一係調整心理，一係調整注碼，一係調整策略。郵輪股應用「斬邊留邊」。孳息曲線越嚟越斜。VIX單日升40%都未算好誇。通脹其實升乜？靚仔靚女做經濟學家都有著數。明報財經直播重溫。明報財經直播重溫 (Patreon)

快評幾句—一係調整心理，一係調整注碼，一係調整策略

大師冇點你—郵輪股應用「斬邊留邊」

每日一圖— 孳息曲線越嚟越斜。VIX單日升40%都未算好誇。

Good Read —通脹其實升乜？靚仔靚女做經濟學家都有著數

FB Post Summary —明報財經直播重溫

小版務（不重要，趕時間可skip）—月頭小心美國時差

快評幾句—點算好？買得未？三個方法幫你少少

1. 事忙，市又波動，多嘢睇多嘢諗，你見好多PM我都未覆，但PM週末必定會覆晒。舊文留言就可能再耐啲，呢個真係我嘅不足，希望之後全職寫Patreon會好啲。

2. 一句：寫文時（香港時間3點）美股已定返好多。道指都仲400點（但只係1%），Nasdaq直頭反彈1%。唔係咩金融危機，唔使咁驚。

3. 順手畀段你睇咗會爆粗嘅嘢，係我星期一嘅明報專欄（記得睇，雖然我就快想唔寫，冇錢的，真係純為迫自己個個星期整理思維），題為「股災？甚麼股災？」：

4. 筆者提供一些會令你破口大罵的數字：恒指已連升五個月，2月仍升700點。道指上星期三才創過新高。股災？甚麼股災？上星期的跌勢是有點急，但即使納指仍只是在高位調整7%。股災？甚麼股災？

5. 有機會再寫，但都嗰句，咁你就反艇叫救命？咁你應該係出咗啲問題。一係調整心理（有升有好平常），一係調整注碼（唔好借錢唔好賭救命錢），一係調整策略（唔好成手新經濟）。

6. 留意下，CNN呢個Greed and Fear Index（唔算好「準」，但易明好用），而家都仲係「Neutral」咋！昨晚（即係你叫救命嘅星期四晚）仲係「Greed」。好大程度因為只係股市跌，但你見其他咩貨幣市場呀，外匯呀，銀行體系呀冇乜異動的。所以只係啲嘢太貴調一調整，唔係咩大危機。

7. 都係答咗大家最關心嘅問題先：點好，同埋買得未。亦即係「跌咗止唔正蝕」同埋「接唔接飛刀」。答案都係令你有啲失望。但我只講真話。咁嘅波幅，唔係令我覺得應該沽晒佢（都遲咗啦？）或者訓身撈底嘅時機。原本想買嘅，咪繼續買，唔使怕。

8. 止蝕嘛，我自己都唔多做，但我可以理解人地做，亦唔會批評你咁做。我就真係試過唔止蝕，隻股票輸到total loss，但當然我亦某程度上田為咁，可以渣到啲升幾倍嘅嘢。

9. 亦返返去一個早排有讀者問嘅問題，我估大家都遇到呢種現象。如果過去幾個月買股票嘅，好可能有啲帳面收獲啦。咁埃汾話唔好升一兩成自己沽嘛（呢個我一定會批評或恥笑），都好多人明白又做到—但呢排跌返落嚟喎。咁你就掙扎啦：沽咗佢又驚之後再升多一倍喎，唔沽又驚原本贏嘅錢嘔返出嚟。點好？

10. 你細心啲諗應該明白：係冇得搞的！係兩難，你渣得太長就有帳面利潤縮水甚至倒輸嘅危險。太早沽就有太早落車嘅風險。明顯冇得兩全其美。

11. 但實際上，有方法幫到嘅。三樣嘢啦，首先之前提過嘅「斬邊留邊」「零成本」「票尾睇結局」（差不多同一回事），聽落簡單，但真係幾有用，對你心理幫到好多，都有唔少讀者試咗了，例如買郵輪嗰啲，下面解多次。第二係你可以判斷下（唔一定100%可以，但試下）到底你買嘅公司係乜，係根本你想長相屍首丫，定係由頭到尾你都覺得間公司流，只係想人玩我玩（當然有啲人嘅字典係冇長相屍首的，咁冇計）。即係我渣隻港交所渣Nike嘅，真係冇乜點驚過，最多咪可能估值太過少，但生意應該長做長有。但我渣WISH嘅，就可能自己都唔信間公司。咁可能前者你唔斬（甚至加碼），後者你斬咯。第三？講你都唔信，但：睇少啲股票機，甚至睇少啲新聞上少啲網。Patreon咪儲埋星期六先睇，「記得準時畀錢就得」。唔好睇少第三，有機會講多啲。

