契媽變臭X，而家又話畢菲特先股神．早都話市場對美國非農數據太樂觀。納指即時大升．Square．DropBox．嘉年華郵輪Carnival．佐丹奴709 (Patreon)

［認真你就輸］契媽變臭X，而家又話畢菲特先股神

早都話市場對美國非農數據太樂觀。納指即時大升

Square—35億Bitcoin收入但34億幾成本。不過估值唔算離奇地貴

DropBox—收入盈利股價全部唔差，不過都係等賣盤

嘉年華郵輪Carnival（CCL）—夏天開唔到船又如何？

佐丹奴709 —一早知出盈喜啦，但冇諗過5月頭就出，仲要出完有得升

［認真你就輸］契媽變臭X，而家又話畢菲特先股神。

1. 市況都仲係偏靜（但，美股又創新高），其實我係鍾意呢啲市況的，你都應該鍾意，甚至跌下更好。幾時我都係嗰句：你又唔係升多五成就可以收山唔撈，咁所以唔而家跌下，邊有機會買到平啲嘅貨？

2. 但無論如何，你見早幾個月啲股神全部消失晒，Cathie Wood都變連登仔口中「臭X」。故事重點唔係話Cathie Wood靠好彩，而係你見啲「輿論」都係跟紅頂白，升嗰時你咪乜都神乎其技，而家又講返畢菲特先係高手。呢啲嘢，都係少睇為妙。係咁簡單嘅，就唔會咁多人都未上岸啦。

3. 今日會講四隻股票，有三隻提過下，但都唔係好重點推，我亦全部冇買。但，點解仲講呢啲？因為而家真係唔係太多股票好抵玩，況且要寫嘅都寫過，嚟嚟去去嗰十幾廿隻（遲下考慮公開美股持倉，但唔包銀碼同買入價）。

4. 咁仲提嚟做乜？講過了，呢度一向宗旨都唔係畀貼士（雖然偶然都有啲）。畀貼士呢，講真，「次次準我發咗達」。況且你見同樣係一隻嘢（例如CCL嘉華年郵輪），都有人輸錢有人贏錢—而所以我一般都係推啲乜位買都贏錢嘅股票。有咁嘅嘢？有，你見我推咩Black Rock SPGI 愛馬士呢類，日日新高，任何位買都贏。任何位買都贏喎，你估易？

5. 反正有新讀者，唔怕講多次。個宗旨應該係提升你嘅功力，知道市場點運作，同埋提升你嘅心理質素。你睇得耐嘅，落到場自然自己識踢，自己搵到好股票。係真係冇捷徑的（而你個個月畀錢訂就已經慳咗時間去自己睇一大堆嘢）

早都話市場對美國非農數據太樂觀。納指即時大升

6. 原本想留到聽日「大師冇點你」先寫，但好多次都發現有嘢要即寫，攤凍咗冇意思。想講係，早兩日已經在Patreon叫你留意今晚（星期五）嘅美國非農數據。我亦都係等埋佢出先寫今日嘅文。

7. 結果一出？Bingo．我亦在Facebook快講咗兩句。簡單嚟講，市場原本好樂觀，估到1百萬，仲要近日不停上調，甚至有人吹到2-3百萬。但你見我在早兩日嘅文有講明，之前嘅「小非農」ADP數字都不如預期，真係會爭咁遠？（不過話說回頭，小非農好多時都係低估官方數字，遲下解）。

