第一季回顧 + 第二季展望，港股美股，有埋冧把（下） (Patreon)

恒指第一季邊隻成份股最勁邊隻最差？有乜啟示？

「垃圾」恒指國指一樣有得升，你今年要輸錢嘅，都真係……

第二季有乜留意？「都係嗰啲啦」，債息，美金，人民幣，北水。

新舊冧把跟進及推介，有港股有美股（之前寫過日本英國添）

話埋你知每隻點解買添

最好先睇上集，放心，下集少啲字。

另外，今年年頭寫過一大堆長文，「2020回顧＋教訓」，另外仲有2月中寫過「本輪牛市最大教訓」，新讀者又唔太熟金融市場嘅，記住去目錄搵嚟睇，同今日講啲嘢都有啲關係。

1. 要搞清楚，上篇文唔係勞蘇基金嘅廣告，我唔會出篇文呃呃你。廣告會賣，但另外整篇文，唔計入一星期六篇quota。所以返返去，港股

恒指第一季邊隻成份股最勁邊隻最差？有乜啟示？

2. 港股就同美股有啲唔同，頭兩個月都好似跑贏美股，但3月就香，可能都關人民幣弱勢事。而人民幣做乜弱？似乎就係因為美金強（上集講咗）。恒指第一季都升4%，國指升2%，科指就要輸3%。但3月係差嘅，特別如果你買科指：3月恒指同國指都跌2%，但科指就跌9%，都好甘下。「但一早叫咗你分散啦」「分散咪食唔盡升浪」「而家你咪食盡跌浪」。而根本個市都仲幾好你已經叫救命

3. 恒指第一季表現最好嘅，固然都係舊經濟股，我都有啲估唔到。當中最合理嘅應該係創科669，有讀者問過，但我好少提呢隻股票，「好似從來都係咁貴」，又係舊經濟嘢，做啲電鑽呀之類嘅裝修嘢。咁明啦，食正條水，美國經濟反彈，仲要樓市好強，人人買新屋，唔買新屋嘅就好得閒在家搵人裝修，升得好合理—事後睇的話。真係錯過咗呢隻，但咁多好股，邊睇得晒？（同男人女人一樣，當然人係貪心，但you can’t and you don’t need to kiss every pretty girl/boy）

4. 另一隻，威威嘅，我力推嘅中海外嘛688，又重覆講一次（講到我識背，真的），舊年年尾18蚊時推，因為制裁股價跌咗，當時我覺得反應過度—結果跌到15蚊，然後一路碌返上22蚊（呢兩日跌返啲），第一季升差不多兩成，幾好架啦。呢個推介當然有少少幸運成份，幾個月18蚊上到22蚊亦不見得好巴閉（但都幾好架啦），with hindsight 當時都係太早叫買—但邊有早知？最重要係，你見我一路都冇叫你「止蝕」，亦都一路懶理啲咩新聞。你話唔話到畀我知，點解舊年12月要跌，今年就升返晒？勉強你咪話炒返舊經濟咯

5. 升幅最大嘅，包你估唔到，我都估唔到，真係夠晒垃圾嘅中信267。你見我真係好少用垃圾嚟形容，但中信系（冇錯，任何有中信兩隻字嘅股票），都真係……死得人多。歷嚟搞咁多隻嘢，有邊隻掂嘅？唔覺。真係唔係反大陸（雖然大陸搵人笨嘅股票明顯多過美國好多，但美股唔搵你笨都可以狂瀉嘛），華潤光大都有得畀你賺下，中信啲嘢，真係冇乜好嘢。呢隻267夠晒惡名昭彰，當年炒燶澳紙單嘢夠經典，而家理論上主要係金融嘢（中信銀行中信證券），但今年升咁多，照計係因為啲礦資源業務。冇叫你買呀下!

6. 其他嘅，中石化386不意外啦，你見美股都係升石油股。但交行3328就真係唔明解了，舊經濟喎。

7. 跌得最多嘅？都有啲難估。咁固然小米1810係新經濟，但瑞聲2018都當？喂咁跌得最多嘅吉利175唔係新經濟下話？做電動車又當新經濟？仲有啤酒嘅百威亞太1876同海底撈6862，唔係咁打邊爐飲啤酒又新經濟嘛？

8. 歸根究底，就係殺估值。但你見三大科企，騰訊700阿里巴巴9988同美團3690，又唔差喎，騰訊美團第一季都有得升（4月1直頭勁升）。所以個問題都唔只只係睇估值，仲要睇埋你啲業務係咪真係得，估值係相對於業務嘅，冇增長咪20倍都貴，有嘅咪40倍都仲得。當然啲業務何謂「得」就好主觀，以前要有錢賺，而家蝕錢都冇所謂，但至少你都有收入丫！或者掉轉講，邊啲業務係「唔得」，就比較易睇。一架車都冇整過出嚟嘅，業務可以有幾得？

第二季有乜留意？「都係嗰啲啦」，債息，美金，人民幣，北水。

9. 真係唔好立場行先，「立場好似冇做財經」。但講真的，呢個圖文匯報做，幾好！特別唔止五大，仲有十大最佳同最差藍籌。

10. 好多時記者，或者讀者都會問，第二季有咩要留意嘅嘢，有時都答到（例如舊年第四季就梗係美國大選），但有時都冇乜好答，「都係嗰啲」。你話經濟嘅，扯，咪話咗「經濟同股市脫節咯」，真的。大方向嘅，都知都係重啟經濟，盈利反彈，嗰啲嘢啦。但記住，呢啲人人都知嘅嘢，往往對市場冇乜影響。

