第一季回顧 + 第二季展望，港股美股，有埋冧把（上） (Patreon)

練心法：最好年頭畀三個冧把你渣到年尾，但點預到咁多嘢？

美國債息：Climbing the wall of worry

美匯指數：75都見過呀，而家驚乜？跌多多都得。

VIX一路落，依然係錢太多。股災？乜股災？我啲股票好好喎

錢印極都有，2008年夠話惡性通脹，AND？

道指跑贏納指幅度，60季以嚟最多，有乜啟示？

本細所以要搏大？錯，本細嘅，你應該專心返工

道指標指最好同最差係乜股？有乜規律？

標普500有400隻成份股第一季升，80%你都買唔中？

納指第一季超過一半嘅升幅係嚟自最後一日！

結論：今年咁嘅市你都可以輸錢，都真係失敗，要檢討下

1. 月頭多返啲新讀者又開心返，歡迎新舊讀者。留意最底係有文章目錄，有義工讀者幫手整，再感激。同埋記得Like 本人 Facebook Page 同 Instagram@ivanliresearch，煩氣講句乜幫手share and like就最好

2. 另外你仲會在星期一明報（冇錢的），經濟一週（都係冇錢的！但可以賣Patreon廣告），同埋蘋果（呢個有錢的！仲可以照賣廣告）見到我

3. 講明先，呢篇應該係星期四出嘅文。但因為電腦香咗，所以冇出。結果點？今日呢篇大作，8千字，分上下集，當找咗星期四條數加埋今週末了。無數架啦！一般我都只有遲，好少走數。 8千字喎，一篇頂4篇都得啦。

4. 今日呢篇我幾滿意（留意上面啲標題有啲正文冇，唔係漏咗，係為FB 宣傳加上去），似乎啲文回勇，雖然我相信3月好多人退訂嘅原因係因為輸錢，唔係我寫得差咗。又，見電影節期間我都仲keep 到寫文，不過我個人樂觀，「諗定之後去旅行點算」，文當然照出，「因為錢都會照收」，唯有寫短啲，或者錄音算數。

練心法：最好年頭畀三個冧把你渣到年尾，但點預到咁多嘢？

5. 今年年頭寫過一大堆長文，「2020回顧＋教訓」，另外仲有2月中寫過「本輪牛市最大教訓」，新讀者又唔太熟金融市場嘅，記住去目錄搵嚟睇，同今日講啲嘢都有啲關係。最後2020展望都冇寫，但當然係香港人精神，on the job training，the best plan is no plan．我知大家都想最好年頭畀三個冧把你渣到年尾升幾倍，但拳王泰臣話齋，Everyone Has a Plan Until They Get Punched in the Mouth。點預咁多嘢？我係教練但你上台打嘛，都係靠你平時練習同學嘢，到時就自然反應應對。

6. 同大家好快回顧下，2021發生咩事。好多人都係唔知的，但一句講就係：股災？股乜災？我啲股票升得幾好喎。你輸錢就檢討下。

7. 以下好快睇下幾樣要睇嘅嘢，留意唔包括咩經濟數據，以前嘅文（好多文都寫過）都寫過，「股市當然同實體經濟脫節」，你睇2020年都知。況且，經濟啲嘢，反映晒在金融市場啦，即係你以下見到嘅嘢。

美國債息：Climbing the wall of worry

8. 首先，債息。山姆大叔借錢嘅成本，一般睇長息，除非死人冧樓先睇短息（例如舊年3月）。你問大多數學院派人都話你知債息高不利股市，而我其實都算係，所以我都係咁講，但始終股市唔係自然科學，啲關係冇咁簡單。你見債息由年頭0.9%，升到而家1.7%，都真係好驚人。當中股市都有啲震蘯（但我唔覺得咩股災，舊年1個月跌三成幾嗰啲就股災），但見到都真係Climbing the wall of worry，一路驚一路上。股市係會習慣的。

9. 正如我最初用notebook打文都唔慣，而家咪又係打幾千字！真係唔好低估人類嘅適應力。扯遠少少，舊年疫情你一樣應該咁諗，有冇諗過讀歷史時以前啲人在啲世紀大事中，點生活架呢？舊年嘅疫情的確係世紀大事，但我地身處其中，咪又係咁生活。所以點解我可以常常樂觀，因為人類歷史都係樂觀者必勝，悲觀嘅基因會被淘汰。

10. 不過你問我，而家股市值搏率當然低咗。「舊年叫你買又唔買？仲個個鬧我添」。真的，舊年3月底買太高難度，但去到9月10月，債息0.5%，真係唔買就笨。可惜多數人都係升晒先買。咁而家仲買唔買股票？買！一來，我可以錯（好多人都忘記呢點），二來，值搏率低但你仲可以買乜？實務上，咪配置，可能買啲冇咁高風險嘅股，或者買第啲市場（之前講過英國）