大師冇點你—郵輪股應用「斬邊留邊」

12. 我識有三四個讀者都有買郵輪股，咁講嗰時23蚊唔夠，之後當然都賺唔少。呢，有一位仲即時上埋40蚊VIP，仲即時交全年，「呢啲咪好讀者」！（不過全年係有折的，其實係我蝕畀讀者，當然唔會同大家計呢啲）。

13. 講嘅係，呢幾個讀者好似都有用「斬邊留邊」「零成本」「票尾睇結局」嘅策略。真係得喎，咁高位跌沽一半咯，或者高位跌唔到，星期四大瀉時咪沽—雖然縮咗水，但仲有少少利潤—而最重要係仲留住一半呀。你睇？今日又升返。如果沽晒實後悔。

每日一圖— 孳息曲線越嚟越斜。VIX單日升40%都未算好誇。

14. 孳息曲線越嚟越斜—呢條東西叫做yield curve，美國不同年期嘅國債息口。除咗近排不停講嘅長息升得快，仲要留意短息冇乜點升（因為短息就反映聯儲局啲加息預期，長息？冇人估聯儲局廿年後加息定減息）。結果就係條曲線越嚟越斜。之前講過對銀行股有利，今日講多樣嘢：多數呢條曲線平，甚至倒掛（長息平過短息），往往預示衰退發生—對上一次亦都係！而曲線夠斜，代表經濟復蘇—事實亦係咁。不過咪話過你知，經濟復蘇唔等於股市好咯，正如舊年經濟差不代表股市唔跌嘛。只係知呢樣嘢你已經叻過好多人。

15. VIX單日升40%都未算好誇—星期四美股大跌，VIX差不多單日彈40%。但都未去到史上頭20。咁嫌頭20唔夠濶？你見到1月27號VIX單日無啦啦升62%。但你仲記唔記得咩事？我都唔記得。另外你發現好多都係近年嘅日子，似乎VIX近年波幅係大咗好多的，好可能因為而家啲跌市快，以前就漫長啲日日磨。

Good Read —通脹其實升乜？靚仔靚女做經濟學家都有著數

16. 通脹其實升乜？—拎嚟做每日一圖都得，但可以睇埋啲討論。1996-2016年間美國物價，唔係遠古年代。咁20年間升咗55%，即係每年2%，官方數字啦下。但估下乜嘢類別升得最勁？難估，居然係教科書，同埋大學學費。前者可以老翻，後者硬掘。仲有係Child Care．所以而家社會上流更加難，因為大學太貴。美國啦下。跌嘅呢？「電視平咗好多」，同一個價錢，當年只係買部細電視，而家買大大部。但當然留意，人嘅消費模式會變。電視係當年4%嘅價格，點會補得返上大學要3倍錢 ?

17. 靚仔靚女做經濟學家都有著數—呢啲研究幾好做（個作者）。無數實驗證明靚仔靚女有著數，原因好簡單，唔好信咩「靚唔靚好主觀」。你搵吳彥祖（雖然而家甩頭髮）同埃汾張相畀啲人評分，咪知邊個靚仔啲。然後可以拎嚟同返佢地見工嘅機會比。呢個研究都類似，但針對經濟學者，照計應該「冇咁以貌取人」。但研究話你知，一樣都係靚仔靚女易啲入名大學，之後嘅人工亦都好啲。論文都多啲人quote。所以？「我個人真係覺得應該出錢畀下一代整容」。

FB Post Summary —明報財經直播重溫

18. 明報財經直播重溫—唔算係文，係明報嘅直播節目。你見我好少 share呢啲，因為十居其九都廢（明報就好啲），根本冇乜時間準備，亦有時係主持廢。不過今次呢個幾好睇，亦都答咗一啲大家想知嘅問題。

小版務（不重要，趕時間可skip）—月頭小心美國時差

19. BTW，想轉年費嘅，實在唔使等3月1日的，因為你今日（2月27日）轉佢都係幫你2022年3月1先再續，唔會蝕畀我。「當然你3月1號先轉佢就2022年4月1先再續，你就好似so咗」，咁都OK嘅，但告誡大家，係唔使先取消再訂的。如果事必要取消再訂嘅，都得，「但提返你唔該香港時間3月1號夜晚先好做」，因為Patreon計美國時間（我冇記錯係計三藩市時間），之前都好多人取消咗然後月頭1號日頭再去訂，「結果又扣兩次錢」