11. 所以係好矛盾的，但好似「意外」咁，「之前估到就唔叫意外啦」。

12. 但都認真少少討論。文匯報講嘅，4/5都真係who cares。香港經濟who cares？先唔講有啲讀者只炒美股，就算其他嘅，我都唔會叫你買晒港股，頂多一半。然後你港股入面，又有幾多同「香港經濟」有關？所以真係不用理。大型基金嘅，仲會唔會斬？鬼知咩，但咁都驚嘅，就永遠唔洗買嘢，而根本都未到復活節已經冇人再提韓仔啦。

13. 第6點有啲意思，留意係睇企業盈利，唔係睇經濟。不過，近年美股啲公司似乎同啲分析員溝通得好好（打晒開口牌），都少見啲業績差到離晒譜—反而好多試過係業績好都照跌。呢個我暫時唔太擔心。

14. 1/2啦喎，都重要的。但點估？又點量化？況且你見，呢啲事件多數只影響個別股份，同埋影響短暫。你見啲大跌浪大升浪，有幾可因為呢啲政治嘢？除非你估打仗咯，不過做perma bear好慘的，好多等足幾十年，乜都輸晒。同埋真係估打仗嘅，怕且你都唔係會訂我Patreon咁好閒情啩？

15. 3同7應該係比較重要嘅，但3都冇7咁重要。「北水」嘅嘢，首先只係影響港股唔影響美股，而冇叫你只係買港股。咁另外，又唔係話北水唔嚟就唔升，之但係可能對港交所388股價影響大啲，況且，同1/2一樣，點量化？點估啲大陸佬諗乜？

16. 最值得留意係7，因為始終比較透明，暫時亦主要係市場力量主導。我自己係估債息仲有得上，大市咪在震蕩中上升，但應該今年冇上年咁易玩。至於美金嘛？照計有得跌，反彈到呢啲位，聯儲局應該可以幾放心印錢買債。大約咁估，但當然我可能錯，神仙咩。

新舊冧把跟進及推介，有港股有美股（之前寫過日本英國添）

17. 最後，你話，冧把呢？答案係，好似冇喎。

18. 正經啲講，平日出文咪會提咯，或者平日 Facebook Page 同 Instagram都會貼。今次呢篇文唔係講冧把的，亦都未必會出一篇（結果都寫咗一大段），諗到有好嘢咪寫，而家迫我交出嚟盞害咗你

19. 不過有個好消息，因為失咗業，唔再拎證監牌，照計買股票之類方便啲，亦可以公開啲買賣。照計會多啲嘢同你分享，但當然背後我仲有乜貨，都未係時侯講出嚟住。

20. 你話近期嘅心水股，都係冇乜嘅，啲嘢都唔係平。可能會望下NIKE，業績麻麻，早前跌咗一浸，但只係因為啲船出唔到貨，非戰之罪。之後就咩杯葛之類，大家都知，多數搞一輪又繼續打牌。

21. 另外，之前買比特幣信託GBTC，係有少少錢賺嘅，但跟唔足，都預咗，因為有premium to NAV變Discount嘅問題，之前都有估到呢個問題，所以買嗰時已經揀premium較低嗰時。我就認為問題不大的，「反正我係唔信的」，只係買咗4萬蚊，係預輸晒的　—　但萬一佢升10倍咪大鑊？至於而家呢啲幾十巴仙上落，都係小事，因為買得少。

22. 而同時間，GBTC嘅溢價回落甚至變折讓，亦因為加拿大出咗隻「真」嘅比特幣ETF，BTCC。照計個premium/discount 細好多（亦因為咁啲GBTC嘅友走晒），再買咗4萬蚊港紙。

23. Anyway，好重要嘅講三次。本人係唔信比特幣嘅。本人係唔信比特幣嘅。本人係唔信比特幣嘅。「但萬一我錯呢？」．都話買個保險，輸晒，冇所謂。升一兩倍，生活如常，但升十倍一百倍我冇買嘅，就唔太好（冇錯，呢啲就係典型嘅bias, Fear of Missing Out，FOMO，但我控制咗我嘅注碼）

24. 而可見將來呢度都唔會討論呢啲加密貨幣甚麼，我嘅身家絶大多數都係股票同埋層樓（定你以為買咗8萬蚊呢啲嘢佔咗我好多？）。只係近期冇乜新心水，事實冧把都畀咗唔少，但為免你忘記，再提下。

25. 大科企FAAMG嘅，一路都有，當中特別睇好Facebook，廣告費不停加緊。舊經濟嘅，NIKE講咗，嘉年華（CCL）郵輪仲有得玩但唔係渣過世。晶片相關嘅，ASML成日推，想搵未破頂嘅，NVIDIA吧，低位升返唔少。媒體嘅，NetFlix同迪士尼，why not both？支付嘅，Paypal同VISA吧，暫時未見到好易動搖地位（但當中反而VISA好似仲穩）。悶嘢嘅，煙仔股Altria（MO），BlackRock同SPGI咯。銀行？升咗唔少了，但揀一隻都會係JP Morgan．

26. 仲唔夠？一大抽嘢了。

27. 至於港股，仲難捉。但依然覺得阿里巴巴9988 可以買，當然仲有理文化工746。港交所388我估都買得過。金融股就友邦1299同中銀香港2388，穩陣悶下嘅咪領展823同長江基建1038。超級冷門咪睇佐丹奴709

28. 嘩，都真係包咗好多公司，連點解買都話埋你知。值回票價，有機會可能整個表睇下呢堆嘢表現。

========================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。