8. 結果一出，見到啦，估1百萬職位增長，結果得27萬！唔好話300萬，連3萬都冇，

9. 背後咩原因，仲可以細講，主要都係因為派錢，咁啲友仲點會返工？亦係上一篇文嘅每日一圖（真係環環相扣呀！）提過，到呢啲友返工時，又係咪好有議價能力會拉高通脹？

10. 無論如何，市場反應就好啦！債息即時落返，股市就彈。特別係科技股彈得勁。之前你見就相反，債息升呀通脹憂慮升溫就整跌啲科技股，因為估值貴嘛。

11. 順手講埋，如果睇Economic Calendar嘅，investing.com幾好。有埋Filter呢下緊要，不過其實好悶，人生應該做下第啲嘢。

Square—35億Bitcoin收入但34億幾成本。不過估值唔算離奇地貴

12. 開場白都係講得較長，快手講下幾隻股票，講隻有興趣嘅先：Square（SQ）。好多人問，但我都冇正式好詳細好認真睇過，我亦係冇買嘅。

13. 公司出咗業績，都未必去到好細睇，你可以睇CNBC。重點係收入遠勝預期，收入講緊升幾倍。而純利都勝預期，拿，隻嘢至少係有錢賺的，都緊要。

14. 出完業績股價當然升，但又唔係好誇張，6%。你睇返未計出業績呢下，年初至今股價都只係原地踏步—當然因為舊年係升咗好多的。

15. 公司做乜的呢？應該好多人熟過我，主要就係支付（Cash App），同埋……炒Bitcoin

16. Bitcoin呢部份正係令我有啲卻步嘅。如果你好得閒咁去睇佢地官方份嘢，你見佢收入升幾倍，只係因為Bitcoin，抽走Bitcoin收入就只係升50%（當然都相當好）。

17. Even worse嘅係，堆Bitcoin都有成本的嘛，35億收入，但成本又34億幾，搞嚟搞去得個桔，Bitcoin毛利1億都冇—但，已經一命救全家，其他業務係蝕錢嘅，咁計埋Bitcoin就有賺少少

18. 無論如何，公司市值就1080億—咁你計個Price to sales，即使抽走啲Bitcoin，年度化大約係18倍咁。貴唔貴？你咪同其他比下，我就認為當然算貴但唔係痴線地貴。可以諗下

DropBox—收入盈利股價全部唔差，不過都係等賣盤

19. 嫌平時提啲嘢冇乜新意，可以諗呢隻。不過我冇買，短期都冇打算買。事實上多數買賣都會通知大家。對上一次就係買咗BTCC LVMH 同愛馬士。而家現金水平近乎零（靠大家join 20蚊或40蚊會員）

20. 呢隻更加係冇乜人理，但都冇計，市值太細。話時話我係付費用戶嚟的。DropBox嘛，唔算有力推，但舊年寫過一排，都係搏畀人收購，而又真係有讀者跟住買咗。不過我係冇買的，亦不打算短期買，主要都係因為……冇錢

21. 最新出咗業績，還好，收入同盈利都勝預期。你見一季都賺4700萬美金，多過Square呀！但始終個想像空間同增長爭好遠的。你見收入講緊按年升12%左右，就同啲Big Tech或者 Snap Pinterest 之類嘅平台爭好遠了。

22. 但市場都對個業績滿意丫，股價仲有得升。年初至今都升一成幾，表現唔差的。但講到尾，增長空間幾有限，亦唔知點變啲新業務，似乎都係等賣盤。慢慢等。扑中幾開心的，你未買過一隻畀人收購嘅公司，都唔好話自己有經驗。

23. 渣咗嘅？咪可以繼續坐。未買而又覺得平時啲嘢聽得太悶嘅，可以考慮下。

嘉年華郵輪Carnival（CCL）—夏天開唔到船又如何？

24. 呢隻快講，因為有人問，早兩日有讀者問跌咗成咁嚟點算。我心諗，冇喎，好堅挺喎，就算你最高位買，都調兩成唔夠，況且之前都提過隻嘢波幅比較大啲。

25. 介紹返畀新讀者，我地寫嗰時2月尾，都未夠3個月。當時23蚊唔夠，之後一度上過近30蚊，有啲讀者就「斬邊留邊」沽咗些少。

26. 我既睇法暫時都冇乜變，雖然行家Norwegian Cruise 都有講話今個夏天照計啟航無望，咁所以都令啲郵輪股跌咗些少。但嘉年華生存就應該不成問題，頂多一年都應該冇乜問題，而點計個疫情都係向正面嘅方向行嘅。

佐丹奴709 —一早知出盈喜啦，但冇諗過5月頭就出，仲要出完有得升

27. 最後，佐丹奴。拿咪講笑，真係寫過的，但我都唔會太矛，呢啲唔好計落「大師冇點你」。雖然當時我都話好想買，結果都係冇買。

28. 結果？越升越有。出埋盈喜，升多13%—但其實點會唔轉賺？舊年下半年都賺到錢，今年上半年點會唔賺？不過5月頭已經出，夠晒有信心。

29. 然後你睇股價？年頭到而家升近60%。不過呢啲好少人會跟買啦，但真係做教材，有啲好公司都係畀人忽略嘅，亦唔好以為咩創新咩科技就多之閉，冇錢賺冇生意講乜都假。有幾多隻科技股今年升到60%？

30. 話時話，之前推過理文化工746，初寫3.8，細寫時4.3，照計唔會點輸錢。而相信公司都應該會出盈喜 —當然盈喜未必一定升啦下。

================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。