 不如買Nike．BlackRock 愛馬士又新高（今次畀埋你睇賺幾多）．ESG 基金咪又係買蘋果騰訊！點解美國有工冇人做．Microsoft 賣Xbox一個仙都冇賺過。Creator Economy 全攻略．創興賣盤？美國非農數字遠遜預期。 (Patreon)

Published:

2021-05-08 19:30:06

Edited:

2021-05-08 19:32:59

Imported:

2021-07

Content

快評幾句— 非農數據極差但美股又新高。買Adidas 不如買Nike

大師冇點你— BlackRock 愛馬士又新高（今次畀埋你睇賺幾多）

每日一圖— ESG 基金咪又係買蘋果騰訊！點解美國有工冇人做

Good Read —Microsoft 賣Xbox一個仙都冇賺過。Creator Economy 全攻略

FB Post Summary — 創興賣盤？美國非農數字遠遜預期。

1. 早排咪話有啲個人問題，基本上都解決咗，4月退訂嘅讀者比預期少，更係鼓舞。不過唔知做乜呢排硬係好似冇乜時間，可能更多時間睇嘢？可能Facebook出咗多文，定成日去睇埋啲膠戲？肯定嘅係我瞓得多咗，作息時間都正常咗。

2. 嚟緊可能仲有啲新搞作，應該會在呢度講，但都留意埋Facebook Page 同Instagram．

快評幾句— 非農數據極差但美股又新高。買Adidas 不如買Nike

3. Facebook Page都講咗細半，上篇文（星期五晚收市先寫）亦有提。不再重覆，但美國非農數據的確極差（原因下面每日一圖會再解一次），股市反而好。算相當合理。特別係早排先話驚經濟過熱加息（拿！環環相扣呀！），咁你出個數如果好勁嘅，市場仲擔心。唔勁嘅，又放心多一排。

4. 順便你會問埋，下個月嘅數會唔會又好勁？似乎唔會，因為一日有錢派一日啲友都未必願返工。但同時留意，啲經濟師估嘅數亦會小心啲了。況且，由頭到尾我都唔覺得加息或通脹本身係一個好大問題（但真係留意住個債息）

5. 另外，冇人問，但多人貼，都快手講下。Adidas 股價升，業績不錯，仲提高埋個展望。幾樣嘢：首先，乜乜杯葛事件，都係3月尾嘅事，佢出嘅業績完全未反映。但又同時，點會冇影響？公司都有提到，不過見到慢慢恢復緊，亦同大家估計差不多。至於Adidas提高個展望，扯，你見有邊間公司唔係咁做？

6. 不過我同意嘅係（亦一早寫咗），你見啲咩杯葛都係短暫，L Oreal股價一樣不停新高。當時Nike大跌已經叫你去買，3月尾嘅事。

7. 不方便嘅真相係：Adidas今年股價，認真麻麻地，近年公司都係做得唔好。咁既然期望低，自然彈得多。但如果相信係對公司影響不大嘅，咁我買Nike好過啦。未爆咩杯葛之前都叫過一次。

大師冇點你— BlackRock 愛馬士又新高（今次畀埋你睇賺幾多）

8. 係喎，夠晒悶。咁不如加少少新意，畀你見到真係有買。當然買幾多就唔講了。

9. 咁你見到個買入價，都大約睇到幾時買。講緊1年之內，執近60%，唔錯啦？

10. 至於愛馬士嘛，費事貼圖，但上次買嗰時話埋你知添啦。123蚊買嘛，而家131蚊，咪7%。一個月唔到，相當唔錯啦？

每日一圖— ESG 基金咪又係買蘋果騰訊！點解美國有工冇人做

11. ESG 基金咪又係買蘋果騰訊！—係咪好正呢，你見一隻係普通標普500 ETF，一隻係咩ESG Aware基金，仲有隻係Carbon Transition Readiness。根本，就係買埋一樣嘅嘢。不過當然另外兩隻係收你幾倍嘅管理費。篇文有更詳細討論。另外留意，三隻ETF都係Black Rock的，就係靠呢啲把戲收貴啲。

12. 點解美國有工冇人做—你見到之前呢，職位空缺同申請人數應該大約符合。但最近，空缺大升（證明經濟真係好），但申請人數好少，所以有個缺口，亦造成點解非農數字遠遜預期。點解啲人唔返工？當然因為派錢。

Good Read —Microsoft 賣Xbox一個仙都冇賺過。Creator Economy 全攻略

13. Microsoft 賣Xbox一個仙都冇賺過—同賣Printer原理差不多，部機唔搵得多錢，但賣碳粉先多。微軟賣主機，根本一路都蝕錢，亦唔介意咁做—但賣Game畀你先係和味嘛。另外留意，呢個故事，係蘋果對Epic嘅官司中爆出嚟的，蘋果大約係話，如果冇得當中抽30%，邊有得營運個App Store？

14. Creator Economy 全攻略— 香港都唔係太多人講呢個課題，但大家已經參與其中—你訂Patreon咪就係支持緊Content Creator （即係我）．篇文好詳細咁同你分晒成個生態圈，仲有啲咩唔同嘅公司