美匯指數：75都見過呀，而家驚乜？跌多多都得。

11. 第二係美匯，之前啲文提過啦，一般呢個都係風險指標，美匯升代表風險胃納低，死人冧樓個個渣美金。你見同債息有啲似，今季美匯都係慢慢咁上，但去到3月特別抽得快。但股市還好。又，好似之前都有提（冇就而家講），美匯強，一般見到新興市場跑輸，你見呢一季都係咁。

12. 好啦，美金點解咁強？我都唔知，可能係加息預期？真唔知，唔係乜都有答案的。但一路印銀紙美匯又一路強，都顛覆唔少人常識，對不？所以真係冇咁簡單。不過我估個潛台詞即係：仲有排可以印。真的，印錢當然唔會冇後果（唔會啩？），應該印得多會弱，但未咁快到嗰個點。你睇遠啲，美匯在金融海嘯前後，跌到75都試過，而家有乜驚？

VIX一路落，依然係錢太多。股災？乜股災？我啲股票好好喎

13. 冇錯，咩GME又好，NFT又好，美國樓又勁升，香港樓又唔跌，在我心中，都係錢印得太多。你睇呢個圖，係今年聯儲局嘅資產負債表（免費嘢），而家仲係一路擴張緊。

14. 不過啦喎，其實同舊年比，今年就好克制，亦都冇必要好似舊年咁狠。你睇拉一拉個scale，成件事即時又唔同晒，所以唔好只係睇圖，最好計埋數字（當然圖又冇數又冇齋up嘅更大鑊）

15. 你問我？比較可能嘅玩法，既然債息似會再升，當然聯儲局咪再買債咯，即係再印多啲錢。頭先咪講咗美匯跌到75都試過，世界照樣運行，而家93，大把空間比美金跌（當然聰明嘅會問：咁印法會唔會惡性通脹然後又推高債息惡性循環？「就真係要試過先知」）（真的，2008年都以為印咁多錢一定惡性通脹，結果呢？）

16. 咁所以最後，你講VIX，都冇乜意思，鬼唔知今年跌咩。冇錯中間有啲起伏，但同舊年升到80真係兩回事。即使係舊年323美股見底後，都仲有幾次見到

道指跑贏納指幅度，60季以嚟最多，有乜啟示？

17. 好啦，美股方面，都簡單講一次。大家到今日都應該知，舊經濟跑贏新經濟．雖然有時我覺得咁分都幾唔科學（ASML新高添，又係咪新經濟？），可能講價值Value跑贏增長 Growth好啲（但ASML都唔見得係價值股），但暫時唔分咁細。最顯而易見嘅，道指主要代表舊經濟，納指就代表新經濟（而最具代表性，如果只揀一個指數講，當然係標普指數標指）。咁你見，道指今季唔止跑贏納指，個跑贏嘅幅度仲係十幾年最勁嘅一季。

18. 原因？好可能都係因為債息抽上嚟，殺估值。貼多個圖，ARK vs 標普500，你見年頭都係威係勢，但到2月中開始狂瀉，正係債息同美匯抽上嚟嗰時，殺晒啲高估值嘅發夢股，而你見啲舊經濟好多不跌反升。

19. 當然事後講，呢啲係accident waiting to happen，物極必反，增長股不停跑贏價值股，總有個位會反轉，但事前極難估。你話有乜指標？都冇乜（反而舊年2-3月跌市你都可以睇VIX），你見網上個個股神咪知，但一樣好難話畀你知點解2月頭唔死2月中先死。特別你身處其中，一日升一兩成，係十分陶醉，只會怨自己點解唔買多啲，聽呀埃汾講走去買NIKE 買688條友都唔識嘅—但到跌落嚟你咪知自己冇你想像中咁輸得咯

20. 點解決？有乜教訓？冇架喎，咪又係嗰幾味。避免time market，stay invested，但買大大注，唔好睇咁多新聞，分散投資。（然後真係有人同我講，我有分散呀，我有買NIO啦又買TESLA再買FUBO，然後仲有買微盟同快手。Okay……至少都有港股同美股嘅）

21. 但有幾多人會聽？特別係有個心態，會話都明我講乜，但自己本細，一定要搏—都理解嘅，但，其實本太細嘅，你應該專心返工。況且，本細嘅多數係年輕人（如果年長都本細……我都唔知點算），優勢係時間，同埋有得加人工。我就當然係拎公司啲時間去做自己嘢划算

道指標指最好同最差係乜股？有乜規律？

22. 個股方面，反而我會快講，因為同上面有啲重覆，而且美股冧把太多，大家會買嘅又好多都唔同，難以一一講（相反港股大家買嚟買去都係嗰幾十隻）。

23. 先睇標指最好同最差表現嘅（幾好用，或者呢個網都得）。標指好處係多公司，但壞處就係好多公司你都唔識（其實主要係我唔識）。先睇最好嗰堆，幸好有啲都識。馬拉松係做石油嘅，唔係賣鞋嗰間（OK，好爛），第二位嘅Diamond Black都係石油，唔係賣酒（OK，更爛，但我真係有check），第五嘅西方石油。你見全部都係舊年死晒嘅嘢。留意呢個現象好多時會出現，醜股大翻身嘛，mean reversion嘛，舊年差嘅今年好，舊年好嘅今年差，可以睇Charlie Bilello嘅文（之前我都貼過）。第3嘅L Brands做乜？Victoria Secret，當然舊經濟．仲有American Airline，都係舊經濟．仲有Applied Materials，半導體設備，升乜？同ASML差不多，晶片荒，呢隻唔係舊經濟啦啩？

