ivanliresearch

點解跌？冇乜點解。友邦1299，港鐵66。中概股騰訊音樂愛奇藝狂瀉兩成。舊車廠跑贏Tesla．舊媒體跑贏NetFlix。市場盡是好消息。Facebook 審查指南。新興市場機遇處處。大姆指尋找馬蘭頭。 (Patreon)

Published:

2021-03-24 20:00:06

Imported:

2021-07

Content

快評幾句—「停打疫苗歐盟制裁土耳其風暴蘇伊士塞船」點解跌？冇乜點解。

兩個冧把定下驚—友邦1299，港鐵66

大師冇點你—中概股騰訊音樂愛奇藝狂瀉兩成

每日一圖—舊車廠跑贏Tesla．舊媒體跑贏NetFlix

Good Read — 市場盡是好消息。Facebook 審查指南

FB Post Summary — 新興市場機遇處處。大姆指尋找馬蘭頭。

快評幾句—「停打疫苗歐盟制裁土耳其風暴蘇伊士塞船」點解跌？冇乜點解。

1. 港股就固然差啦，但問你點解？可能你都答唔出。明明債息就回落啲，去到1.6厘邊緣，咁做乜恒指跌咁多？

2. 我保證，你一定會不停搵啲理由。如果你睇新聞嘅仲大鑊，因為佢地一定要搵啲理由（唔係寫乜？），有時就係打畀好似我呢啲咁嘅人，去搵啲理由。

3. 好啦，你諗到乜理由？哦，香港停打復必泰，抗疫不力。咁大影響力？然後香港啲疫苗唔打影響埋啲大陸股都跌10%？你覺得make 唔 make sense？可惜好多人就係咁，跌六百點總要搵理由，最方便就睇今日見到嘅新聞。

4. 同理，可能你會話歐盟制裁中國（其實得幾條友），中國同外國越走越遠（似係），經濟孤立。咁似乎make sense 啲，因為你見A股都弱（但弱咗好一排）。不過，做乜日本仲跌得多過香港？印尼印度呢？又關中國孤立事？

5. 仲有，蘇伊士。媽的，seriously？我知訓低咗隻船，塞住晒。但大佬，你諗真啲，係咪想笑？一年後我保證你唔記得今日講過呢啲嘢。真係全球運唔到油然後油價急升又爆煲？正如往年負油價，我見有啲天才話又股市爆煲呀，頁岩氣公司破產呀銀行唔掂呀。我叫寫呢段嘢嗰條友，唔好Google，講一間最大嘅頁岩氣公司叫咩名。佢都答唔出。咁你認為，在銀行本嘢度，可以有幾錢？呢啲就係無限擴大咩蝴蝶效應嘅問題，咁搞法一日應該幾十次股災。

6. 然後，土耳其，拿，再近磅啲啦。驚傳染，新興市場風暴，呢啲比較有水準。但都係奇怪，星期一佢跌到七彩又唔傳染？但無論如何，呢個講法正常少少，我應該週末會講下。當然我係叫你少擔心，班土耳其佬慣架啦。

7. 講到尾，點解跌？我畀兩個答案你，睇你滿意邊個。第一係美金強，即係環球避險意識提升，風險胃納收縮。Sound so pro，而且剛剛大家見到VIX跌到低位嘛，低過20。咁應該知道，風暴之前平靜，呢啲位就易跌市架啦（正如VIX舊年升到80 嚇到死，股市就見底）。當然實際要捉邊個位係極難。但原理不難明。

8. 不過你諗真啲，講咗一大堆呢啲好似幾合邏輯，又有啲術語嘅說話—其實都係答咗等於冇答。點解跌？因為市場驚咯。驚乜？唔知喎。

9. 所以，畀最好嘅一種答法你：就係冇乜點解。人就係鍾意問點解，但點解乜都會有點解？你解釋一個月一年，都仲好啲，一兩日嘅跌幅，可以有乜點解？上次咪畀過文你睇咯，冇睇嘅睇多次啦。

10. 嚟啦喎，唔計遠古波幅極大嘅年代，我只計2009年開始，到而家12年，3000個交易日，有165次跌幅超過2%。即係一年有14次，每個月一次—你肯定你個個月都搵到個理由？特別係，你見到美股又正正常常（雖然個別科技股都回得勁，隻郵輪股Carnival單日由升轉跌，都幾難睇），唔似係咩大危機。

