阿里巴巴騰訊又被搞，會煩一排。美債息又升，但殺傷力已經冇咁勁。 英歐股市估值差距16年最勁。戲院點賺錢？悲觀的樂觀者。點解增長股見頂。白糖糕的故事。當年相戀意中人。 Patreon目錄上線了！ (Patreon)

快評幾句—阿里巴巴騰訊又被搞，會煩一排

大師冇點你—美債息又升，但殺傷力已經冇咁勁

每日一圖— 英歐股市估值差距16年最勁。戲院點賺錢？

Good Read —悲觀的樂觀者。點解增長股見頂

FB Post Summary —白糖糕的故事。當年相戀意中人

版務— Patreon目錄上線了！

1. Ivan正式失業了，以後就靠大家。搵工？不容易，各種原因，有大圍原因有本人原因。而講真Patreon應該先係我真係想做嘅嘢，收入亦相當不錯，我亦唔擔心話讀者會流失（留唔到讀者係自己問題）。但之前提過，我唯一擔心係成個平台會出問題。係一啲機會唔大但又唔係冇可能嘅原因，種種加埋個機會冇你想像中咁細。例如中資買咗Patreon大家罷用，或者國安法封咗 Patreon（機會不細）。

2. 不過我suppose大家都係支持我本人，唔係任何平台，咁可以轉場嘅。之前提過，真係轉可能轉方格子或Substack，兩個都唔會比Patreon好用，你亦唔使去開定戶口，只係得個知字。總之我唔係睇得咁悲，讀者係睇我，唔係睇個平台，我吹雞自然跟我走。固然平台都重要，但有錢搵嘅，自然有人搞。其實Facebook Twitter自己都搞收費訂閱啦。

3. 當然仲有勞蘇基金。簡介呢度，好快寫個詳細啲介紹。有興趣PM我，之前PM不用再做。

4. 見工呢？點解難？因為，唔係好多公司會畀你寫Patreon，大公司已經實唔得．真係講見工，之前MK見工記嗰個工作都幾有趣嘅。成事先分享，機會唔算好大但又唔係冇（否則我提都唔提），正路可以照寫Patreon。但就會同勞蘇基金有衝突了，有MK工返，就唔搞勞蘇基金住 — 但只係遲啲，你可以話MK工係為勞蘇基金舖路．

5. 所以，一係 Patreon＋MK，一係 Patreon＋勞蘇基金，又以前者比較好。當然更大可能係冇MK亦冇勞蘇基金（唔夠客仔點開？），只得Patreon．

6. 今日兩篇Good Read都好睇，講心理，mindset．越嚟越發現，唔練內功只練招式係好易出事嘅，唔搞掂個心態只係睇冧把亦好易輸錢。所以得閒洗下你腦。當然啦，心態啱之後都仲要有啲 hard knowledge，但感覺反而前者難求。

快評幾句—阿里巴巴騰訊又被搞，會煩一排

7. 先講港股，走勢極為難睇，已經好多日係升轉跌，仲係升少少轉跌多多，未必有咩啟示性，但只係磨損你心靈就已經夠慘。當然個別股票，例如之前推嗰啲中銀航空2388 或理文化工746嗰啲升嘅，另外你見到啲內房股好強。但正常地你買港股呢期會輸錢．呢排港股甚至開始跑輸返美股（早前跑贏）。

8. 呢浸跌市都煩的，因為係啲比較惡搞比較大影響嘅嘢。例如人民幣回軟，或者北水退潮，或者A股弱。當然最麻煩係政治嘢，阿里巴巴又話搞嚟搞去，但畢竟股價已經落後，我又唔太驚，況且之前都講過，習近平點名表揚，死唔去嘅。更煩係騰訊，千萬唔好以為搞咗阿里巴巴騰訊就得益，「阿爺好公平」，個個都搞，以前騰訊畀人搞過手機遊戲，而家到金融業務。會煩一排咯，有耐性可以慢慢儲，但跌5%（嘩跌幾廿蚊呀）都叫救命嘅就算了，你睇下嗰時阿里巴巴嗰時跌幾多%？