24. 最差嗰堆？就真係好多都唔識了，除咗AMD，但目測都係啲新經濟發夢股。AMD都係「新經濟」但唔係發夢，但舊年升到痴線，今年咪冇力。邊個話唔使睇估值？咁升十倍你買唔買？一百倍呢？故事都係一樣的。

25. 另外留意，年初至今跌12%，就已經係標普指數500成份股入面排到尾五—可想而知今年股市完全唔差，而你輸錢嘅，都真係幾失敗。要檢討下。我講真的，唔會特登安慰你，輸錢嘅，真係有問題。但有問題咪改，唔好放棄治療，但首先承認自己有問題先。（FYI，年初至今，應該得100隻成份股要跌，輸錢嘅即係你至少跑輸八成）

26. 睇道指嘅，冇乜特別，成份股太少。但見到最勁嘅，唔少係金融股，債息升嘛。仲有舊年極殘嘅石油股，以及舊經濟Caterpillar 同 波音

27. 道指跌嘅，都冇乜特別啟示，最多係蘋果，新經濟。但舊經濟大牌子可口可樂　P&G呢啲消費股都要跌。軟件股SalesForce都跌，留意跌2%都成為尾七。又話埋你知，道指都係得9隻成份股今年第一季要跌。

28. Nasdaq？唔貼了，太多隻。

結論：今年咁嘅市你都可以輸錢，都真係失敗，要檢討下

29. 直接話埋你知，今年第一季，道指升8%，標指升6%，納指升3%。更頂癮係納指第一季超過一半嘅升幅係嚟自最後一日！所以點time the market？．留意埋，根本3月，道指都升7%，標指升4%，納指就升0.4%。所以你話3月好差？根本係某啲人買啲嘢嘅問題。標普指數創新高添呀

30. 往後會再講，但講埋你知，恒指第一季都升4%，國指升2%，科指就要輸3%（而3月港股就三個指數都跌嘅）

31. 好啦，打個和，我當你最笨，只買指數基金，甚至唔計你平均成本法（得3個月應冇乜分別）。當我年頭6萬港紙，買晒呢6隻指數嘅ETF，回報係幾多？就係以上嘅平均，3.3%。咪6萬蚊變6萬2，執兩千。「咁咋？」「係呀，就係咁」「都未夠我去次日本」「但總好過你輸錢」

32. 將來我會開篇新文講，但嚟啦喎，即係話，你今年第一季要輸錢嘅，真係出咗好大問題，6個指數你至少跑輸咗5個。再直接啲，你今年第一季冇3.3%回報嘅，都真係好大問題。根本你好地地買指數基金，都有3.3%回報

33. 我知，你會覺得3.3%回報可恥嘛，但現實呢？現實係，如果你季季都有3.3%（唔係好脫離現實嘅嘢，我買指數咋喎！），一年都14%，喂，幾好架啦，你見好多基金都係咁上下。或者掉轉諗，3.3%回報你覺得好差 —咁連3.3%都冇係乜？

34. 當然揀股係過癮的，叫人不停買指數係會畀人柴台的，所以我都推個股，自己都炒。但好似都講過好多次，正餐同零食咁，你個核心持股，應該係啲指數，或者至少唔會同指數爭好遠嘅嘢，而唔係一隻唔知乜嘅增長股。閒錢，咪拎去考眼光當賭錢。

35. 之前我好多時都批評基金，主要係講佢地跑輸大市。咁到我自己搞「勞蘇基金」，多數讀者都厚愛我，冇正面質疑，但心中都可能問「喂你又話基金搵笨，做乜自己又搞？」

36. 這個嘛，除咗想講，「個個男人都係賤人想呃你上床但我唔同」「條條女都係貪你有錢想同你一齊但我唔同」嘅「本人例外論」（十分危險，因為個個都咁講），後來我真係仲明白咗一樣嘢

37. 基金，冇錯係超過一半都跑輸「大市」，但根本「大市」不容易超越。好多人（包括我）會笑基金經理，扯，你咁咁咁回報，買呢啲呢啲嘢，我不如去買盈富基金2800或者QQQ —表面好似啱，但我呢幾年接觸讀者多咗，發現個盲點係：根本多數人係連指數基金都跑唔贏嘅。

38. 既然係咁，即係好似呢排都聽啲讀者講，自己玩輸晒，以後都係幫襯勞蘇基金算。都真係可以諗，仲未八萬五的，一路進行中，但反正唔急，有乜咁急？我四十二歲都未急，你急乜？

39. 新讀者唔知咩係「勞蘇基金」嘅，可以睇呢度，或者呢度。有興趣歡迎PM我，冇任何commitment 或burden。

40. 可以睇埋下集，已出。

========================================

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。