11. 都係嗰句，大佬呀，納指標指恒指都好，年初到而家仲有得升，又點股災呢？你高位買就當然係另一個問題，咁冇人叫你一注獨贏架喎。好多時係庸人自擾，食得鹹魚抵得渴，你想捉timing 就有咁嘅問題，

兩個冧把定下驚

好啦，講咗一大堆，畀個冧把你定定驚。兩隻高位都回咗超過10%。

12. 第一隻係友邦1299，不用多講啦下話，債息高企對公司有利，通返關更加啲大陸單增長返返晒嚟。當然因為而家通關無期跌咗—咪而家買咯。

13. 第二隻，港鐵66，睇真啲我有啲保留。高位都叫做回咗10%，但唔算極殘。但已經連跌十日了！想防守性重啲就買吧.

大師冇點你—中概股震散

14. 之前都講過下，嗰啲在美國上市嘅中概股，係有相當風險的。唔係業務本身（固然有啲業務都垃圾，但我唔會推），而係畀人強制除牌。如果已經在香港第二上市嘅就唔使擔心（例如阿里巴巴或京東），但只在美國上市嘅就煩了。

15. 就講就到，今日就話美國證監通過修正案，話唔合美國審計標準嘅，可以退市。都係舊嘅東西，之前都預咗。問題堆嘢本身又累積大量升幅，當然跌啦。騰訊音樂同愛奇藝，跌夠兩成。「拿，呢啲就有原因啦」

16. 我就唔會叫你撈嘅，但真係二搏一，都寧願係騰訊音樂。至少大股東正常啲，又有外資持股（Sportify）．當然，再講一次，大把好股票，我自己就兩隻都唔會買。到時真係除咗牌就唔好嚟搵我。

每日一圖—舊車廠跑贏Tesla．舊媒體跑贏NetFlix

17. 唔同行業，唔同source，但講緊類嘅現象：今年都係啲傳統公司跑贏後上嘅顛覆者。亦係好多之前炒新經濟股嘅人嘅盲點：你只講咩前點點巴閉，但總有個價，去到某個位就會雪崩。唔通福士而家忽然技術唔同咗？

18. 舊車廠跑贏Tesla—你夾硬自圓其說嘅，可以話福士都有突破技術（明明舊年又話Tesla 一統天下）。但你解釋唔到點解Ford之類今年都升，仲要大幅跑贏Tesla．唔睇價只吹故事就有呢個問題。

19. 舊媒體跑贏NetFlix—情況差不多，迪士尼早排跑贏NetFlix你都仲覺得情有可原。但Discovery仲有 ViacomCBS（主要係CBS，仲有一大抽嘢）都跑贏，就好神奇了。都係估值。

Good Read — 市場盡是好消息。Facebook 審查指南

20. 市場盡是好消息—再冇時間都建議你睇咗佢，反正好短。Charlie Bilello 舊年3月中寫過一篇When All News Is Bad News，正係舊年見到講到世界末日咁。然後今年冇耐前佢寫咗呢篇When All News is Good News，係呀，而家好似乜都係好消息咁，經濟反彈，疫情受控，有疫苗，經濟重啟—但偏偏股市唔多好，甚至急跌。道理同教訓都好簡單，因為舊年啲嘢平，而家貴，跌嗰時唔買，唔通升晒先買？但知易行難，因為要咁做代表你要好精神分裂：個個意志消沉日日跌時你買嘢，人人發達時你沽貨。好難的。退而求其次？你唔敢低位買，咁至少你唔好低位打靶。或者簡單啲，個個月定期買，乜都唔睇。

21. Facebook 審查指南— 又，語言藝術啦，明明係censorship，改個名叫content moderation 即時好聽好多。衞報得到嘅Facebook內部文件，教啲Moderator（好多南亞仔）邊啲言論得邊啲唔得。都相當詳細，報導冇登晒出嚟，但舉咗啲例子，連邊隻emoji代表乜意思都有分。同場加映，仲有講佢在啲「非自由國家」點操作（一般都唔跟當地嚴苛嘅法律，例如泰國），以及講原來你可以公開想人死叫人去死 — 不過只有公眾人物。普通人你去恐嚇，就必定ban account．但點定義公眾人物？指引都有寫。