大師冇點你—美債息又升，但殺傷力已經冇咁勁

9. 拿，真係可以出嚟威。早幾日咪講，估債息會再升，但唔使太擔心，殺傷力冇第一次咁大。

10. 咁你見到星期五晚美股又係玩呢樣啦，劇本同之前差不多，今次10年債息上到去1.64%，成年未見過了。又係科技股跌，道指升，舊經濟跑贏新經濟，價值跑贏增長。但，你見科技股啲跌幅冇之前咁恐怖了（上一浸已經跌咗啲亦係原因），市場會習慣的。另外，標普指數星期四晚先創新高，道指就星期五再創新高，唔好同我講乜鬼股災啦。

每日一圖— 英歐股市估值差距16年最勁。戲院點賺錢？

11. 英歐股市估值差距16年最勁—就事論事，唔少港人戀英，呢度讀者都係（我見有啲畀英鎊），但你見之前十幾年，兩地股市估值都係差不多，齊上齊落的。但呢兩年英股明顯大幅跑輸。原因？唔知，可能脫歐？但，唔覺得係咁大影響。唔止一次講今年我覺得英國股市會好，有機會寫詳細啲。

12. 戲院點賺錢？—即使係疫情前，戲院都係唔多賺錢嘅行業。個圖話畀你知，收100蚊賺2.5蚊 operating profit—分分鐘仲要畀利息 折舊交稅。但又，點解蝕本生意有人做？存在就有原因。首先，好多係一站式咁做，又做製片又做發行又做經理人拍埋戲有埋自己戲院。美國而家唔畀，但日本係咁。另外，正如搞波拍戲搞傳媒一樣，老細可以有好多其他界外利益，幫到其他嘢。

Good Read —悲觀的樂觀者。點解增長股見頂

13. 悲觀的樂觀者—BBC嘅文，睇到時我哈哈咗出嚟，好似為我寫咁。應該有人見我在不同媒體寫自我介紹，都會寫自己係「悲觀嘅樂觀者」。除咗玩文字外，。亦有真意思—悲觀嘅樂觀者始終都係樂觀者。呢篇文原題係'Tragic optimism': The antidote to toxic positivity。冇錯，悲觀嘅樂觀者，相對就係toxic positivity。篇文有啲吹水，但你平時睇我文真係睇到咩係「悲觀嘅樂觀者」。例如我永遠stay invested，近乎從來唔會沽空，就已經話咗畀你知。

14. 點解增長股見頂—又係reformed broker嘅文，寫得好好。個題都唔係最重要嘅嘢，我鍾意佢講一樣嘢：股票低手或新手先要樣樣搵理由，今日做乜跌300？前日做乜升400？有經驗就知道，好多時啲嘢係冇理由的，世事就係咁。冇錯，畀人飛，或者畀人炒都係。

FB Post Summary —白糖糕的故事。當年相戀意中人

15. 白糖糕的故事—有返啲以前寫非金融文嘅風采，人地free 一碟白糖糕畀我，我都可以諗咁多嘢，仲即時打篇文。巨蟹座嘛，好敏感的。

16. 當年相戀意中人—其實係被炒記2.0嘅前言，但真係偶然過偶然，廿五年前嘅舊女友，廿年冇見，十年冇傾計，忽然PM我話佢都畀人炒咗，好唔開心，問我點解可以處之泰然。好簡單，炒多幾次咪慣。

版務— Patreon目錄上線了！

17. 是的，講左一輪，卒之上線。之後可能會再改進少少，例如分返類，加返啲tag，但暫時可以用住先。以後好可能每篇文最底都放返，或者大家自己BookMark，照計你地就Read Only嘅，但如果發現改到都唔好手多，話我知。畀啲公德心。再次多謝義工讀者，我諗免佢一年年費冇一話唔公平架可？

18. 另外，暫時唔想講得太死，可能冇得撈後會多啲時間。但呢排發現我根本冇時間快手回返之前大家在文章嘅留言。我仲係會去回返，但你分分鐘等幾個星期甚至一兩個月。所以，有啲比較急嘅問題，PM我吧。Patreon Message最好。但當然文章留言仲係有用嘅：你嘅意見或問題其他人都會睇到，亦都會有其他人回你。